ပွႆးလေႃႉ ၸဝ်ႈတူၼ်ၶူးလူင် ပၺ်ၺႃသႃမိ ၽူႈငၢမ်းပၢႆးလူင် မၢႆ 2 ၸိုင်ႈတႆးပွတ်းဢွၵ်ႇၶူင်း မီးသင်ၶၸဝ်ႈလႄႈ တၵ်ႉၵႃႇၶဝ်ႈ ႁူမ်ႈ တင်းၼမ်။
ဝၼ်းတီႈ 30/10/2019 ယၢမ်းၵၢင်ဝၼ်း 12 မူင်းၶိုင်ႈ သင်ၶၸဝ်ႈလႄႈ တၵ်ႉၵႃႇသတ်ႉထႃး တႃႈၶီႈလဵၵ်း လႄႈ ဢိၵ်ႇပႃး တီႈ ၸမ်ၵႆ ႁူမ်ႈၵၼ် ပူၼ်ႉၶၢပ်ႈတူဝ် ၸဝ်ႈတူၼ်ၶူးလူင် ပၺ်ၺႃသႃမိ ဝတ်ႉဝိႁၢရ်လူင် မၢၵ်ႇၵႃႇႁူဝ်ၶမ်း တီႈပႃႇႁဵဝ်ႈမဵဝ်ႉမ ဢၼ် မီး ႁိမ်းထၢတ်ႈပုတ်ႉထၵယႃႇ ပုင်ႇလူဝ်ႉ ၸႄႈဝဵင်းတႃႈၶီႈလဵၵ်း။
ၸဝ်ႈၶူး ၵုလိသ ၽူႈၸွႆႈထႅမ်ၵူႈလွင်ႈလွင်ႈ ၼႂ်းပၢင်ၸႃပၼ ၸဝ်ႈတူၼ်ၶူးလူင် တီႈဝတ်ႉမၢၵ်ႇၵႃႇႁူဝ်ၶမ်း လၢတ်ႈတီႈၽူႈ တွႆႇႁွၵ်ႈဝႃႈ “ တႄႇဢဝ်ၶၢပ်ႈတူဝ်ၸဝ်ႈသြႃႇလူင်ႁဝ်းၶႃႈၵႂႃႇ ယၢမ်း 12 မူင်းၶိုင်ႈ ၵႂႃႇႁွတ်ႈၽႅဝ် တီႈပႃႇၸႃႉ မွၵ်ႈယၢမ်းဝၢႆးဝၼ်း 3 မူင်းၼႆႉ။ ယၢမ်းၵၢင်ၶမ်ႈ 6 မူင်းၶိုင်ႈ တႄႇလူႇတၢၼ်းၽဝ်ၶၢပ်ႈတူဝ် တီႈၵွင်ၾႆးသေ ထိုင်မွၵ်ႈ 8 မူင်း ၸင်ႇတေယဝ်ႉတူဝ်ႈ ၵႂႃႇ။ တၵ်ႉၵႃႇတီႈၸမ်ၵႆ ဢွၼ်ၵၼ်မႃးၶဝ်ႈႁူမ်ႈၼႆႉ ၶႂ်ႈဝႃႈၼပ်ႉႁူဝ်မိုၼ်ႇ – ႁူဝ်သႅၼ်မၼ်းၶႃႈယဝ်ႉ ၼမ်တႄႉၼမ်ဝႃႈၼၼ်ႉ ယဝ်ႉ” ဝႃႈၼႆ။
ပၢင်ၸႃပၼ ၸဝ်ႈတူၼ်ၶူးလူင် ပၺ်ၺႃသႃမိ ဝတ်ႉမၢၵ်ႇၵႃႇႁူဝ်ၶမ်း ၸႄႈဝဵင်းတႃႈၶီႈလဵၵ်းၼႆႉ မီးသင်ၶၸဝ်ႈ ၼႂ်းမိူင်းတႆး၊ မိူင်းမၢၼ်ႈ၊ မိူင်းထႆးလႄႈ မိူင်းသီႇႁူဝ်ႇ မႃးၶဝ်ႈႁူမ်ႈၸွမ်း။
ၸဝ်ႈၶူးၵုလိသ လၢတ်ႈဝႃႈ “ သင်ၶၸဝ်ႈႁဝ်းၶႃႈ တင်းၼွၵ်ႈမိူင်းၼႂ်းမိူင်းၵေႃႈ မႃးၶဝ်ႈႁူမ်ႈၼမ်၊ ၸဝ်ႈယႂ်ႇ/ တူၼ်ယႂ်ႇ မိူၼ် ၼင်ႇၸဝ်ႈတူၼ်ၶူးလူင် ၻွၵ်ႊတိူဝ်ႊ ပၺ်ႇၺႃၼၼ်ႇတ ဝတ်ႉထၢတ်ႈတေႃႇလွႆလႅမ်၊ ၸဝ်ႈတူၼ်ၶူးလူင် သီႇတၵူႇ၊ ၸဝ်ႈ တူၼ်ၶူးလူင် ဢိၼ်းယႃး ဢိၵ်ႇထႅင်ႈလၢႆလၢႆၸဝ်ႈ။ ယဝ်ႉၵေႃႈ မိူၼ်ၼင်ႇ ႁွင်ႈၵၢၼ်ၾၢႆႇလူင်ပွင်ၸိုင်ႈမိူင်းတႆးၵေႃႈမႃးၶဝ်ႈ ႁူမ်ႈ၊ ၽူႈၵွၼ်းတိူင်းသိုၵ်းသၢမ်ၸဵင်ႇၵဵင်းတုင်ၵေႃႈမႃး” ဝႃႈၼႆ။
မိူဝ်ႈဝၼ်းတီႈ 7/9/2019 ယၢမ်းၵၢင်ၶမ်ႈ 8 မူင်းပၢႆ ၸဝ်ႈငမ်းပၢႆးလူင် မၢႆ (2) ၸဝ်ႈတူၼ်ၶူးလူင်ပၺ်ၺႃသႃမိ ဢၵ်ႉၵမႁႃ သတ်ႉထမ်မ ၸေႃးတိၵထၸ ဢၼုၼႃယၵ ငဝ်ႈငုၼ်းမုၵ်ႉၸုမ်းလူင်သင်ႇၶႃႇ ၸိုင်ႈတႆး၊ ၵိူင်းသူၺ်ႇၵျိၼ်ႇ ရတ်ႉတၼ် ၺူမႁႃၼႃ ယၵ ၵျွင်းၽြႃးလူင်ရၶႅင်ႇ မႁႃမျၢတ်ႈမုၼိမၢၵ်ႇၵႃႇႁူဝ်ၶမ်း ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ ၸဝ်ႈ လႆႈၶဝ်ႈသူၼ် မၢၵ်ႇႁၢၵ်ႈၶမ်းၵႂႃႇ လူၺ်ႈတၢင်းပဵၼ်ၵႄႇထဝ်ႈ တီႈဝတ်ႉမၢၵ်ႇၵႃႇႁူဝ်ၶမ်း ဝဵင်းတႃႈၶီႈလဵၵ်း။
လႅင်ႇၶၢဝ်ႇ လႅတ်ႇၼုမ်ႇ မင်းရၢႆး
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ