မုၵ်ႉၸုမ်း လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ တင်း လုၵ်ႈႁဵၼ်းၼၢင်းယိင်းတႆး ၸၼ်ႉၸွမ် မႁႃပၸႃပတိၵေႃးတမီႇ ႁူပ်ႉဢုပ်ႇဢူဝ်းလႅၵ်ႈလၢႆႈတၢင်းႁူႉၵၼ်။
ပၢင်ႁူပ်ႉထူပ်းၼႆႉ ၸတ်းႁဵတ်း ၼႂ်းဝၼ်းတီႈ 28/10/2019 ယၢမ်းဝၢႆးဝၼ်း 1 မူင်း ထိုင် 4 မူင်း တီႈၸၼ်ႉၸွမ်မႁႃပၸႃပတိၵေႃးတမီႇ ၸႄႈဝဵင်းၶူဝ်းရၢတ်ႉ ၸႄႈတွၼ်ႈရၢတ်ႉၶျသီမႃး ၸိုင်ႈထႆး တင်းမူတ်းလုၵ်ႈႁဵၼ်းႁူပ်ႉၵၼ် 46 ၵေႃႉ ဝႃႈၼႆ။
ၸဝ်ႈၶူး ဢိတ်ႉသရိယ ႁူဝ်ပဝ်ႈ လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ယိူင်းဢၢၼ်း ဢၼ် လႆႈၵႂႃႇသူႇၸႂ်းလႅၵ်ႈလၢႆႈတၢင်းႁူႉၵၼ်တႄႉ မိူၼ်ၼင်ႇ – ႁႂ်ႈမုၵ်ႉၸုမ်းသင်ၶတႆး လုၵ်ႈႁဵၼ်းၸၼ်ႉၸွမ်မိူင်းၵွၵ်ႇ တင်းလုၵ်ႈ ႁဵၼ်းၼၢင်းယိင်းတႆး ပေႃးတေမီးလွင်ႈၵပ်းသိုပ်ႇတေႃႇၵၼ်လႆႈၶၢဝ်းယၢဝ်း။ ႁႂ်ႈမီးလွင်ႈမိုတ်ႈၵိုဝ်းၸမ်ၸႂ်မိူၼ်ပီႈ ၼွင်ႉၵၼ် ၸွႆႈထႅမ်ၼႃႈၵၢၼ်ၵၼ်မိူဝ်းၼႃႈလႆႈ။ ႁႂ်ႈလုၵ်ႈႁဵၼ်းၸိူဝ်းပဵၼ် ၼၢင်းယိင်းတႆး ယၢၼ်မိူင်းမီးႁႅင်းၸႂ်သေသိုပ်ႇ ၶိုၼ်ႈႁဵၼ်း ၵႂႃႇ။ ယဝ်ႉၵေႃႈ တႃႇၸွႆႈထႅမ်ၵႄႈၶႆပၼ်ႁႃလွင်ႈယၢပ်ႇၽိုတ်ႇၵမ်ႈၽွင်ႈ ၸဵမ်ၸိူဝ်းၼႆႉ ယဝ်ႉၵေႃႈ လႆႈၸတ်းႁဵတ်း ပၢင်ဢုပ်ႇ ဢူဝ်းလႅၵ်ႈလၢႆႈတၢင်းႁူႉ ၵဵဝ်ႇၵပ်းလွင်ႈၵၢၼ်ႁဵၼ်းၵၢၼ်သွၼ်ၼႂ်းၸၼ်ႉၸွမ်ထႅင်ႈ” ဝႃႈၼႆ။
လိူဝ်ၼၼ်ႉ ယူႇတီႈမုၵ်ႉၸုမ်းသင်ၶတႆး လုၵ်ႈႁဵၼ်းၸၼ်ႉၸွမ် မိူင်းၵွၵ်ႇသေ လႆႈၵႂႃႇသူႇၸႂ်းပၼ်ႁႅင်း လႅၵ်ႈလၢႆႈတၢင်းႁူႉ ၵၼ်သေ ယဝ်ႉၵေႃႈ ပိုတ်ႇပၢင်သွၼ်ၶွမ်ႊၽိဝ်ႊတိူဝ်ႊၶၢဝ်းတၢင်း 5 ဝၼ်း။ တႄႇဢဝ် ဝၼ်းတီႈ 29/10/2019 ထိုင် ဝၼ်းတီႈ 2/11/2019 ပေႃးထိုင်မႃး ဝၼ်းတီႈ 3 ၸိုင် တေၸတ်းႁဵတ်းပွႆးလူင်းပၢင်သွၼ်ၶွမ်ႊၽိဝ်ႊတိူဝ်ႊ။
လုၵ်ႈႁဵၼ်း ၼၢင်းယိင်းတႆး ၸၼ်ႉၸွမ်မႁႃပၸႃပတိၵေႃးတမီႇ 46 ၵေႃႉၼႆႉ ၶိုၼ်ႈႁဵၼ်းဝႆႉ ပီၼိုင်ႈလႄႈ ပီသွင်။ ဢၼ်လႆႈ ႁူပ်ႉၵၼ်ပွၵ်ႈၼႆႉ ပဵၼ်ပွၵ်ႈၵမ်း 3 ယဝ်ႉ။
ၸဝ်ႈၶူး ဢိတ်ႉသရိယ လၢတ်ႈဝႃႈ “ မိူဝ်းၼႃႈမႃးၵေႃႈ တေၶတ်းၸႂ်သေ ၵႂႃႇသူႇၸႂ်းပၼ်ႁႅင်း ၸတ်းႁဵတ်းပၢင်လႅၵ်ႈလၢႆႈ တၢင်းႁူႉၵၼ်ထႅင်ႈယူႇ။ ဢမ်ႇဝႃႈၵၢၼ်ၽိူမ်ႉထႅမ်ၼမ်ႉၵတ်ႉ ၼႂ်းၵၢၼ်ႁဵၼ်းၵၢၼ်သွၼ် မီးလွင်ႈယၢပ်ႇၽိုတ်ႇၸိူင်ႉႁိုဝ်ၵေႃႈ ၸွမ်းၼင်ႇၸွႆႈထႅမ်လႆႈၼၼ်ႉ တေၶတ်းၸႂ်သူႇၸႂ်းၸွႆႈထႅမ်ၵၼ်ယူႇ။ ဢမ်ႇဝႃႈ တႃႇလုၵ်ႈႁဵၼ်းတႆး ၼႂ်းမိူင်းထႆးၵူၺ်း တႃႇပီႈ ၼွင်ႉတႆးၵူႈတီႈၵူႈတၢင်းၵူႈမူႇၵူႈၸုမ်းၵေႃႈ ယိၼ်းလီႁပ်ႉတွၼ်ႈ တႃႇၸွႆႈထႅမ်ပၼ်ၸွမ်းၼင်ႇပွင်ပဵၼ်လႆႈယူႇ”ဝႃႈၼႆ။
ပၢင်ႁူပ်ႉထူပ်းလႅၵ်ႈလၢႆႈတၢင်းႁူႉၵၼ်ၼႆႉ ယၢမ်းတွၼ်ႈၼႂ် ယူႇတီႈလုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ ႁူပ်ႉထူပ်းဢုပ်ႇ ဢူဝ်းၸွမ်း ၽူႈၵွၼ်းၸၼ်ႉၸွမ်သေ တွင်ႈထၢမ်ၶေႃႈမုလ်း လႅၵ်ႈလၢႆႈၵၼ်။ ယၢမ်းဝၢႆးဝၼ်းသမ်ႉ လုၵ်ႈႁဵၼ်း သင်ၶတႆး တင်း လုၵ်ႈႁဵၼ်းၼၢင်းယိင်းတႆး ႁူပ်ႉဢုပ်ႇဢူဝ်းလႅၵ်ႈလၢႆႈၵၼ်ၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ