ၵႃး (လၢႆႉထရၢၵ်ႉ) တၢင်ႇၵူၼ်းလုၵ်ႉမိူင်းမၢၼ်ႈမႃးဝႆႈၽြႃးမိူင်းတႆး ပိၼ်ႈတူၵ်းတၢင်း (တူၵ်းႁူၺ်ႈ) ၼႂ်းၸႄႈဝဵင်းယႂႃႇငၢၼ်ႇ ၵူၼ်းၶီႇမႃးၸွမ်းၼႂ်းၵႃး လူႉတၢႆ ထင်တီႈ 16 ၵေႃႉ မၢတ်ႇၸဵပ်း 10 ၵေႃႉ။
ဝၼ်းတီႈ 28/10/2019 ယၢမ်းၵၢင်ၶမ်ႈ မွၵ်ႈ 8 မူင်း ၵႃးလၢႆႉထရၢၵ်ႉ တၢင်ႇၵူၼ်းမႃးဝႆႈၽြႃးလမ်းၼိုင်ႈ ပိၼ်ႈတူၵ်းတၢင်း ၼႂ်းၵႄႈဝၢၼ်ႈယူင်ႇတွင်ႇတင်း ဝၢၼ်ႈသၶၢၼ်းၵျီး (ယုန်တောင်ကျေးရွာ နှင့် စခန်းကြီးကျေးရွာ) ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်း ၸၢၼ်း။ ၶႂမ်ႈတူၵ်းၵႂႃႇၼႂ်းႁူၺ်ႈ တၢင်းလိုၵ်ႉတေမီးမွၵ်ႈ 2,000 ထတ်း။
ဢူးၸေႃႇမိၼ်းလၢတ်ႉ ၽူႈတႅၼ်းသၽႃးၸိူဝ်ႉၸၢတ်ႈ ၸႄႈတွၼ်ႈတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ယၢမ်းၵၢင်ၶမ်ႈ မွၵ်ႈ 8 မူင်းၼၼ်ႉ ၵႃးပိၼ်ႈၶႂမ်ႈတူၵ်းႁူၺ်ႈလမ်းၼိုင်ႈ။ တၢႆ 16 ၵေႃႉ၊ ၼႂ်း 16 ၵေႃႉၼၼ်ႉ ပႃးသင်ၶၸဝ်ႈ တူၼ်ၼိုင်ႈ။ ၵူၼ်းမၢတ်ႇၸဵပ်းသမ်ႉ 10 ၵေႃႉ။ ၼႂ်း 10 ၵေႃႉၼၼ်ႉ မၢတ်ႇၸဵပ်းႁၢဝ်ႈႁႅင်း 2 ၵေႃႉ တေႃႈလဵဝ် လႆႈသူင်ႇယူတ်းယႃ တီႈမၼ်း တလေးယဝ်ႉ။ တႃႇ 8 ၵေႃႉတႄႉ သူင်ႇယူတ်းယႃတီႈႁူင်းယႃယႂႃႇငၢၼ်ႇဝႆႉ” ဝႃႈၼႆ။
ၵူၼ်းမိူင်းဢၼ်ၵႂႃႇဝႆႈၽြႃး မႃးၸွမ်းၼႂ်းၵႃး ဢၼ်လႆႈလူႉတၢႆ 16 ၵေႃႉၼၼ်ႉ တေႃႈလဵဝ် လႆႈဢဝ်ၶၢပ်ႈတူဝ်ၶဝ်ဝႆႉတီႈ ႁူင်းယႃ ယႂႃႇငၢၼ်ႇ။ ၵႃးဢၼ်မႃးပိၼ်ႈၶႂမ်ႈၼၼ်ႉ ပဵၼ်ၵႃးလုၵ်ႉတၢင်းဝဵင်းသူၺ်ႇပူဝ်ႇ မိူင်းမၢၼ်ႈပွတ်းၵၢင်ပုၼ်ႉမႃး ဝႆႈၽြႃး မိူင်းတႆး ဝႃႈၼႆ။
ဢူးၸေႃႇမိၼ်းလၢတ်ႉ သိုပ်ႇလၢတ်ႈဝႃႈ “ သဵၼ်ႈတၢင်းၼႆႉ တေႃႈလဵဝ် တိုၵ်ႉၶႂၢၵ်ႈႁႂ်ႈမၼ်းၵႂၢင်ႈထႅင်ႈ။ ၵႃးဢၼ်ၶဝ်ၶီႇမႃး ၼၼ်ႉ ပဵၼ်ၵႃးတၢင်ႇၶူဝ်းၵုၼ်ႇ။ ဢမ်ႇၸႂ်ႈၵႃးတၢင်ႇၵူၼ်း။ ၵႃးၸိူင်ႉၼႆႉ ဢမ်ႇလီတၢင်ႇၵူၼ်းၶႃႈ” ဝႃႈၼႆ။
ၵူၼ်းမိူင်းဢၼ်လႆႈလူႉတၢႆ 16 ၵေႃႉလႄႈ မၢတ်ႇၸဵပ်း 10 ၼၼ်ႉ တေႃႈလဵဝ် ၾၢႆႇပလိၵ်ႈၶဝ် ၵပ်းသိုပ်ႇ ၸူးၸိူဝ်ႉၶိူဝ်းပီႈၼွင်ႉ ၶဝ်ယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ