သင်ၶလႄႈတၵ်ႉၵႃႇတႃႈၶီႈလဵၵ်း တေႁူမ်ႈၵၼ်ဢဝ်ၶၢပ်ႈတူဝ် ၸဝ်ႈတူၼ်ၶူးလူင် ပၺ်ၺႃသႃမိ ဝတ်ႉၵျွင်းမၢၵ်ႇၵႃႇႁူဝ်ၶမ်း ဝဵင်းတႃႈၶီႈလဵၵ်း တၢၼ်းတၢင်ႇၵွင်ၾႆး ၼႂ်းႁၢင်လိူၼ်ဢွၵ်ႊထူဝ်ႊပိူဝ်ႊၼႆႉ။
ဝၼ်းတီႈ 30/10/2019 ယၢမ်းၵၢင်ဝၼ်း 12 မူင်းၸိုင် ယူႇတီႈသင်ၶၸဝ်ႈ လႄႈ တၵ်ႉၵႃႇသတ်ႉထႃး တႃႈၶီႈ လဵၵ်း ဢိၵ်ႇပႃး တၵ်ႉၵႃႇတီႈၸမ်ၵႆ တေႁူမ်ႈၵၼ် ယုၵ်ႉဢဝ်ၶၢပ်ႈတူဝ် ၸဝ်ႈတူၼ်ၶူးလူင် ပၺ်ၺႃသႃမိ ဝတ်ႉဝိႁၢရ်လူင်မၢၵ်ႇၵႃႇႁူဝ် ၶမ်း ဢၼ်လႆႈၶဝ်ႈသူၼ်မၢၵ်ႇႁၢၵ်ႈၶမ်းၵႂႃႇ မိူဝ်ႈဝၼ်းတီႈ 7/9/2019 ၼၼ်ႉ ၵႂႃႇတီႈပႃႇႁဵဝ်ႈ မဵဝ်ႉမ ဢၼ်မီး ႁိမ်းထၢတ်ႈပုတ်ႉထ ၵယႃႇ ပုင်ႇလူဝ်ႉ ၸႄႈဝဵင်းတႃႈၶီႈလဵၵ်း။
ၸဝ်ႈၶူးၵုလိသ ၽူႈၸွႆႈထႅမ်ၵူႈလွင်ႈလွင်ႈ ၼႂ်းပၢင်ၸႃပၼ ၸဝ်ႈတူၼ်ၶူးလူင် တီႈဝတ်ႉမၢၵ်ႇၵႃႇႁူဝ်ၶမ်း လၢတ်ႈတီႈၽူႈ တွႆႇႁွၵ်ႈဝႃႈ “ တေႃႈလဵဝ် ႁဝ်းၸဝ်ႈၶဝ် တိုၵ်ႉၸွႆႈၵၼ် ၶိုင်သၢင်ႈ တႃႇတေပူၼ်ႉၶၢပ်ႈတူဝ်ႈၸဝ်ႈသြႃႇႁဝ်း မိူဝ်ႈၽုၵ်ႈ။ ဝၼ်းတီႈ 30/10/2019 ယၢမ်းပွတ်းၼႂ် တေလူႇတၢၼ်းၵူမ်တူဝ် ပေႃးသုင်းသွမ်းဝၼ်းယဝ်ႉ တေဢဝ်ၶၢပ်ႈတူဝ်ပၼ်ႇႁွပ်ႈဝတ်ႉၼႆႉ 3 ႁွပ်ႈ။ ယဝ်ႉ ၵေႃႈ တေလၢၵ်ႈလိူမ် လတ်းၵၢင်ဝဵင်းသေ တေယုၵ်ႉလူႇတၢၼ်းၵွင်ၾႆးၵႂႃႇ” ဝႃႈၼႆ။
ပွႆးလေႃႉ ပၢင်သၢင်းၵဵဝ်ႇ ၸဝ်ႈတူၼ်ၶူးလူင် ပၺ်ၺႃသႃမိ တီႈဝတ်ႉမၢၵ်ႇၵႃႇႁူဝ်ၶမ်းၼႆႉ တေမီးသင်ၶၸဝ်ႈ တူၼ်ယႂ်ႇၼႂ်း မိူင်းႁူမ်ႈတုမ်လႄႈ ၼႂ်းမိူင်းတႆး၊ ယဝ်ႉၵေႃႈ ႁွင်ႈၵၢၼ်လူင်ပွင်ၸိုင်ႈၼႂ်းမိူင်းတႆး ၽွင်းလူင်၊ ၸွမ်ၽွမ်းလူင် ၸဵမ်ၸိူဝ်းၼႆႉ တေမႃးလူႇတၢၼ်းၶဝ်ႈႁူမ်ႈဝႆႈသႃပႃး ဝႃႈၼႆ။
ၸဝ်ႈၶူးၵုလိသ သိုပ်ႇလၢတ်ႈဝႃႈ “ ၸဝ်ႈတူၼ်ၶူးလူင် ယႂ်ႇတီႈသုတ်း ၼႂ်းမိူင်းႁူမ်ႈတုမ် တူၼ်ထီႉသွင်ၵေႃႈ တေမႃးၶဝ်ႈႁူမ်ႈ။ ယဝ်ႉၵေႃႈ သင်ၶၸဝ်ႈၼႂ်းမိူင်းတႆး ပွတ်းႁွင်ႇ၊ ပွတ်းၸၢၼ်းလႄႈ ပွတ်းဢွၵ်ႇ။ လိူဝ်ၼၼ်ႉ တၵ်ႉၵႃႇသတ်ႉထႃး တၢင်းမိူင်း တႆး တီႈၸမ်ၵႆလႄႈ တၢင်းမိူင်းထႆးၵေႃႈတေမႃးၶဝ်ႈႁူမ်ႈပႃး။ ၽွင်းလူင် ၸႄႈမိူင်းတႆးလႄႈ ၸွမ်ၽွင်းလူင် ၸိူဝ်း ၼႆႉၵေႃႈ တေမႃး” ဝႃႈၼႆ။
ဝၼ်းမိူဝ်ႈၼႆႉ ဝၼ်းတီႈ 29/10/2019 ယၢမ်းၵၢင်ၶမ်ႈ 7 မူင်းၶိုင်ႈၸိုင် ပဵၼ်ဝၼ်းလိုၼ်းသုတ်း ပၢင်တေႇသၼႃႇ ႁေႃးတြႃး/ ပွၼ်ႈထမ်း။ မိူဝ်ႈၼႆႉ တေပဵၼ်ၸဝ်ႈတူၼ်ၶူးၺႃၼိသ်သရ (သီတၵူႇ)။ တင်းမူတ်း ပၢင်တေႇသၼႃႇႁေႃးတြႃးၼႆႉ တင်း မူတ်း မီး 6 ဝၼ်း။ မိူဝ်ႈၶမ်ႈဝၼ်းတီႈ 24 ၼၼ်ႉ ပဵၼ်ၸဝ်ႈတူၼ်ၶူး ဝိရိယႃၼၼ်တ ဝတ်ႉၵမ်ႇပေႃးၸ၊ ၊ ဝၼ်းတီႈ 25 ၸဝ်ႈတူၼ်ၶူး ၺႃၼဝရ ဝတ်ႉမႁႃၽေႃး ထိ ဝဵင်းတႃႈၶီႈလဵၵ်း၊ ဝၼ်းတီႈ 26 ၸဝ်ႈတူၼ်ၶူးလူင် Dr. ၶမ်းမၢႆ ထမ်မသႃမိ၊ ဝၼ်းတီႈ 27 ၸဝ်ႈတူၼ်ၶူး ပၺ်ၺႃသီရိ ဝတ်ႉလွႆလူင် ၵဵင်းတုင်၊ ဝၼ်းတီႈ 28 ၸဝ်ႈတူၼ်ၶူးသုၶမိၼ်တ ဝတ်ႉလွႆတိုင်ၶမ်း ဝဵင်းမူႇၸေႊ ၸဵမ်ၸိူဝ်းၼႆႉ။
မိူဝ်ႈဝၼ်းတီႈ 7/9/2019 ယၢမ်းၵၢင်ၶမ်ႈ 8 မူင်းပၢႆ ၸဝ်ႈငမ်းပၢႆးလူင် မၢႆ (2) ၸဝ်ႈတူၼ်ၶူးလူင်ပၺ်ၺႃသႃမိ ဢၵ်ႉၵမႁႃ သတ်ႉထမ်မ ၸေႃးတိၵထၸ ဢၼုၼႃယၵ ငဝ်ႈငုၼ်းမုၵ်ႉၸုမ်းလူင်သင်ႇၶႃႇ ၸိုင်ႈတႆး၊ ၵိူင်းသူၺ်ႇၵျိၼ်ႇ ရတ်ႉတၼ် ၺူမႁႃၼႃ ယၵ ၵျွင်းၽြႃးလူင်ရၶႅင်ႇ မႁႃမျၢတ်ႈမုၼိမၢၵ်ႇၵႃႇႁူဝ်ၶမ်း ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်းၼႆႉ ၸဝ်ႈ လႆႈၶဝ်ႈသူၼ် မၢၵ်ႇႁၢၵ်ႈၶမ်းၵႂႃႇ လူၺ်ႈတၢင်းပဵၼ်ၵႄႇထဝ်ႈ တီႈဝတ်ႉမၢၵ်ႇၵႃႇႁူဝ်ၶမ်း ဝဵင်းတႃႈၶီႈလဵၵ်း။
လႅင်ႇၶၢဝ်ႇ – လႅတ်ႇၼုမ်ႇ မင်းရၢႆး
