ပၢင်ဢုပ်ႇၶႆႈ ပိုၼ်းႁူႉပၢႆးႁၼ် တူင်ႇဝူင်းၵူၼ်း ၸတ်းႁဵတ်းတီႈၵဵင်းတွင်း ၸိုင်ႈတႆးပွတ်းၸၢၼ်း မီးသင်ၶလႄႈ ၵူၼ်းမိူင်း ၶဝ်ႈႁူမ်ႈထွမ်ႇ ငိၼ်း တင်းၼမ်လၢႆ။
ဝၼ်းတီႈ 28/10/2019 ယၢမ်းၵၢင်ၼႂ် 9 မူင်း ထိုင် 3 မူင်းဝၢႆးဝၼ်း သင်ၶၸဝ်ႈ၊ ၵေႃလိၵ်ႈလၢႆး ၵဵင်းတွင်း၊ ၽူႈၵွၼ်းပွၵ်ႉ/ ဢိူင်ႇလႄႈ ၸဝ်ႈၼႃႈတီႈမၢႆ 2 ႁူမ်ႈၵၼ်သေ ၸတ်းႁဵတ်း ပၢင်ဢုပ်ႇၶႆႈ ပၼ်ပိုၼ်ႉႁူႉပၢႆးႁၼ် ၼႂ်းတူင်ႇဝူင်း တီႈဝတ်ႉၼမ်ႉ ပႃမုင်း ပွၵ်ႉ 2 ၵိင်ႇၸႄႈဝဵင်းၵဵင်းတွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း။ ၸတ်းႁဵတ်း ပဵၼ် ပွၵ်ႈၵမ်းႁႅၵ်ႈ တီႈၼႂ်းဝဵင်းၵဵင်းတွင်း ဝႃႈၼႆ။
ၸၢႆးသိူဝ်ၶမ်း ၽူႈၵႅဝ်ပၢင် လၢတ်ႈတီႈၽူႈတွႆႇႁွၵ်ႈဝႃႈ“ ပၢင်တၢၼ်ႈၶႆႈ တီႈၵဵင်းတွင်း ႁဝ်းၶႃႈပွၵ်ႈၵမ်းၼႆႉ တေလႆႈဝႃႈပဵၼ် ပွၵ်ႈဢွၼ်တၢင်းသုတ်းၶႃႈယဝ်ႉ။ မီးၸဝ်ႈၶူးသီရိ ထမ်မ ဝတ်ႉၾႃႉဝဵင်းဢိၼ်း တင်း ၸဝ်ႈၶူး ဢေႃးၸေယ ထမ်မ လၢႆးၶႃႈ M.A ၶဝ်ၸဝ်ႈ 2 တူၼ် မႃးတၢၼ်ႈၶႆႈၼႄၵႂႃႇၶႃႈ” ဝႃႈၼႆ။
ၸဝ်ႈၶူးသီရိ ထမ်မ ဝတ်ႉၾႃႉ ဝဵင်းဢိၼ်းဢုပ်ႇၶႆႈ လွင်ႈယႃႈမဝ်းၵမ်။ ၸဝ်ႈၶူးဢေႃးၸေယ ထမ်မ လၢႆးၶႃႈသမ်ႉ ဢုပ်ႇၶႆႈ ၼႄလွင်ႈပၢႆးပၺ်ၺႃ၊ ၵၢၼ်မိူင်းလႄႈ တူင်ႇဝူင်းၵူၼ်း ၸဵမ်ၸိူဝ်းၼႆႉ။
ပၢင်ဢုပ်ႇၶႆႈ ပိုၼ်ႉႁူႉပၢႆးႁၼ် ၼႂ်းတူင်ႇဝူင်း တီႈဝတ်ႉၼွင်ပႃမုင်းၼႆႉ မီးသင်ၶၸဝ်ႈ ၶိုၼ်ႈႁွတ်ႈ 20 တူၼ်၊ ၵူၼ်းမိူင်းၶိုၼ်ႈ ႁွတ်ႈ ႁိမ်း 500 ဝႃႈၼႆ။
ၸၢႆးသိူဝ်ၶမ်း လၢတ်ႈဝႃႈ “ မိူဝ်ႈၼႆႉ ဝၼ်းတီႈ 29 ၵေႃႈ ႁဝ်းၶႃႈ ၸတ်းႁဵတ်းထႅင်ႈ တီႈဝတ်ႉတူၼ်ႈႁုင်း ပွၵ်ႉ 5 ထႅင်ႈ တေႃႈ လဵဝ် မီးသင်ၶၸဝ်ႈ မႃးၶဝ်ႈႁူမ်ႈထွမ်ႇငိၼ်း 15 တူၼ်လႄႈ ၵူၼ်းမိူင်း မွၵ်ႈ 300 ၵေႃႉ။ ၽူႈမႃးတၢၼ်ႈၶႆႈၵေႃႈတေပဵၼ် ၸဝ်ႈ ၶူးသီရိထမ်မ ဝဵင်းဢိၼ်းတင်းၸဝ်ႈၶူးဢေႃးၸေယ ထမ်မ M.A လၢႆးၶႃႈ” ဝႃႈၼႆ။
လႅင်ႇၶၢဝ်ႇ ၵႄးၼမ်ႉတဵင်း ၵဵင်းတွင်း
