ပလိၵ်ႈမၢၼ်ႈ တီႉလႆႈၶိူင်ႈထၢတ်ႈၼမ်ႉ တႃႇႁုင်တူမ်ႈ ယႃႈမဝ်းၵမ်ၼႂ်းၸႄႈဝဵင်းလႃႈသဵဝ်ႈ တႃႇၵႃႈၶၼ် 1,300 သႅၼ်ပျႃး၊ ၼၼ်ႉဢမ်ႇမီး ၸဝ်ႈၶွင် တိုၵ်ႉၵူတ်ႇထတ်းတူၺ်းယူႇ ပလိၵ်ႈပိုၼ်ၽၢဝ်ႇဝႆႉၼင်ႇၼႆ။
ဝၼ်းတီႈ 26/10/2019 ယၢမ်းၵၢင်ၶမ်ႈ 6 မူင်းၶိုင်ႈၼၼ်ႉ ပလိၵ်ႈမၢၼ်ႈ တီႉလႆႈ ထၢတ်ႈၼမ်ႉ (ဓာတု) တီႈဝၢၼ်ႈၼမ်ႉတွမ်း ၸႄႈဝဵင်းလႃႈ သဵဝ်ႈ ၸိုင်ႈတႆးပွတ်းႁွင်ႇ။
ပလိၵ်ႈပိုၼ်ၽၢဝ်ႇဝႆႉဝႃႈ ၶဝ်ႈၵူတ်ႇထတ်း ရူတ်ႉၵႃး 6 လေႃႉလမ်းၼိုင်ႈ ဢၼ်ၵိုတ်းဝႆႉၼိူဝ်သဵၼ်ႈတၢင်း မူႇၸေႊ – လႃႈသဵဝ်ႈ ၼၼ်ႉ ၵူတ်ႇ ထတ်းတီႉလႆႈ ထၢတ်ႈၼမ်ႉၶႅမ်ႊမီႊၵိူဝ်ႊ (ဓာတု/ တော်လူအင်း) 3600 ရိတ်ႊတိူဝ်ႊ (မႅၼ်ႈၶၼ်ငိုၼ်းယူႇ 450) သႅၼ်ပျႃး။ 1 Pheny ၊ 2 Propanone သမ်ႉ 300 ရိတ်ႊတိူဝ်ႊ (မႅၼ်ႈငိုၼ်း 180 ) သႅၼ်ပျႃး။ ၵႃႊၾႄႊ 975 ၵီႊလူဝ်ႊ( မႅၼ်ႈၶၼ်ငိုၼ်းယူႇ 731 ) သႅၼ်ပျႃး။
ယၢမ်ႈလဵဝ်ပလိၵ်ႈ လႆႈပိုတ်ႇလိူင်ႈဝႆႉယဝ်ႉသေတႃႉ ၸဝ်ႈၶွင်မၼ်းတႄႉ ပႆႇတီႉလႆႈတိုၵ်ႉၵူတ်ႇထတ်းသွၵ်ႈႁႃယူႇ ဝႃႈၼႆ။
မိူဝ်ႈဝၼ်းတီႈ 17/10/2019 ၼၼ်ႉၵေႃႈ ပလိၵ်ႈ တီႉလႆႈထၢတ်ႈၼမ်ႉ ဢၼ်ႁုင်တူမ်ႈယႃႈမဝ်းၵမ် တီႈဝဵင်းမူႇၸေႊ ၸိုင်ႈတႆး ပွတ်းႁွင်ႇမႃး မႅၼ်ႈၵႃႈၶၼ်ငိုၼ်းယူႇ 1 ႁဵင်သႅၼ်ပျႃးပၢႆ ဝႃႈၼႆ။
ထၢတ်ႈၼမ်ႉ ၶႅမ်ႊမီႊၵိူဝ်ႊၸိူဝ်းၼႆႉ ပဵၼ်ထၢတ်ႈဢၼ်တေဢဝ်ႁုင်ႈတူမ်ႈႁဵတ်းယႃႈမဝ်းၵမ် ဢၼ်တီႉလႆႈမိူဝ်ႈၵွၼ်ႇၼႃႈ ၸိူဝ်းၼၼ်ႉလႆႈႁူႉဝႃႈ တေႃႉဢဝ် တၢင်းမိူင်းၶႄႇၶဝ်ႈမႃး ဝႃႈၼႆ။
