မိူဝ်ႈၼႆႉ ဝၼ်းတီႈ 28/10/2019 ယၢမ်းဝၢႆးဝၼ်း 2 မူင်း ပၢင်ပွႆးမၢႆတွင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လူင်းလၢႆးမိုဝ်း NCA ၶွပ်ႈတဵမ် 4 ပီ ဢၼ်ၸတ်းႁဵတ်း တီႈၼေႇပျီႇတေႃႇ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈ တႆး RCSS/SSA ဢမ်ႇ ၶဝ်ႈႁူမ်ႈ။

ၸွမ်သိုၵ်းလူင် မူႇတူးသေးၽူဝ်း KNU မွၵ်ႈလၢတ်ႈၶေႃႈၵႂၢမ်ႈတီႈၼႂ်းပၢင်ပွႆးမၢႆတွင်းၼၼ်ႉဝႃႈ “ ပၢင်ပွႆးမၢႆတွင်း ပိုၼ်းၸုမ်း လူင်းလၢႆး မိုဝ်း NCA ၶွပ်ႈတဵမ် 4 ပီ ပွၵ်ႈၼႆႉ ယူႇတီႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း လူင်းလၢႆးမိုဝ်း ၵိုတ်းတိုၵ်းပတ်းတူဝ်ႈမိူင်း NCA 10 ၸုမ်း ဢၼ်လႆႈမႃးၶဝ်ႈႁူမ်ႈ တင်းမူတ်း 9 ၸုမ်း။ ၵူၺ်းၵႃႈ တွၼ်ႈတႃႇ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်း ၸိုင်ႈတႆး RCSS/SSA ဢမ်ႇလႆႈမႃးၶိုၼ်ႈႁွတ်ႈၸွမ်းၼႆႉ ပဵၼ်ဢၼ်ၸႂ်ဢမ်ႇလီၸွမ်းတႄႉတႄႉ”ဝႃႈၼႆ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 24/10/2019 ၼၼ်ႉ ၸွမ်သိုၵ်းလူင် ယွတ်ႈသိုၵ်း တင်း တူဝ်တႅၼ်း RCSS ၵမ်ႈၽွင်ႈ လုၵ်ႉ ငဝ်ႈၸိုင်ႈလွႆတႆးလႅင်းသေ ဢွၵ်ႇၶၢဝ်း တၢင်း ထိုင်မႄႈႁွင်ႈသွၼ် ၸိုင်ႈထႆး လႅၼ်လိၼ် တႆး – ထႆး ဢၢၼ်းသိုပ်ႇၶၢဝ်းတၢင်း ဝၼ်းတီႈ 25 ယၢမ်းၵၢင်ၼႂ် 6 မူင်း တေလုၵ်ႉဢွၵ်ႇၵႂႃႇၶၢမ်ႈလၢၼ်ႇ တီႈဝၢၼ်ႈၼႃးမူၼ်း သေမိူဝ်းၵႂႃႇတၢင်း ႁူဝ်မိူင်း – လၢင်း ၶိူဝ်း – မိူင်းၼၢႆး – ၼမ်ႉၸၢင် – လွႆလႅမ် – မိူင်းပွၼ် – ႁူဝ်ပူင်း – တူၼ်ႈတီး။

လွင်ႈၼႆႉ ၾၢႆႇသိုၵ်းမၢၼ်ႈ ႁဵတ်းပၢင်သပ်းၸႅင်ႈၶၢဝ်ႇၵႂႃႇ ဝႃႈ – ယွၼ်ႉၶၢဝ်းတၢင်း ဢမ်ႇမီးလွင်ႈႁူမ်ႇလူမ်ႈလႄႈ ႁၢင်ႈႁႅၼ်း ပၼ် တၢင်းတႃႈၶီႈလဵၵ်း – ဝႃႈၼႆ။

ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ RCSS/SSA ၸတ်းပၢင်သပ်းၸႅင်ႈၶၢဝ်ႇသေ ပိုတ်ႇလၢတ်ႈဝႃႈ ယွၼ်ႉၽူႈၵွၼ်း တိူင်း သိုၵ်းၶူဝ်လမ် ၵိတ်ႇၶႂၢင်ၶၢဝ်းတၢင်း ဢၼ်ဢၢၼ်းၵႂႃႇၼေႇပျီႇတေႃႇ တႃႇႁူပ်ႉ ၽူႈၵိူဝ်းၵုမ်ဝၢၼ်ႈမိူင်း တေႃႇဢွင်ႇသၢၼ်း သုၵျီႇ ၊ ၽူႈၵွၼ်းသိုၵ်းသုင်သုတ်း မိၼ်းဢွင်ႇလၢႆႇ ပိူဝ်ႈတႃႇၵႄႈလိတ်ႈပၼ်ႁႃ ဢၼ်ၶွင်ႉၶမ်ယူႇၸိူဝ်းၼႆႉ ဢမ်ႇပဵၼ်ယဝ်ႉ လႄႈ မိူၼ်ႁိူဝ်းလူင်ငမ်းယဵၼ်လူမ်ႉၸူမ်ၵႂႃႇၵၢင်ၽွင်းယဝ်ႉ ဝႃႈၼႆ။

ၸွမ်သိုၵ်းလူင် ယွတ်ႈသိုၵ်း လၢတ်ႈဝႃႈ “ လွင်ႈၼႆႉ သိုၵ်းမၢၼ်ႈ ၵႄႈတူဝ် ပၼ်ၶေႃႈမုလ်းၽိတ်းၵူၺ်း။ သဵၼ်ႈတၢင်းၼၼ်ႉ တင်းၸုမ်း PNLO ၵေႃႈဢမ်ႇမီးပၼ်ႁႃသင်။ သင်ဝႃႈ တေၵႂႃႇတၢင်း မႄႈသၢႆသေ ၶၢမ်ႈၵႂႃႇတၢင်း တႃႇၶီႈလဵၵ်းၸိုင် ႁဝ်းၶႃႈ တေလႆႈၸႅင်ႈၶိုၼ်းတီႈ ၸဝ်ႈၼႃႈတီႈထႆးၶဝ် လူင်ႈၼႃႈ 3-5 ဝၼ်းၵွၼ်ႇ ၊ ယုမ်ႇယမ်ဝႃႈ တေဢမ်ႇၶိုတ်း တႃႇၶိုၼ်ႈ ပၢင်ပွႆး လႆႈၼႆလႄႈ ၸင်ႇလႆႈတႅပ်းတတ်း ဢမ်ႇၵႂႃႇၶိုၼ်ႈႁွတ်ႈယဝ်ႉ” ဝႃႈၼႆ။

ပၢင်ပွႆးမၢႆတွင်း NCA ၶွပ်ႈတဵမ် 4 ပီ မိူဝ်ႈၼႆႉ တေႃႇဢွင်ႇသၢၼ်းသုၵျီႇ ၽူႈၵိူဝ်းၵုမ်ၸိုင်ႈမိူင်း မွၵ်ႇလၢတ်ႈၶေႃႈၵႂၢမ်း၊ မိၼ်း ဢွင်ႇလႅင်ႇ ၽူႈၵွၼ်းသိုၵ်းသုင်သုတ်း မွၵ်ႇလၢတ်ႈၶေႃႈၵႂၢမ်းလႄႈ မူႇတူးသေးၽူဝ်း တၢင်တူဝ်ၸုမ်း EAO မွၵ်ႇလၢတ်ႈ ၶေႃႈၵႂၢမ်း။ လိူဝ်ၼၼ်ႉ တီႈၼႂ်းပၢင်ပွႆးၼႆႉ ၸုမ်းယိပ်းၵွင်ႈၵၢင်ႇ ပႆႇလူင်းလၢႆးမိုဝ်း NCA ၵေႃႈ မွၵ်ႇမႃးၶဝ်ႈႁူမ်ႈၸွမ်း။ ဝၢႆးပၢင် ၵႅဝ်ႈယဝ်ႉ ႁူမ်ႈၵၼ် ထၢႆႇၶႅပ်းႁၢင်ႈမၢႆတွင်းၵႂႃႇ ဝႃႈၼႆ။

မိူဝ်ႈၼႆႉ ယၢမ်းႁူဝ်ၶမ်ႈ 6 မူင်း မီးပၢင်ၵိၼ်ၶဝ်ႈႁူမ်ႈမူႇၵၼ် ဝႃႈၼႆ။

ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း 10 ၸုမ်း ဢၼ်လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA ၼႆႉ တႄႇလူင်း လၢႆး မိုဝ်းမႃး မိူဝ်ႈပီ 2015 လိူၼ်ဢွၵ်ႊထူဝ်ႊပိူဝ်ႊ 15 ဝၼ်း။ ၼႂ်း 8 ၸုမ်းၼၼ်ႉ မိူၼ်ၼင်ႇ မိူၼ်ၼင်ႇ ၶွင်ႇသီႇဢဝ်ၶိုၼ်းၸိုင်ႈ တႆး/ တပ်ႉသိုၵ်းၸိုင်ႈတႆး (RCSS/SSA)၊ ၸုမ်း ပူတ်း ပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်း ႁူမ်ႈၸိူဝ်ႉၸၢတ်ႈ ၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်း မိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈ တုမ်ၸိူဝ်ႉၸၢတ်ႈယၢင်းၽိူၵ်ႇ (KNU)၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA)၊ တပ်ႉသိုၵ်းပူတ်းပွႆႇၸိူဝ်ႉ ၸၢတ်ႈယၢင်း-ၶွင်ႇသီႇငမ်းယဵၼ် (KNLA-PC) လႄႈ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ (ALP)၊ ႁူမ်ႈတုမ်ၸိူဝ်ႉၸၢတ်ႈလႃးႁူႇ LDU လႄႈ ပႃႇတီႇမိူင်းမွၼ်းမႂ်ႇ NMSP ။