ပႃႇတီႇႁူဝ်သိူဝ် SNLD ၸတ်းႁဵတ်းပၢင်ပွႆး ဝၼ်းၵိူတ်ႇ တီႈၸႄႈဝဵင်းၼမ်ႉၶမ်း ဢၼ်ၶွတ်ႇၽွတ်ႈ တင်ႈပႃႇတီႇ ၸဵမ်မိူဝ်ႈပီ 1988 တေႃႇထိုင် ပီ 2019 မီးမႃး 31 ပီ။
ဝၼ်းတီႈ 26/10/2019 ယၢမ်းၵၢင်ၼႂ်း 9 မူင်း ပႃႇတီႇႁူဝ်သိူဝ် ၸႄႈဝဵင်းၼမ်ႉၶမ်း ႁပ်ႉပဵၼ်ၸဝ်ႈႁိူၼ်းသေ ၸတ်းႁဵတ်း ပၢင် ပွႆးဝၼ်းၵိူတ်ႇ ငဝ်းငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် SNLD ၶွပ်ႈတဵမ် 31 ပီ တီႈ ႁူင်းတႅၼ်ႊမၢဝ်းၶမ်း ပွၵ်ႉတႅၼ်ႊမႃႉ ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။
လုင်းသြႃႇယီႈပူး ၵႅမ်ႁူဝ်ပဝ်ႈ 2 ပႃႇတီႇႁူဝ်သိူဝ် ၸႄႈဝဵင်းၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ပွႆးၶွပ်ႈတဵမ် 31 ပီ ႁဝ်း ယဝ်ႉတူဝ်ႈၵႂႃႇလီငၢမ်းယဝ်ႉ ယိၼ်းၸူမ်းယႂ်ႇၼမ်ထိုင် ၸုမ်းပွင်ၵၢၼ်ငဝ်ႈငုၼ်းႁူဝ်သိူဝ် ၵူႈၵေႃႉ၊ ပေႃႈမႄႈၵူၼ်းဝၢၼ်ႈၵူၼ်း မိူင်းတီႈၵႆတီႈၸမ် ဢၼ်လႆႈႁဵတ်းပဵၼ်ၸဝ်ႈတႃႇၼၵူႈလွင်ႈလွင်ႈ၊ ၸုမ်းတူမ်ႈႁုင်ၶဝ်ႈၽၵ်း၊ တပ်ႉသိုၵ်းၵူၼ်းမိူင်း ၸုမ်းပွင် ၵၢၼ်ၼႃႈဝၢၼ်ႈ ဢၼ်ပၼ်ဢွင်ႈၶႅၵ်ႇတီႈၵိၼ်တီႈၼွၼ်း ၸဵမ်ၸိူဝ်းၼႆႉ” ဝႃႈၼႆ။
ပွႆးဝၼ်းၵိူတ်ႇပႃႇတီႇႁူဝ်သိူဝ် ၶွပ်ႈတဵမ် 31 ပီ ဢၼ်ၸတ်းႁဵတ်းၵႂႃႇတီႈၸႄႈဝဵင်းၼမ်ႉၶမ်းၼႆႉ ၸၢႆးၶမ်းပိူင်ႇၾႃႉ ၵႅမ်ႁူဝ်ပဝ်ႈ 2 ငဝ်ႈငုၼ်းပႃႇတီႇႁူဝ်သိူဝ်၊ လုင်းသိူဝ်ယွမ် ႁူဝ်ပဝ်ႈပႃႇတီႇႁူဝ်သိူဝ် ၸိုင်ႈတႆးပွတ်းႁွင်ႇ၊ လုင်းသြႃႇယီႈ ႁူဝ်ပဝ်ႈ ပႃႇတီႇႁူဝ် သိူဝ် ၸႄႈဝဵင်းၼမ်ႉၶမ်း မွၵ်ႇလၢတ်ႈၶေႃႈၵႂၢမ်း။ လိူဝ်ၼၼ်ႉ ၸၢႆးလဵၵ်ႉ ၽူႈၼမ်းၼႂ်း ၵူႈလွင်ႈလွင်ႈ တၢင်တူဝ်ငဝ်ႈငုၼ်း ပႃႇ တီႇႁူဝ်သိူဝ်သေ လူၼႄလိၵ်ႈ ဢၼ်ႁူဝ်ပဝ်ႈလူင် ၶုၼ်ထုၼ်းဢူး ယိုၼ်ႈမႃးၼၼ်ႉ ဝႃႈၼႆ။
လိူဝ်ၼၼ်ႉ ၸတ်းႁဵတ်းပႃးပၢင်ဢုပ်ႇၶႆႈ/ တၢၼ်ႈၶႆႈ ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းသႅၼ်ဝီ တင်း ၼၢင်း ၶိၼ်ႇထႃးယီႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းသႅၼ်ဝီ မွၵ်ႇလၢတ်ႈ ၵၢၼ်ငၢၼ်းဢၼ်လႆႈတူင်ႉ ၼိုင်လွင်ႈၸွႆႈထႅမ်ပေႃႈမႄႈၵူၼ်းမိူင်းလႄႈ လွင်ႈတၢင်ႇလၢတ်ႈၼႂ်းသၽႃး။ ၸၢႆးလဵၵ်ႉ ၽူႈၼမ်းၼႂ်း ၵူႈလွင်ႈလွင်ႈ ငဝ်ႈငုၼ်း ပႃႇတီႇႁူဝ်သိူဝ်သမ်ႉ ဢုပ်ႇၶႆႈသပ်းသႅင်းၼႄ ၵဵဝ်ႇၵပ်းလွင်ႈၵၢၼ်မိူင်း၊ လွင်ႈၵၢၼ်ပႃႇတီႇလႄႈ ငဝ်းလၢႆးပၢင်လိူၵ်ႈတင်ႈ တီႈ ၼမ်ႉၶမ်း မိူဝ်ႈၼႂ်းပီ 2015 ။ ၸၢႆးၵျေႃႇၺုၼ်ႉ ၵႅမ်ၽူႈၼမ်းၼႂ်း 1 ဢုပ်ႇၶႆႈသပ်းလႅင်းၼႄ ၵဵဝ်ႇၵပ်းလွင်ႈတူဝ်ထူပ်းၼႂ်းပၢင် ၵုမ်ၵၢၼ်မိူင်း ၶၵ်ႉၵၢၼ်လွင်ႈငမ်းယဵၼ် NCA ဝႃႈၼႆ။
ၼႂ်းပၢင်ပွႆးၼႆႉ မီးပႃးပၢင်မူၼ်ႈသိူဝ်းႁွင်ႉၽဵင်းၵႂၢမ်း၊ တၢင်းၵႃႈ ၼူၵ်ႉ/ တူဝ်း တၢင်းၵႃႈမႄႈႁိူၼ်းၼုမ်ႇလႄႈ ၸၢႆး/ ယိင်း ႁွင်ႉ ၽဵင်းၵႂၢမ်း မိူၼ်ၼင်ႇ ၸၢႆးလိူၼ်ၶမ်း၊ ၸၢႆဢူးလၢႆး၊ ၸၢႆးၽွမ်ႉမၢဝ်း ၸိူဝ်းၼႆႉ မီးၽူႈၶဝ်ႈႁူမ်ႈ ပၢင်ပွႆး တင်းမူတ်း 3,000 ပၢႆ။
ၸတ်းႁဵတ်းပႃး ပၢင်လဵၼ်ႈမၢၵ်ႇၼင် မီးၸုမ်းၵူၼ်းၼုမ်ႇပႃႇတီႇႁူဝ်သိူဝ် ၸႄႈဝဵင်းၼမ်ႉၶမ်း၊ မူႇၸေႊ၊ သႅၼ် ဝီ၊ လႃႈသဵဝ်ႈ၊ တီးမႃႉ၊ TYN၊ ဝၢၼ်ႈႁႆး၊ မိူင်းၵၢဝ် ၸိူဝ်းၼႆႉ ၶႅင်ႇၵၼ် တင်ႈတႄႇဝၼ်းတီႈ 23 – 25/10/2019 ဝႃႈၼႆ။
ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး SNLD – Shan Nationalities League for Democracy ရှမ်းတိုင်းရင်းသားများ ဒီမို ကရေစီအဖွဲ့ချုပ် (SNLD) ၼႆႉ ၶွတ်ႇၽွတ်ႈမႃးမိူဝ်ႈဝၼ်းတီႈ 26/10/1988။ ယၢမ်းလဵဝ် ႁူဝ်ပဝ်ႈပဵၼ်ၸဝ်ႈၶုၼ်ထုၼ်းဢူး၊ ၵႅမ်ႁူဝ်ပဝ်ႈ 1 ၸၢႆးၺုၼ်ႉလုၼ်ႇ(ၸၢႆးၼုတ်း)၊ ၵႅမ်ႁူဝ်ပဝ်ႈမၢႆ 2 ၸဝ်ႈၶမ်းပိူင်ႇၾႃႉ၊ ၽူႈၼမ်းၼႂ်းၵူႈလွင်ႈလွင်ႈၸၢႆးလဵၵ်ႉ၊ ၽူႈ ၼမ်းၼႂ်း 1 ၸၢႆးၵျေႃႇၺုၼ်ႉလႄႈ ၽူႈၼမ်းၼႂ်း 2 ၸၢႆးသၢမ်ၽူၼ်သႅင် ၸိူဝ်းၼႆႉ။
