တႃႇတေပဵၼ်ပၢင်ၵုမ် JICM ပွၵ်ႈၵမ်း 8 ၼၼ်ႉ ယူႇတီႈတူဝ်တႅၼ်းလူင်ပွင်ၸိုင်ႈမၢၼ်ႈတင်း တူဝ်တႅၼ်း ၸုမ်းယိပ်း ၵွင်ႈၵၢင်ႇၸၢဝ်းၶိူဝ်း EAO ႁူပ်ႉဢုပ်ႇၵၼ် တီႈၼေႇပျီႇတေႃႇ။

ဝၼ်းတီႈ 25/10/2019 ယၢမ်းၵၢင်ၼႂ် 10 မူင်း တူဝ်တႅၼ်းလူင်ပွင်ၸိုင်ႈမၢၼ်ႈ တင်း တူဝ်တႅၼ်းၸုမ်းယိပ်းၵွင်ႈ ၵၢင်ႇ EAO 10 ၸုမ်း ႁူပ်ႉဢုပ်ႇၵၼ်လူင်ႈၼႃႈ တႃႇပၢင်ၵုမ် JICM တီႈႁူင်းႁေႃ ပၢင်ၵုမ် သုၼ်ၵၢင်မႄးလီ ၼႂ်းၸိူဝ်ႉၸၢတ်ႈ NRPC ၼေႇပျီႇတေႃႇ။ ၾၢႆႇတူဝ်တႅၼ်း လူင်ပွင်ၸိုင်ႈမၢၼ်ႈသမ်ႉ ဢူးထုၼ်းထုၼ်းဢူး ၵႅမ်ႁူဝ်ပဝ်ႈ NRPC ဢွၼ်ႁူဝ်ၶဝ်ႈ ႁူမ်ႈ။ ၾၢႆႇတူဝ်တႅၼ်း EAO သမ်ႉ ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်းမၢႆ 2 RCSS/SSA ဢွၼ်ႁူဝ်ၶဝ်ႈႁူမ်ႈ တူဝ်တႅၼ်း ၼိုင်ႈၾၢႆႇလႂ် 9 ၵေႃႉ။

ၾၢႆႇ EAO မွၵ်ႇလၢတ်ႈဝႃႈ “ ပၢင်ၵုမ် JICM ဢၼ်ဢမ်ႇလႆႈၸတ်းႁဵတ်းမႃးၼႆႉ မီးၶၢဝ်းတၢင်း ပီပၢႆယဝ်ႉ မၼ်းတုမ်ႉတိူဝ်ႉၶၵ်ႉ ၵၢၼ် လွင်ႈငမ်းယဵၼ်တႄႉတႄႉဝႃႈဝႃႈၶႃႈယဝ်ႉ။ ယွၼ်ႉဝႃႈ တၢင်းသွင်ၾၢႆႇ လူင်းလၢႆးမိုဝ်း NCA ၼင်ႇၵၼ်လႄႈ တိုၼ်း လူဝ်ႇႁဵတ်းသၢင်ႈၸွမ်းၼင်ႇ NCA ဢၼ်ၼႄဝႆႉၼၼ်ႉ” ဝႃႈၼႆ။

ၾၢႆႇလူင်ပွင်ၸိုင်ႈမၢၼ်ႈသမ်ႉ လၢတ်ႈဝႃႈ “ မိူဝ်ႈပၢင်ၵုမ် ပၢင်လူင် ပွၵ်ႈၵမ်း 3 ယဝ်ႉၵႂႃႇ ၼၼ်ႉ  တူဝ်တႅၼ်းလူင်ပွင်ၸိုင်ႈ မၢၼ်ႈ တင်း RCSS, KNU, CNF, ALP လႄႈ NCAs-EAO ႁူပ်ႉဢုပ်ႇၵၼ်ၼွၵ်ႈလႅၵ်ႈ။ လႆႈဢုပ်ႇဢူဝ်းမၵ်းမၼ်ႈၵၼ်ၵႂႃႇ 4 ၶေႃႈ။ ႁႂ်ႈလႆႈၸတ်းႁဵတ်း ပၢင်မၢႆတွင်း NCA 4 ပီလႄႈ   ပၢင်ၵုမ် JICM ပွၵ်ႈၵမ်း 8 ၽႂ်း ၽႂ်း ၸိူဝ်းၼႆႉ” ဝႃႈၼႆ။

ပၢင်ၵုမ် JICM ဢၼ်လႆႈၸတ်းႁဵတ်းမႃး တင်းမူတ်း 7 ပွၵ်ႈၼၼ်ႉ – မိူဝ်ႈပွၵ်ႈၵမ်း 1 ၸတ်းႁဵတ်းၼႂ်းဝၼ်းတီႈ 15-17/10/ 2015 ။ ပွၵ်ႈၵမ်း 2 ဝၼ်းတီႈ 17-18/11/2015 ။ ပွၵ်ႈၵမ်း 3 ဝၼ်းတီႈ 16/12/2015 ။ ပွၵ်ႈၵမ်း 4 ဝၼ်းတီႈ 24/8/2016 ။ ပွၵ်ႈ ၵမ်း 5 ဝၼ်းတီႈ 24/4/2017 ။ ပွၵ်ႈၵမ်း 6 ဝၼ်းတီႈ 27/11/2017 လႄႈ ပွၵ်ႈၵမ်း 7 ဝၼ်းတီႈ 28/2/2018 ဝႃႈၼႆ။

ပၢင်ၵုမ် ဢုပ်ႇဢူဝ်းလူင်းၼႃႈ JICM ဢၼ်တေၸတ်းႁဵတ်း ပွၵ်ႈၵမ်း 8 ၼႆႉ တၢင်းၾၢႆႇ EAO သမ်ႉ ၸဝ်ႈသိုၵ်းလူင် ၸၢႆး ငိုၼ်း၊ ၶုၼ်ႇမိၼ်ႉထုၼ်း၊ ၼၢႆႇဢွင်ႇမငေး၊ ၸဝ်ႈသိုၵ်းလူင် ၸေႃးလမူၼ်ႇ၊ ၸဝ်ႈသိုၵ်းလူင် ၸေႃးၵျေႃႇၺုၼ်ႉ၊ ၸဝ်ႈသိုၵ်း လူင် ၸေႃးၸဵင်ႇဝိၼ်း၊ Dr. သလၢႆးလႅင်ႇမူင်းသၶွင်း၊ ၸေႃးမျႃႉရႃၸႃလိၼ်းလႄႈ ယႄးပေႃႇမဵဝ်းဝိၼ်း ၸိူဝ်းၼႆႉ။

တၢင်းၾၢႆႇ လူင်ပွင်ၸိုင်ႈမၢၼ်ႈသမ်ႉ ဢူးထုၼ်းထုၼ်းဢူး၊ ၸွမ်သိုၵ်း ယႃႇပေႉ၊ ၸွမ်သိုၵ်းမိၼ်းၼွင်ႇ၊ ၸွမ်သိုၵ်း တိၼ်ႇ မွင်ႇဝိၼ်း၊ ဢူးၶိၼ်ႇမွင်ႇတိၼ်ႇ၊ ဢူးထေးဝိၼ်းဢွင်ႇ၊ ဢူးလႃႉမွင်ႇသူၺ်ႇ၊ ဢူးမဵဝ်းၸေႃႇဢူးလႄႈ ဢူးၸေႃႇထေး ၸိူဝ်းၼႆႉ။