RCSS/SSA ဢွၵ်ႇၶေႃႈပိုၼ်ၽၢဝ်ႇဝႃႈ ၸွမ်သိုၵ်းလူင် ယွတ်ႈသိုၵ်း ဢွၵ်ႇၶၢဝ်းတၢင်း ၵႂႃႇၸူးဝဵင်းလူင်တူၼ်ႈတီး တႃႇၵႂႃႇၶဝ်ႈ ႁူမ်ႈပၢင်ပွႆးမၢႆတွင်း ၵၢၼ်လူင်းလၢႆးမိုဝ်းၵိုတ်းတိုၵ်းတူဝ်ႈမိူင်း NCA ၶွပ်ႈတဵမ် 4 ပီ။
ဝၼ်းတီႈ 24/10/2019 ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ဢွၵ်ႇၶေႃႈပိုၼ်ၽၢဝ်ႇဝႃႈ ၸွမ် သိုၵ်းလူင် ယွတ်ႈသိုၵ်း ဢၼ်ဢဝ်ပုၼ်ႈၽွၼ်း ႁူဝ်ပဝ်ႈၸူဝ်ႈၶၢဝ်း ၼႂ်းၸုမ်းဢွၼ် ႁူဝ် PPST ၸုမ်းလူင်းလၢႆးမိုဝ်း NCA 10 ၸုမ်းဝႆႉၼၼ်ႉ တေၵႂႃႇၶဝ်ႈႁူမ်ႈပၢင်ပွႆးမၢႆတွင်း NCA ၶွပ်ႈတဵမ် 4 ပီ တီႈၼေႇပျီႇတေႃႇ ဝႃႈၼႆ။
ပၢင်ပွႆးမၢႆတွင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလူင်းလၢႆးမိုဝ်း ၵိုတ်းတိုၵ်းပတ်ႉပိုၼ်ႉတူဝ်ႈမိူင်း NCA ၶွပ်ႈတဵမ် 4 ပီၼၼ်ႉ တေ ၸတ်းႁဵတ်း ၼႂ်းဝၼ်းတီႈ 28/10/2019 တီႈၼေႇပျီႇတေႃႇ ယၢမ်းဝၢႆးဝၼ်း 2 မူင်း။ လိူဝ်ၼၼ်ႉ ယၢမ်းႁူဝ်ၶမ်ႈ 6 မူင်း တေ ၵိၼ်ၶဝ်ႈႁူမ်ႈမူႇၵၼ်၊ ဝၢႆးၼၼ်ႉထႅင်ႈတႄႉ မီးၽႅၼ်ၵၢၼ်ၶဝ်ႈႁူမ်ႈပၢင်ၵုမ် JICM ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇ ဢွၵ်ႇဝႆႉဝႃႈ “ၶၢဝ်းတၢင်း ၸွမ်သိုၵ်းလူင် ယွတ်ႈသိုၵ်း ၼႂ်းမိူင်းပွၵ်ႈၵမ်းၼႆႉ ဝၼ်းတီႈ 25 တေႁွတ်ႈၽႅဝ် ဝဵင်းလူင်တူၼ်ႈတီး။ လိူဝ်ၼၼ်ႉ တေသိုပ်ႇၶၢဝ်းတၢင်းၵႂႃႇထႅင်ႈ တီႈၼေႇပျီႇတေႃႇ။ လိူဝ်ၼၼ်ႉ ၵဵဝ်ႇၵပ်းလူၺ်ႈၵၢၼ်မိူင်း၊ ၵၢၼ်ငမ်းယဵၼ်လႄႈ တႃႇၵေႃႇသၢင်ႈမိူင်းႁူမ်ႈတုမ်ၾႅတ်ႊၻရႄႊၸိူဝ်းၼၼ်ႉ ၸွမ်သိုၵ်းလူင် ယွတ်ႈသိုၵ်း မီးၽႅၼ်တေႁူပ်ႉ ထူပ်း ၽူႈၼမ်းၸိုင်ႈမိူင်း၊ ၽူႈမီးပုၼ်ႈၽွၼ်းတၢင်ႇၸဝ်ႈလႄႈ ဢိၵ်ႇပႃး တၢင်ႇမူႇတၢင်ႇၸုမ်း ၸိူဝ်းၼႆႉၵႂႃႇ” ဝႃႈၼႆ။
ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း 10 ၸုမ်း ဢၼ်လူင်းလၢႆးမိုဝ်း ၵိုတ်းတိုၵ်းပတ်ႉပိုၼ်ႉတူဝ်ႈမိူင်း NCA ၼႆႉ တႄႇလူင်း လၢႆး မိုဝ်းမႃး မိူဝ်ႈပီ 2015 လိူၼ်ဢွၵ်ႊထူဝ်ႊပိူဝ်ႊ 15 ဝၼ်း။ ၼႂ်း 8 ၸုမ်းၼၼ်ႉ မိူၼ်ၼင်ႇ မိူၼ်ၼင်ႇ ၶွင်ႇသီႇဢဝ်ၶိုၼ်းၸိုင်ႈ တႆး/ တပ်ႉသိုၵ်းၸိုင်ႈတႆး (RCSS/SSA)၊ ၸုမ်း ပူတ်း ပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်း ႁူမ်ႈၸိူဝ်ႉၸၢတ်ႈ ၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်း မိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈ တုမ်ၸိူဝ်ႉၸၢတ်ႈယၢင်းၽိူၵ်ႇ (KNU)၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA)၊ တပ်ႉသိုၵ်းပူတ်းပွႆႇၸိူဝ်ႉ ၸၢတ်ႈယၢင်း-ၶွင်ႇသီႇငမ်းယဵၼ် (KNLA-PC) လႄႈ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ (ALP)၊ ႁူမ်ႈတုမ်ၸိူဝ်ႉၸၢတ်ႈလႃးႁူႇ LDU လႄႈ ပႃႇတီႇမိူင်းမွၼ်းမႂ်ႇ NMSP ။
