ႁႅင်းၵၢၼ်တႆး 3 ၵေႃႉ ပေႃႈမႄႈလုၵ်ႈ ဢၼ်ၺႃးၶႃႈႁႅမ်တၢႆ တီႈဢိူင်ႇမိူင်းၼႃႉ ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ ၸိုင်ႈ ထႆးၼၼ်ႉ ထိုင်ယၢမ်းလဵဝ် ၸဝ်ႈၼႃႈတီႈပလိၵ်ႈထႆးယင်း ပႆႇတီႉလႆႈ တူဝ်ၵူၼ်းႁၢႆႉ။
ပေႃးထိုင်မႃး ဝၼ်းတီႈ 26/10/2019 ယၢမ်းဝၢႆးဝၼ်း မွၵ်ႈ 1 မူင်းၸိုင် ယူႇတီႈၸိူဝ်ႉၶိူဝ်းပီႈၼွင်ႉ တေဢဝ်ၶၢပ်ႈတူဝ်ၶဝ် 3 ၵေႃႉ ပေႃႈမႄႈလုၵ်ႈၶဝ်ႈႁဵဝ်ႈ တီႈပႃႇႁဵဝ်ႈသၼ်ႇတီႇထမ်း တေႃႈလဵဝ်ၶၢပ်ႈတူဝ်ၶဝ် ဢဝ်မႃးဝႆႉ တီႈ ဝတ်ႉၵူႇတဝ်ႈ ဢိူင်ႇသီ ၽုမ်း ၸႄႈဝဵင်းၵဵင်းမႆႇ။
ၸၢႆးတႆးထိူၼ်ႇ ၽူႈၸွႆႈထႅမ် ႁႅင်းၵၢၼ်ယၢၼ်မိူင်း ၼႂ်းၸႄႈဝဵင်းၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး လႆႈၵႂႃႇႁပ်ႉဢဝ် တူဝ်တၢႆၶဝ် 3 ၵေႃႉပေႃႈမႄႈလုၵ်ႈ မႃးဝႆႉတီႈဝတ်ႉၵူႇတဝ်ႈသေ မိူဝ်ႈၽုၵ်ႈၼႆႉ တေပူၼ်ႉၶၢပ်ႈတူဝ်ၶဝ်ၶႃႈယဝ်ႉ။ ၵဵဝ်ႇၵပ်း ၵၢၼ်တၢႆၶဝ်ၼႆႉ တေႃႈထိုင်ယၢမ်းလဵဝ် ပႆႇတီႉလႆႈတူဝ်ၵူၼ်းႁၢႆႉၶႃႈ။ ၸဝ်ႈၼႃႈတီႈပလိၵ်ႈၶဝ် တိုၵ်ႉႁဵတ်းၵၢၼ်၊ လမ်းၶႆႈ ငိူၼ်ႈၵူၼ်းႁၢႆႉၼၼ်ႉယူႇ”ဝႃႈၼႆ။
မိူဝ်ႈဝၼ်းတီႈ 22/10/2019 ယၢမ်းၵၢင်ၼႂ်ၼၼ်ႉ ၸဝ်ႈၼႃႈတီႈပလိၵ်ႈထႆးၶဝ် လႆႈႁပ်ႉၸႅင်ႈၶၢဝ်ႇၶဝ်ႈၸူးသေ လႆႈလူင်းၵႂႃႇ ၵူတ်ႇထတ်း တီႈႁိူၼ်းလင်ၼိုင်ႈ ဝၢၼ်ႈႁူၺ်ႈၸူဝ်ႉ ဢိူင်ႇမိူင်းၼႃႉ ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ ၸိုင်ႈထႆး။ ထူပ်း ႁၼ် ႁႅင်းၵၢၼ်တႆး 3 ၵေႃႉ ပေႃႈမႄႈလုၵ်ႈ ၼွၼ်းလူမ်ႉတၢႆဝႆႉၼႂ်းႁိူၼ်း ဝႃႈၼႆ။
ၸၢႆးတႆးထိူၼ်ႇ လၢတ်ႈဝႃႈ “ ၸၢႆးယႃႇၸိင်ႇၼၼ်ႉ ၺႃးၾၼ်းၸွမ်းၵွၵ်းႁူဝ်လႄႈ ပၢတ်ႇၶေႃး၊ ၼၢင်းဢွၼ်ႇသမ်ႉ ၺႃးၾၼ်း ၸွမ်းမိုဝ်း၊ ၸွမ်းၼႃႈ။ လုၵ်ႈယိင်းၶဝ်သမ်ႉ မိူၼ်ၺႃးၶွၼ်ႉပေႃႉသႂ်ႇတီႈၵွင်ႇၵေႃႈ ႁၼ်ႁွႆးဝႆႉၸိူင်ႉၼၼ် လႆႈပိုတ်ႇတူၺ်းတီႈ ႁူင်းယႃသူၼ်ၻွၵ်ႇ ၵွၼ်ႇတေဢဝ်မႃးဝႆႉတီႈဝတ်ႉၵူႇတဝ်ႈၼၼ်ႉၶႃႈ” ဝႃႈၼႆ။
ႁႅင်းၵၢၼ်တႆး 3 ၵေႃႉ ပေႃႈမႄႈလုၵ်ႈ ဢၼ်ၺႃးၶႃႈႁႅမ်တၢႆၼၼ်ႉ ၸၢႆးယႃႇၸိင်ႇ ဢႃယု 46 ပီ ပဵၼ်လုၵ်ႈၸၢႆး လုင်းလူႇ – ပႃႈ ပဵင်း ၵူၼ်းၸႃတိ ဝၢၼ်ႈလွႆလဝ်း ဢိူင်ႇလွႆယႆး ၸႄႈဝဵင်းၼမ်ႉၸၢင်။ ၼၢင်းဢွၼ်ႇ ဢႃယု 55 ပီ ပဵၼ်လုၵ်ႈယိင်း လုင်းသၢင်ႇ ၵၢၼ်း – ပႃႈထွၼ်း ၵူၼ်းၸႃတိ တိုဝ်ႉလႅင်/ ႁၢႆးသႅင် ၸႄႈဝဵင်းလၢႆးၶႃႈ ၶၢႆႉမႃးယူႇတီႈဝၢၼ်ႈၵုင်းမူင်ႈ ၸႄႈဝဵင်းၼမ်ႉၸၢင် ဝႃႈ ၼႆ။
ၸၢႆးယႃႇၸိင်ႇလႄႈ ၼၢင်းဢွၼ်ႇၼႆႉ ၶဝ်ႈမႃးႁဵတ်းၵၢၼ်တီႈၼႂ်းမိူင်းထႆး မီးၶၢဝ်းတၢင်း မွၵ်ႈ 20 ပီပၢႆယဝ်ႉ။ ၵွၼ်ႇပႆႇ ၺႃး ၶႃႈႁႅမ်တၢႆၼၼ်ႉ ၶဝ် 3 ၵေႃႉ ပေႃႈမႄႈလုၵ်ႈႁဵတ်းၵၢၼ်သူၼ် ဝႃႈၼႆ။
“ မိူဝ်ႈပူၼ်ႉမႃး ၶၢဝ်းတၢင်း 8 ပီၼၼ်ႉ လႆႈငိၼ်းပီႈၼွင်ႉၶဝ်လၢတ်ႈၼႄဝႃႈ ၶဝ်မီးၶမ်း 1 ၶၼ်ပၢႆ (မွၵ်ႈ 10 ဝၢတ်ႇပၢႆ)။ လင် 8 ပီမႃးၼႆႉ မီးထႅင်ႈၵႃႈႁိုဝ် ဢၼ်ဝႃႈၼၼ်ႉ ဢမ်ႇႁူႉလႆႈၶႃႈ” ၸၢႆးတႆးထိူၼ်ႇလၢတ်ႈၼႄၼင်ႇၼႆ။
ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ ၸိုင်ႈထႆးၼၼ်ႉ မီးတေႃႇၼႃႈၵၼ်တင်းၸႄႈဝဵင်းမိူင်းတူၼ် ၸႄႈတွၼ်ႈမိူင်း သၢတ်ႇ ၸိုင်ႈတႆးပွတ်းဢွၵ်ႇၶူင်း။
