ၵူၼ်းပၢႆႈၽေးသိုၵ်း ၽူႈၸၢႆးၵေႃႉၼိုင်ႈ ဢႃယု 26 ပီ ယူႇတီႈပၢင်သဝ်းၵူၼ်းပၢႆႈၽေးသိုၵ်း ပၢင်ၵူႇ ၸႄႈဝဵင်း ၵူတ်ႉၶၢႆ ယဵပ်ႇၺႃးမၢၵ်ႇမႅင်း။
ဝၼ်းတီႈ 23/10/2019 ယၢမ်းဝၢႆးဝၼ်းမွၵ်ႈ 1 မူင်းၼၼ်ႉ ဢၢႆႈယေႉ ဢႃယု 26 ပီ ၵႂႃႇႁႃၵႂၢႆး ႁိမ်းႁွမ်းဝၢၼ်ႈပၢင် ၵူႇၵဝ်ႇ ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇသေ ယဵပ်ႇၺႃးမၢၵ်ႇမႅင်းၾင်လိၼ်လုၵ်ႈၼိုင်ႈ တႅၵ်ႇၽူင်ႉသႂ်ႇ ႁၢဝ်ႈႁႅင်း။
ဢူးထုၼ်းဢွင်ႇ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈ တဢၢင်း လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်သွင်ၵေႃႉ ၽူဝ် မေး ၵႂႃႇႁႃၵႂၢႆး တီႈၼႂ်းသူၼ်ႁႆႈၼိူဝ်လွႆသေ ၵေႃႉပဵၼ်ၽူဝ်ယဵပ်ႇၺႃးမၢၵ်ႇမႅင်းႁၢဝ်ႈႁႅင်း။ တိူဝ်ႉၺႃးၸွမ်း ၶႃလူင် လႄႈ မိုဝ်း။ မိူဝ်ႈဝႃး လႆႈသူင်ႇယူတ်းယႃတူဝ်တီႈႁူင်းယႃၵူတ်ႉၶၢႆ။ ယွၼ်ႉမၢတ်ႇၸဵပ်းႁၢဝ်ႈႁႅင်းသေ လႆႈသိုပ်ႇ သူင်ႇၵႂႃႇတီႈႁူင်းယႃလႃႈသဵဝ်ႈယဝ်ႉ” ဝႃႈၼႆ။
ၸၢၵ်ႇမၢၵ်ႇတိူဝ်ႉၺႃးတီႈၶႃလူင် တိူဝ်ႉထိုင်လုပ်ႇမၼ်းၸၢႆး လႆႈမၢတ်ႇၸဵပ်းႁၢဝ်ႈႁႅင်း။ လႆႈမႆႈၸႂ်လႄႈ ၼႅတ်ႈ ဢဝ်ၵႂႃႇတီႈလႃႈသဵဝ်ႈ ဝႃႈၼႆ။
ၵူၼ်းပၢႆႈၽေးသိုၵ်းတီႈပၢင်သဝ်း ပၢင်ၵူႇၼၼ်ႉယွၼ်ႉပိူဝ်ႈယၢပ်ႇၽိုတ်ႇတႃႇႁႃလဵင်ႉတွင်ႉလႄႈ တေႃႈလဵဝ် လႆႈၶၢႆႉၵႂႃႇယူႇတီႈဝၢၼ်ႈၵဝ်ႇၼၼ်ႉ ဝႃႈၼႆ။
ဢူးထုၼ်းဢွင်ႇ ၵူၼ်းပိုၼ်ႉတီႈလၢတ်ႈတီႈၽူႈတွႆႇႁွၵ်ႈဝႃႈ “ တၢင်းဝၢၼ်ႈပၢင်ၵူႇ ဝဵင်းၵူတ်ႉၶၢႆၼႆႉ ပဵၼ်တီႈတပ်ႉ သိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း TNLA တူင်ႉၼိုင်ၵႂႃႇမႃး။ ယွၼ်ႉၼၼ်လႄႈ မီးလွင်ႈႁၢင်ႈ ၵၢင်မၢၵ်ႇမႅင်းၾင်လိၼ်ၼမ်။ တေႃႈလဵဝ် ၵူၼ်းပၢႆႈၽေးသိုၵ်းတီႈဝၢၼ်ႈပၢင်ၵူႇၵဝ်ႇၼႆႉ ဢမ်ႇလႆႈ ႁပ်ႉတၢင်း ၸွႆႈထႅမ်တီႈလႂ်။ ယွၼ်ႉၼၼ်လႄႈ လႆႈၵႂႃႇႁဵတ်းၵၢၼ် ႁႃငိုၼ်းတႃႇလဵင်ႉတွင်ႉ။ ပေႃးဢမ်ႇႁႃၵေႃႈ ဢမ်ႇလႆႈ ၵိၼ်ၼၼ်ႉယဝ်ႉ” ဝႃႈၼႆ။
တေႃႈလဵဝ် ၵူၼ်းမိူင်းတႆးပွတ်းႁွင်ႇၼႆႉ တွၼ်ႈတႃႇတေၵႂႃႇႁဵတ်းသူၼ်ႁႆႈၼႃး လဵင်ႉတွင်ႉၼႆႉ ၵႆႉယဵပ်ႇၺႃး မၢၵ်ႇ မႅင်းၾင်လိၼ်ၵၼ်။ လွင်ႈၼႆႉ ပဵၼ်လွင်ႈလွၵ်ႇငိုတ်ႈ ၵူၼ်းမိူင်းတႆး ပွတ်းႁွင်ႇ ဢမ်ႇၸၢင်ႈၵႂႃႇႁဵတ်း ၵၢၼ်ႁႃ ၵိၼ်လဵင်ႉတွင်ႉၵၼ်ယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ