ၸုမ်းၵူၼ်းၼုမ်ႇ ပႃႇတီႇႁူဝ်သိူဝ် SNLD ၸိုင်ႈတႆးပွတ်းႁွင်ႇ ႁူမ်ႈၵၼ် လဵၼ်ႈမၢၵ်ႇၼင် တီႈၼမ်ႉၶမ်း တႃႇမၢႆတွင်းဝၼ်း ၵိူတ်ႇ ၶွပ်ႈတဵမ် 31 ပီ။
ပၢင်ပွႆးလဵၼ်ႈမၢၵ်ႇၼင်မၢႆတွင်းဝၼ်းၵိူတ်ႇ ပႃႇတီႇႁူဝ်သိူဝ် SNLD ၶွပ်ႈတဵမ် 31 ပီၼႆႉ တႄႇၸတ်းႁဵတ်း ၼႂ်းဝၼ်းတီႈ 23-26/10/ 2019 တီႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ မီးၵူၼ်းၼုမ်ႇၶဝ်ႈႁူမ်ႈလဵၼ်ႈ တင်းမူတ်း 8 ၸုမ်း။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈၶဵတ်ႇလိူၵ်ႈတင်ႈ မၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ ယူႇတီႈၶေႃႈၸီႉသင်ႇငဝ်ႈငုၼ်းလူင်းမႃးဝႃႈ ႁႂ်ႈဢွၼ်ၵၼ်ၸတ်းႁဵတ်း မၢႆတွင်းၼႃႈတီႈၸႄႈဝဵင်း/ ၸႄႈမိူင်းၽႂ်မၼ်း ႁဝ်းၶႃႈသမ်ႉမီးဝႆႉလၢႆတွၼ်ႈ မိူၼ်ၼင်ႇ တွၼ်ႈပွတ်းဢွၵ်ႇ၊ ၸၢၼ်း၊ ႁွင်ႇ၊ မိူင်းၶၢင်၊ ယၢင်းလႅင် ၸိူဝ်းၼႆႉ ၽႄၵၼ်သေႁဵတ်း။ ဢၼ်ႁဝ်းၶႃႈ ၸတ်းႁဵတ်း ပၢင်လဵၼ်ႈမၢၵ်ႇၼင်ၼႆႉ ပဵၼ်တၢင်းၸိုင်ႈတႆးပွတ်းႁွင်ႇၶႃႈ” ဝႃႈၼႆ။
သိုပ်ႇလၢတ်ႈဝႃႈ “ ၼႂ်းၶပ်ႉမၢႆၸႅၼ်ႇႁဝ်းၶႃႈတႄႉ ဢမ်ႇမီးသူးထီႉသင်ၶႃႈ ႁဝ်းၶႃႈမီးယိူင်းဢၢၼ်း တႃႇလွင်ႈမိုတ်ႈၵိုဝ်းၸမ် ၸႂ်ၵၼ် ၵူႈၸႄႈဝဵင်းဢၼ်မႃးလဵၼ်ႈမၢၵ်ႇၼင်ၼႆႉ။ ယွၼ်ႉသင်လႃႇၼႆ မိူင်းတႆးပွတ်းႁွင်ႇႁဝ်းၼႆႉ ၵၢၼ်လဵၼ်ႈမၢၵ်ႇၼင်ၼႆႉ မၼ်းၶိုၼ်ႈယႂ်ႇဝႆႉ။ မၼ်းပဵၼ်လွင်ႈသူၼ်ၸႂ်ဝႆႉလႄႈ ၼႆႉယွၼ်ႉဝႃႈႁဝ်းၶႃႈပဵၼ်ပႃႇတီႇၵၢၼ်မိူင်း ႁဝ်းၶႃႈလူဝ်ႇဢဝ်လၢႆး သူၼ်းတုမ်ၶဝ်ႈၸူးပေႃႈမႄႈၵူၼ်းမိူင်း၊ ၶဝ်ႈၸူးၵူႈလၢႆသႅၼ်းသေ ၵူၼ်းၼုမ်ႇႁဝ်းၶႃႈ ပွတ်းႁွင်ႇၵေႃႈ သမ်ႉၶႂ်ႈၶဵင်ႇၵၼ် မိူင်း ႞ လႄႈမိူင်း ႞ ၼႆလႄႈ ႁဝ်းၶႃႈၸင်ႇၸတ်းႁဵတ်းပၢင်လဵၼ်ႈမၢၵ်ႇၼင်ႇၼႆႉမႃးၶႃႈဢေႃႈ” ဝႃႈၼႆ။
ၸုမ်းၵူၼ်းၼုမ်ႇ ဢၼ်ၶဝ်ႈႁူမ်ႈလဵၼ်ႈမၢၵ်ႇၼင် တင်းမူတ်း 8 ၸုမ်း မိူၼ်ၼင်ႇ ၸုမ်းၵူၼ်းၼုမ်ႇ မိူင်းၵၢဝ် တၢင်ႉယၢၼ်း၊ ဝၢၼ်းႁၢႆး FC၊ လႃႈသဵဝ်ႈ၊ သႅၼ်ဝီ၊ TYN၊ မူႇၸေႊ၊ ၼမ်ႉၶမ်းလႄႈ တီးမႃႉ ၸဵမ်ၸိူဝ်းၼႆႉ။ ပၢင်လဵၼ်ႈမၢၵ်ႇၼင်ၼႆႉ တေ လဵၼ်ႈၵၼ်ၶၢဝ်းယၢမ်း 2 ၶၢဝ်း ၵၢင်ၼႂ်ၶၢဝ်းၼိုင်ႈလႄႈ ၵၢင်ဝၼ်းၶၢဝ်းၼိုင်ႈ။ ဢွင်ႈတီႈလဵၼ်ႈမၢၵ်ႇၼင်သမ်ႉ တီႈပၢင်ႇလဵၼ်ႈ မၢၵ်ႇၼင်ၸႄႈဝဵင်းၼမ်ႉၶမ်း၊ ထႅင်ႈတီႈၼိုင်ႈသမ်ႉ ပဵၼ်တီႈပၢင်ႇမၢၼ်ႈႁွင်း ၸိူဝ်းၼႆႉ။
ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး SNLD Shan Nationalities League for Democracy ရှမ်းတိုင်းရင်းသားများ ဒီမို ကရေစီအဖွဲ့ချုပ် (SNLD) ၼႆႉ ၶွတ်ႇၽွတ်ႈမႃးမိူဝ်ႈဝၼ်းတီႈ 26/10/1988။ ယၢမ်းလဵဝ် ႁူဝ်ပဝ်ႈပဵၼ်ၸဝ်ႈၶုၼ်ထုၼ်းဢူး၊ ၵႅမ်ႁူဝ်ပဝ်ႈ 1 ၸၢႆးၺုၼ်ႉလုၼ်ႇ(ၸၢႆးၼုတ်း)၊ ၵႅမ်ႁူဝ်ပဝ်ႈမၢႆ 2 ၸဝ်ႈၶမ်းပိူင်ႇၾႃႉ၊ ၽူႈၼမ်းၼႂ်းၵူႈလွင်ႈလွင်ႈၸၢႆးလဵၵ်ႉ၊ ၽူႈ ၼမ်းၼႂ်း 1 ၸၢႆးၵျေႃႇၺုၼ်ႉလႄႈ ၽူႈၼမ်းၼႂ်း 2 ၸၢႆးသၢမ်ၽူၼ်သႅင် ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ