တပ်ႉသိုၵ်းလူင်ပွင်ၸိုင်ႈမၢၼ်ႈ ဢဵၼ်ႁႅင်းၵူၼ်းသိုၵ်းၼပ်ႉပၢၵ်ႇ ရူတ်ႉၵႃး ၵၢပ်ႇလဵၵ်းယိုဝ်းသိုၵ်း ႁိူဝ်းမိၼ် ၶဝ်ႈၾိုၵ်းၵၢၼ် ၼႄၾၢင်ႁၢင်ႈႁႅင်းသိုၵ်း တၢင်းထုင်ႉပၢင်ႇလႅင်းသႂ်/ မိူင်းၸိတ်ႇ ၼႂ်းၸႄႈဝဵင်းၼမ်ႉၸၢင် ၸိုင်ႈတႆး ပွတ်းၸၢၼ်း။
ဝၼ်းတီႈ 23/10/2019 ယၢမ်းပွတ်းၼႂ် တပ်ႉသိုၵ်းလူင်ပွင်ၸိုင်ႈမၢၼ်ႈ တပ်ႉၵွင် တင်း တပ်ႉလူမ်း ဢၼ်ပၵ်းဝႆႉတီႈၼႂ်း ၸႄႈ ဝဵင်းၼမ်ႉၸၢင် ၾၢႆႇတႂ်ႈတိူင်းသိုၵ်းၶူဝ်လမ် (ယလၶ) ႁူမ်ႈၵၼ်သေ ၶဝ်ႈၾိုၵ်းသိုၵ်း ၼႂ်းၼႃႈတီႈ သိုၵ်းၵူၼ်းမိူင်းထုင်ႉပၢင်ႇ လႅင်းသႂ် (ၸုမ်းပီႇတူႉၸိတ်ႉမၢၵ်ႇၵႅင်း) လႄႈ ၼႃႈတီႈၸုမ်းပျီႇတူႉၸိတ်ႉ ၼႃးယႆး တၢင်းပွတ်းမိူင်းၸိတ်ႇ ဝႃႈၼႆ။
ၵူၼ်းမိူင်းပိုၼ်ႉတီႈ လၢတ်ႈဝႃႈ “ ၵၢၼ်ၾိုၵ်းသိုၵ်းၶဝ်ၼႆႉ တႄႇဢဝ်ၵၢင်ၼႂ် 9 မူင်းထိုင်မွၵ်ႈ12 မူင်းၵၢင်ဝၼ်း ၵူၺ်းမိူၼ်မႃး ၼႄႁႅင်းသိုၵ်းလၢႆလၢႆသေပွၵ်ႈၵူၺ်းၶႃႈ” ဝႃႈၼႆ။
ၶူးမေႃသၢႆလႅင်း ၵႅမ်ႁူဝ်ပဝ်ႈ ပျီႇတူႉၸိတ်ႉ ပၢင်ႇလႅင်းသႂ်(မၢၵ်ႇၵႅင်း) လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်ပွင်ႇၶၢဝ်ႇၸူးတီႈ ႁဝ်းၶႃႈ ယူႇ။ လွင်ႈဝႃႈၶဝ်တေၾိုၵ်းသိုၵ်းၼၼ်ႉ။ ၶေႃႈမုလ်း တႅတ်ႈတေႃးတႄႉ ဢမ်ႇလႆႈႁူႉၸႅင်ႈလႅင်း။ မိူဝ်ႈၽွင်းၼၼ်ႉ ႁဝ်းတိုၵ်ႉ သွၼ်လိၵ်ႈယူႇ” ဝႃႈၼႆ။
“သိုၵ်းလူင်ပွင်ၸိုင်ႈမၢၼ်ႈ ဢၼ်ၶဝ်ႈမႃးၾိုၵ်းသိုၵ်းၼၼ်ႉ ၸႂ်ႉၵႃးၵၢပ်ႇလဵၵ်း 8 လမ်း၊ ၵႃးလၢၵ်ႈၶိူင်ႈၵွင်ႈလူင် 2 လမ်း၊ ႁိူဝ်းမိၼ် 3 လမ်း၊ ၵႃးသိုၵ်း 20 လမ်း ႁႅင်းၵူၼ်း 100 ပၢႆ ၸဵမ်ၸိူဝ်းၼႆႉ” ၵူၼ်းပိုၼ်ႉတီႈ တၢင်းပွတ်းပၢင်ႇလႅင်းၵေႃႉၼိုင်ႈ လၢတ်ႈၼႄ ၼင်ႇၼႆ။
ၸုမ်းပျီႇတူႉၸိတ်ႉမၢၵ်ႇၵႅင်း (ပၢင်ႇလႅင်းသႂ်) ၼႆႉ ပဵၼ်ၸဝ်ႈလႅင်းသႂ် (ၸဝ်ႈၸၢႆးလူႇ) ဢွၼ်ႁူဝ်။ ပျီႇတူႉၸိတ်ႉ ၼႃးယႆးသမ်ႉ ပဵၼ်ၵျဵဝ်းသၢင်း ဢွၼ်ႁူဝ်။ မိူဝ်ႈပီ 1996 ၼၼ်ႉ ဝၢႆးတပ်ႉသိုၵ်းမိူင်းတႆး MTA ဝၢင်းၶိူင်ႈၼၼ်ႉ သွင်ၸုမ်းၼႆႉၵေႃႈမႃး ၸွမ်း။ ဝၢႆးၼၼ်ႉ ယူႇတီႈတပ်ႉသိုၵ်းလူင်ပွင်ၸိုင်ႈမၢၼ်ႈ ပၼ်ပုၼ်ႈၽွၼ်းသေႁပ်ႉႁဵတ်းပျီႇတူႉၸိတ်ႉသေယူႇထုင်ႉၼႆႉမႃး ဝႃႈၼႆ။
ၸွမ်းႁိမ်းႁွမ်း ၼႂ်းပိုၼ်ႉတီႈတူင်ႇတၢင်ႇတူၼ်းႁူတ်ႈႁၢဝ်းလွႆ တၢင်းပွတ်းတွၼ်ႈၼၼ်ႉ ၵမ်ႈၼမ် ပဵၼ်ပိုၼ်ႉတီႈ ၼႃႈလိၼ် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉ သိုၵ်းၸိုင်ႈတႆး RCSS/SSA တူင်ႉၼိုင်ၵႂႃႇမႃး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ