ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA ၶွပ်ႈတဵမ် 4 ပီ တေၸတ်းႁဵတ်း ၼႂ်းႁၢင် လိူၼ်ဢွၵ်ႊထူဝ်ႊပိူဝ်ႊ 2019 ၼႆႉ။
ပၢင်ပွႆးမၢႆတွင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉ တူဝ်ႈမိူင်း NCA တေၸတ်းႁဵတ်း တီႈ ၼေႇပျီႇတေႃႇ ဝၼ်းတီႈ 28/10/2019 ယၢမ်းဝၢႆးဝၼ်း 2 မူင်း။ ယၢမ်းၵၢင်ၶမ်ႈ 6 မူင်းသမ်ႉ တေမီးပၢင်ၵိၼ် ၶဝ်ႈႁူမ်ႈမူႇၵၼ် ဝႃႈၼႆ။
မိူဝ်ႈဝၼ်းတီႈ 21/10/2019 တူဝ်တႅၼ်း လူင်ပွင်ၸိုင်ႈမၢၼ်ႈတင်း ၽူႈဢွၼ်ႁူဝ် ၶၵ်ႉၵၢၼ်လွင်ႈငမ်းယဵၼ် PPWT ႁူပ်ႉဢုပ်ႇ ၵၼ် တီႈသုၼ်ၵၢင်မႄးလီ ၼႂ်းၸိူဝ်ႉၸၢတ်ႈ တီႈၼေႇပျီႇတေႃႇ ဝႃႈၼႆ။
ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း 2 RCSS/SSA လၢတ်ႈဝႃႈ “ တႃႇၵၢၼ်ငမ်းယဵၼ်တေၶိုပ်ႈၼႃႈဢွင်ႇမၢၼ်ၼႆႉ ဢိင်ၼိူဝ် UPDJC ၶွမ်ႊမတီႊႁူမ်ႈသၢင်ႈဢုပ်ႇဢူဝ်းလွင်ႈငမ်းယဵၼ်မိူင်းႁူမ်ႈတုမ်” ဝႃႈၼႆ။
မိူဝ်ႈၼႆႉ ဝၼ်းတီႈ 23/10/2019 ၶွမ်ႊမတီႊႁူမ်ႈသၢင်ႈဢုပ်ႇဢူဝ်းလွင်ႈငမ်းယဵၼ်မိူင်းႁူမ်ႈတုမ် UPDJC NCA – EAOs ၸတ်းႁဵတ်းပၢင်ၵုမ် ပွၵ်ႈၵမ်း 28 တီႈတႃႈၵုင်ႈ ဝႃႈၼႆ။
ၸဝ်ႈသိုၵ်းလူင် ၸၢႆးငိုၼ်း မွၵ်ႇလၢတ်ႈၶေႃႈၵႂၢမ်းၼႂ်းပၢင်ၵုမ်ဝႃႈ “ ပၢင်ပွႆးမၢႆတွင်း NCA ၶွပ်ႈတဵမ် 4 ပီ ဢၼ်တေၸတ်းႁဵတ်း ၼႂ်းဝၼ်းတီႈ 28 ၼၼ်ႉ ႁဝ်းၶႃႈ လူဝ်ႇလႆႈၼပ်ႉသွၼ်ႇ ၵၢၼ်မိူင်း၊ ၶၵ်ႉၵၢၼ်လွင်ႈငမ်းယဵၼ်သေဝၢင်းၽႅၼ်။ တႃႇၶၵ်ႉၵၢၼ် ငမ်းယဵၼ်တေၶိုပ်ႈၼႃႈ၊ မၼ်ႈၵိုမ်းသေ တႃႇတေႁူမ်ႈသၢင်ႈမိူင်းႁူမ်ႈတုမ်ၾႅတ်ႊတရႄႊၼၼ်ႉတၵ်းလႆႈ ႁူမ်ႈမိုဝ်းၵၼ်” ဝႃႈ ၼႆ။
ပၢင်ပွႆးမၢႆတွင်းဝၼ်းၶွပ်ႈၶူပ်ႇ NCA ၼႆႉ တေမီးၽူႈယႂ်ႇၵူၼ်းလူင်ၾၢႆႇလူင်ပွင်ၸိုင်ႈ၊ ၸုမ်းၸၼ်ႉမိူင်းႁူမ်ႈတုမ်၊ ၽွင်းလူင် မိူင်းႁူမ်ႈတုမ်၊ ၽွင်းလူင်တိူင်း၊ ၸႄႈမိူင်း။ ယဝ်ႉၵေႃႈ ၽူႈၸွႆႈၵမ်ႉထႅမ် ၸုမ်းလူင်းလၢႆးမိုဝ်း NCA ၸဵမ်ၸိူဝ်းၼႆႉ ၶဝ်ႈႁူမ်ႈ။
ၼွၵ်ႈလိူဝ်ၼၼ်ႉ တၢင်းၾၢႆႇၽူႈဢွၼ်ႁူဝ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၵေႃႈ တေၶဝ်ႈႁူမ်ႈပႃး ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ