Thursday, March 28, 2024

လုၵ်ႇႁဵၼ်းၼေႃႇတႅၼ်းၶိူဝ်း တီႈဝၢၼ်ႈႁႆး 700 ပၢႆ လူဝ်ႇၶူဝ်းၼုင်ႈတၢင်းဝႆလႄႈ တၢင်းၵိၼ်တၢင်းယႅမ်ႉ

Must read

လုၵ်ႈႁဵၼ်းၼေႃႇတႅၼ်းၶိူဝ်း 700 ပၢႆတီႈႁူင်းႁဵၼ်း ၼေႃႇတႅၼ်းၶိူဝ်း ငဝ်ႈငုၼ်းဝၢၼ်ႈႁႆး ၸေႈဝဵင်းၵေးသီး ႁူပ်ႉထူပ်းၽေးၵတ်းၼၢဝ် ယွၼ်ႉပိူဝ်ႈၾိင်ႈၾႃႉယႃႇသီႇလႅၵ်ႈလၢႆႈ။

မိူဝ်ႈဝၼ်းထိ 23 လိူၼ်တီႊသႅမ်ႊပိူဝ်ႊပူၼ်ႉမႃး မီးၸဝ်ႈတႃႇၼႃႉမႃးလူႇတၢၼ်းၵမ်ႉၸွႆႈ ၶူဝ်းၼုင်ႈတၢင်းဝႆ၊ ၶူဝ်းဢုၼ်ႇ၊ သွၵ်းတိၼ် မူင်တိၼ်ပၼ်လုၵ်ႈႁဵၼ်းၼေႃႇတႅၼ်းၶိူဝ်း 700 ၵေႃႉ 1 ၵေႃႉ 1 ၸုမ်ႇ။ ၵႃႈၶၼ် တူၵ်းမႅၼ်ႈငိုၼ်းမၢၼ်ႈ သွင်ပၢၵ်ႇသႅၼ်ပျႃး။ လိူဝ်ၼၼ်ႉသမ်ႉ ၵမ်ႉၸွႆႈပႃး တႃႇပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆးထႅင်ႈ ၼိုင်ႈပၢၵ်ႇသႅၼ်ပျႃး ဝႃႈၼႆ။

- Subscription -

ၵဵဝ်ႇၵပ်းလူၺ်ႈလွင်ႈၼႆႉ ၽူႈၵွၼ်းႁူင်းႁဵၼ်း ၸၢႆးႁိၼ်သႅင် လၢတ်ႈဝႃႈ – ယွၼ်ႉပိူဝ်ႈၶၢဝ်းၵတ်းပီၼႆႉ ၾူၼ်ၵေႃႈသမ်ႉတူၵ်းလႄႈ လွင်ႈၵတ်းၼႆႉတိူဝ်းလိူဝ်ၵူႈပီ။ ယူႇတီႈပႃႇတီႇမႂ်ႇသုင်ၸိုင်ႈတႆး ၵမ်ႉၸွႆႈယူႇ ၵူႈပီဝႃႈၼႆသေတႃႉ လုၵ်ႈဢွၼ်ႇႁဵၼ်းၵေႃႈၼမ်မႃးလိူဝ်ၵူႈပီလႄႈ ႁႂ်ႈပေႃးၵုမ်ႇထူၼ်ႈလီငၢမ်း ၼႆၼၼ်ႉ ဢမ်ႇမီးလႆႈ။ ၶူဝ်းၼုင်ႈတၢင်းဝႆၼႆႉၵေႃႈလမ်ႇလွင်ႈတႃႇပၢႆးယူႇလီလုၵ်ႈဢွၼ်ႇတႄႉတႄႉ။ ပေႃးမီးၸဝ်ႈတႃႇၼႃႉမႃးၸွႆႈထႅမ်ၸိူင်ႉၼႆ လုၵ်ႈႁဵၼ်းႁဝ်းၵေႃႈတေၶႅၼ်းၸႂ်တႄႉတႄႉ”- ဝႃႈၼႆ။

လုၵ်ႈဢွၼ်ႇတီႈႁူင်းႁဵၼ်းၼေႃႇတႅၼ်းၶိူဝ်းၼႆႉ ပဵၼ်လုၵ်ႈဢွၼ်ႇၽၢၼ်ပေႃႈမႄႈ လႄႈလုၵ်ႈဢွၼ်ႇ ဢၼ်ပေႃႈမႄႈ ဢမ်ႇၸၢင်ႈသူင်ႇႁဵၼ်းလိၵ်ႈ။ ပဵၼ်ၵူၼ်းၼႂ်းဢိူင်ႇၼႂ်းဝၢၼ်ႈ ၼႂ်းၸေႈဝဵင်းၵေးသီး၊ တၢင်ႉယၢၼ်း၊ မိူင်းၵၢဝ်၊ သီႇပေႃႉ၊ မိူင်းသူႈ၊ မိူင်းယႆ ၸိူဝ်းၼႆႉ။ ၵမ်ႈၼမ်ပဵၼ်သႅၼ်းပၢၼ်ဢႃယု 7 ၶူပ်ႇ 8 ၶူပ်ႇ။ ဢမ်ႇပႆႇမီးပိုၼ်ႉႁူႉလွင်ႈယူႇသၢင်ႈၵိၼ်သဝ်းလႄႈ ၵႆႉပဵၼ်တွင်ႉၸဵပ်းတွင်ႉၵႅၼ်း၊ ၶူမ်းၵၢႆးၸိူဝ်းၼႆႉ။ ယွၼ်ႉပိူဝ်ႈၼၼ် ယႃႈယႃလႄႈ တၢင်းၵိၼ်တၢင်းယႅမ်ႉဢၼ်မီးဢႁႃရ ၵေႃႈလူဝ်ႇထႅင်ႈတင်းၼမ်- ဝႃႈၼႆ။

လုၵ်ႈႁဵၼ်း ၼေႃႇတႅၼ်းၶိူဝ်းတီႈႁူင်းႁဵၼ်းပရႁိတ ဝၢၼ်ႈႁႆးၼႆႉ ၼိုင်ႈပီၽတ်ႉၽဵင်ႇမီးမွၵ်ႈ 700 ၵေႃႉ။ မီးၶူးသွၼ် မေႃသွၼ် 18 ၵေႃႉ။ သွၼ်ပၼ်လိၵ်ႈမၢၼ်ႈ လိၵ်ႈဢိင်းၵလဵတ်ႈ လိၵ်ႈတႆး ပၢႆးၼပ်ႉၸိူဝ်းၼႆႉ။ ပိူင်သွၼ်ပဵၼ် လၢႆးၵႂႃႇပိူင်သွၼ်ႁူင်းႁဵၼ်းလူင်ပွင်ၸိုင်ႈ။ မီးၸၼ်ႉၼိုင်ႈထိုင် ၸၼ်ႉသီႇ။ ပေႃးဢွင်ႇပူၼ်ႉ ၸၼ်ႉသီႇယဝ်ႉ သိုပ်ႇၶဝ်ႈႁဵၼ်းတေႃႇထႅင်ႈတီႈႁူင်းႁဵၼ်းလူင်ပွင်ၸိုင်ႈ ထိုင်ၸၼ်ႉသိပ်းသေ ဢၼ်ႁဵၼ်း ယဝ်ႉၸၼ်ႉၸွမ် လႆႈႁပ်ႉၶူးၵႂႃႇမီး 9 ၵေႃႉ။ ဢၼ်တိုၵ်ႉႁဵၼ်းတီႈၸၼ်ႉၸွမ်မီးယူႇ 10 ၵေႃႉ။ ၵႃႈၸႂ်ႉၸၢႆႇႁူင်းႁဵၼ်းတႄႉ ယူႇတီႈငဝ်ႈငုၼ်း SSPP/SSA ၵမ်ႉၸွႆႈဝႆႉတင်းမူတ်း။ ႁူင်းႁဵၼ်းၼႆႉပူၵ်းတင်ႈမီးမႃးဢမ်ႇယွမ်း 15 ပီယဝ်ႉ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း