လုင်းၸၢႆးမူဝ်ႉ ၽူႈၼမ်းၼႂ်းပႃႇတီႇႁူဝ်သိူဝ် ဝဵင်းၼမ်ႉလၼ်ႈ ပဵၼ်ၽေးၵိုင်ႉၵၢင်ႉ ၺႃးရူတ်ႉၽႃႇသေ လႆႈမၢတ်ႇၸဵပ်း ႁၢဝ်ႈႁႅင်း လႆႈလူႉတၢႆၵႂႃႇတီႈႁူင်းယႃလူင်လႃႈသဵဝ်ႈ။

ဝၼ်းတီႈ 22/10/2019 ယၢမ်းဝၢႆးဝၼ်းမွၵ်ႈ 1:45 မူင်းၼၼ်ႉ လုင်းၸၢႆးမူဝ်ႉ(ႁွင်ႉ) ၸၢႆးတႅၵ်ႉလုၼ်ႇမျၢတ်ႉ ဢႃယု 50 ပီ ၽူႈၼမ်းၼႂ်းပႃႇတီႇႁူဝ်သိူဝ် SNLD ဝဵင်းၼမ်ႉလၼ်ႈ လႆႈပဵၼ်ၽေးၵိုင်ႉၵၢင်ႉ/ၽေးဢုပၢတ်ႈ ရူတ်ႉၽႃႇၺႃးသေ လႆႈလူႉ တၢႆၵႂႃႇ တီႈႁူင်းယႃလူင် ဝဵင်းလႃႈသဵဝ်ႈ ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈမၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ လုင်းၸၢႆးမူဝ်ႉႁဝ်းၶႃႈၼႆႉ ပဵၼ်ၵူၼ်းၸႂ်လီ၊ ၸႂ်ၵႂၢင်ႈ ယဝ်ႉၵေႃႈ ပဵၼ်ၵူၼ်းၸႂ်ယဵၼ် ၸွႆႈထႅမ်ၵူႈပႃႈၵူႈၾၢႆႇသေ ပဵၼ်ၵူၼ်း မၢၵ်ႈမီး။ ၽူႈၼမ်းၼႂ်းပႃႇတီႇႁူဝ်သိူဝ် ၼႂ်းဝဵင်းၼမ်ႉလၼ်ႈႁဝ်းၶႃႈၵေႃႉၼိုင်ႈ လူႉၵႂႃႇၼႆႉ လီသေလၢႆတႄႉတႄႉၶႃႈ။ မိူၼ် တင်းႁဝ်းၶႃႈ လႆႈသုမ်းၶႅၼ်/ သုမ်းမိုဝ်းၼၼ်ႉယဝ်ႉၶႃႈ။ တွၼ်ႈတႃႇႁဝ်းၶႃႈတၢင်းၼမ်ႉလၼ်ႈၼႆႉ။ လိူဝ်သေၼၼ်ႉဢမ်ႇၵႃး မိူင်းတႆးပွတ်းႁွင်ႇႁဝ်းၶႃႈ ၵေႃႈ ၸႂ်ယႂ်ႇ ဢဵၼ်ႁႅင်းငိုၼ်း၊ တၢင်းႁူႉ၊ ၼမ်ႉၸႂ် ၸဵမ်ၸိူဝ်းၼႆႉ။ ၵူၺ်းၵႃႈ ဢမ်ႇထၢင်ႇသေဢိတ်းၶႃႈဝႃႈတေပဵၼ်ၸိူင်ႉၼႆ” ဝႃႈၼႆ။

ပိူင်ပဵၼ် လုင်းၸၢႆးမူဝ်ႉ ဢၼ်လႆႈလူႉတၢႆၵႂႃႇၼႆႉ မိူဝ်ႈဝၼ်းတီႈ 21/10/2019 ယၢမ်းႁူဝ်ၶမ်ႈ မွၵ်ႈ 6 မူင်းၼၼ်ႉ ၵႃးလုင်း ၸၢႆးမူဝ်ႉ သႅၼ်းဝီႊၵူဝ်ႊတင်း ၵႃးတၢႆႇၼႃႇ ၽႃႇၵၼ် တီႈႁိမ်းဝၢၼ်ႈပုင်းထုၼ် တၢင်းၽႄၵႂႃႇဝၢၼ်ႈႁၢင်ၼႃး ၼိူဝ်သဵၼ်ႈ တၢင်းလူင် ဝဵင်းလိူဝ်ႇ – လႃႈသဵဝ်ႈ။ ၼႂ်းၵႃး လုင်းၸၢႆးမူဝ်ႉၼၼ်ႉ မီးၵူၼ်းလူႉတၢႆ ထင်တီႈ 1 ၵေႃႉ၊ ၵႂႃႇလူႉတၢႆတီႈ ႁူင်းယႃ လႃႈသဵဝ်ႈ ထႅင်ႈ 2 ၵေႃႉ။ ထိုင်မႃး ဝၼ်းတီႈ 22 ယၢမ်းဝၢႆးဝၼ်း 1:45 မူင်းၼၼ်ႉ လုင်းၸၢႆးမူဝ်ႉလႆႈလူႉတၢႆထႅင်ႈ။ တင်းမူတ်းလႆႈလူႉတၢႆ 4 ၵေႃႉ မၢတ်ႇၸဵပ်း 3 ၵေႃႉ ဝႃႈၼႆ။

ၸၢႆးဝၼ်းလႅင်းၶမ်း လၢတ်ႈဝႃႈ “ ၵႃးလုင်းႁဝ်းၶႃႈ တင်း ၵႃးတၢႆႇၼႃႇ ၽႃႇၵၼ်ႁႅင်းၶႃႈဢေႃႈ။ ၵႃးလုင်းမူဝ်ႉသမ်ႉ လုၵ်ႉလႃႈ သဵဝ်ႈ တေပွၵ်ႈတၢင်းၼမ်ႉလၼ်ႈ မႃးပဵၼ်ၶႅၵ်ႇတီႈလႃႈသဵဝ်ႈသေ တေပွၵ်ႈႁိူၼ်းဢေႃႈ။ မိူဝ်ႈဝႃး ဝၼ်းတီႈ 22/10/ 2019 တႄႉ လႆႈဢဝ်ၶၢပ်ႈတူဝ် လုင်းမူဝ်ႉ တီႈႁူင်းယႃ လႃႈသဵဝ်ႈသေ မႃးလုမ်းလႃႈတီႈႁိူၼ်းၼမ်ႉလၼ်ႈဝႆႉဢေႃႈ” ဝႃႈၼႆ။

မိူဝ်ႈၼႆႉ ဝၼ်းတီႈ 23/10/2019 ယၢမ်းဝၢႆးဝၼ်း ယူႇတီႈၸိူဝ်ႉၶိူဝ်းပီႈၼွင်ႉလုၵ်ႈလၢၼ် တေဢဝ်ၶၢပ်ႈတူဝ် လုင်းမူဝ်ႉၶဝ်ႈႁဵဝ်ႈ တီႈဝဵင်းၼမ်ႉလၼ်ႈ ဝႃႈၼႆ။

“ လုင်းၸၢႆးမူဝ်ႉၼႆႉ ပဵၼ်ၵူၼ်းတူင်ႉၼိုင်တူင်ႇဝူင်းၵူၼ်းၵေႃႉၼိုင်ႈ ၶဝ်ႈၸွႆႈတူင်ႉၼိုင်ၼႂ်းတူင်ႇဝူင်း မိူၼ်ၼင်ႇ တူင်ႉၼိုင်ၼႂ်း ပႃႇတီႇႁူဝ်သိူဝ်၊ ၵေႃလိၵ်ႈလၢႆး ၼမ်ႉလၼ်ႈ၊ ၽူႈၶဝ်ႈၸုမ်း ၶွမ်ႊမတီႊၾႆးၾႃႉ ၼမ်ႉလၼ်ႈလႄႈ ၸုမ်းပွင်ၵၢၼ် ၵေႃးပၵ ၽြႃးလူင်မႁႃႇမျၢတ်ႉမုၼိ ၼမ်ႉလၼ်ႈ၊ ပဵၼ်ၽူႈဢွၼ်ႁူဝ်တူင်ႉၼိုင် သႂ်ႇပၢႆႉလိၵ်ႈတႆး ၸွမ်းၼႂ်းၵိဝ်ႇပွၵ်ႉဝၢၼ်ႈ ၼႂ်းၼမ်ႉ လၼ်ႈ၊ ပဵၼ်ဢၼ်မွင်ၸႂ်ၸွမ်းလုင်းႁဝ်းၶႃႈလႄႈ လီသေလၢႆတႄႉတႄႉၶႃႈ” ၵူၼ်းပိုၼ်ႉတီႈ ၼမ်ႉလၼ်ႈ လၢတ်ႈၼႄ ၼင်ႇၼႆ။