ၼၢင်းၶမ်းဢွင်ႇ ၵေႃႉဢၼ်ၺႃးၽူဝ်ၸဝ်ႈၵဝ်ႇယိုဝ်းသႂ်ႇ မိူဝ်ႈႁၢင်လိူၼ်သႅပ်ႊထႅမ်ႊပိူဝ်ႊၼၼ်ႉ လူႉတၢႆၵႂႃႇတီႈႁိူၼ်းမၼ်း ၼၢင်း ဝဵင်းႁူဝ်ပၢင်ႇ။
မိူဝ်ႈၼႆႉ ဝၼ်းတီႈ 22/10/2019 ယၢမ်းဝၢႆးဝၼ်း 1 မူင်းပၢႆ ၼၢင်းၶမ်းဢွင်ႇ (ၵေႃႉပဵၼ်မေးၼၢင်း ၸၢႆးတဵင်းဢွင်ႇ) ပွၵ်ႉၵွင်း ႁုင်း ၸႄႈဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇၼၼ်ႉ လႆႈလူႉတၢႆၵႂႃႇတီႈႁိူၼ်းမၼ်းၼၢင်း ပွၵ်ႉၵွင်းႁုင်း ၸႄႈဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ။
ၸၢႆးထုၼ်းလူင် ၵူၼ်းပိုၼ်ႉတီႈၸႄႈဝဵင်းႁူဝ်ပၢင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ မၼ်းၼၢင်းထုၵ်ႇသူင်ႇတူဝ်ၵႂႃႇ ယူတ်းယႃတီႈဝဵင်းလိူဝ်ႇသေ ပွၵ်ႈမႃးၶိုၼ်းမိူဝ်ႈဝႃး ဝၼ်းတီႈ 21/10/2019 ။ ၽိူဝ်ႇထိုင်မႃး မိူဝ်ႈၼႆႉ ဝၼ်းတီႈ 22/10/2019 ယၢမ်းဝၢႆးဝၼ်း မၼ်းၼၢင်းလႆႈလူႉတၢႆၵႂႃႇတီႈႁိူၼ်း ပွၵ်ႉၵွင်းႁုင်းယဝ်ႉၶႃႈ” ဝႃႈၼႆ။
ပိူင်ပဵၼ်တႄႉ မိူဝ်ႈဝၼ်းတီႈ 23/9/2019 ယၢမ်းၵၢင်ၶမ်ႈၼၼ်ႉ ၸၢႆးတဵင်းဢွင်ႇ တင်း ၼၢင်းၶမ်းဢွင်ႇ သွင်ၽူဝ်မေးၽိတ်း မေႃးၵၼ်ႁၢဝ်ႈႁႅင်းသေ ၵေႃႉပဵၼ် ၽူဝ်ဢဝ်ၵွင်ႈယိုဝ်းသႂ်ႇ ၼၢင်းၶမ်းဢွင်ႇတင်းပေႃႈမႄႈမေး လႆႈမၢတ်ႇၸဵပ်း တင်း 3 ၵေႃႉ။
မိူဝ်ႈဝၼ်းတီႈ 24/9/2019 ယၢမ်းၵၢင်ၶမ်ႈၼၼ်ႉ ၸၢႆးတဵင်းဢွင်ႇ ၶိုၼ်းယိုဝ်းတူဝ်မၼ်းၸၢႆးတၢႆ တီႈႁိမ်းဝၢၼ်ႈၼွင်ႁၢတ်ႇႁၢႆး ၸႄႈဝဵင်းႁူဝ်ပၢင်ႇ။
မိူဝ်ႈၽွင်းၼၼ်ႉ ၵူၼ်းမၢတ်ႇၸဵပ်း တင်း 3 ၵေႃႉ လႆႈသူင်ႇယူတ်းယႃတူဝ်တီႈႁူင်းယႃ လႃႈသဵဝ်ႈ။ ၵေႃႉပဵၼ်ပေႃႈမႄႈ ၼၢင်း ၶမ်းဢွင်ႇတႄႉ တိူဝ်ႉမၢတ်ႇၸဵပ်း ဢမ်ႇပေႃးႁၢဝ်ႈႁႅင်းသေ လႆႈယူတ်းယႃတူဝ်တီႈႁူင်းယႃလႃႈသဵဝ်ႈ။ တူဝ်ၼၢင်းၶမ်းဢွင်ႇ သမ်ႉ တိူဝ်ႉမၢတ်ႇ မၢၵ်ႇၵွင်ႈႁၢဝ်ႈႁႅင်းဝႆႉလႄႈ ထုၵ်ႇသူင်ႇတူဝ်ၵႂႃႇႁူင်းယႃ ဝဵင်းလိူဝ်ႇ(မၼ်းတလေး)။ လႆႈယူတ်းယႃတူဝ် ႁိမ်း ၶၢဝ်းတၢင်းလိူၼ်ၼိုင်ႈသေ ဢမ်ႇၶႅၼ်းၸိုၼ်ႈၶိုၼ်ႈမႃးလႄႈ မေႃယႃၸင်ႇလႆႈသူင်ႇပွၵ်ႈၶိုၼ်းႁိူၼ်း၊ မၼ်းၼၢင်း လႆႈလူႉတၢႆ ၵႂႃႇတီႈႁိူၼ်း ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ