သင်ၶၸၢဝ်း(လွႆ) တဢၢင်း ဢွၵ်ႇလိၵ်ႈပိုၼ်ၽၢဝ်ႇသၢၼ်ၶတ်း လွင်ႈၸဝ်ႈသြႃႇဝတ်ႉၶိူဝ်းၼိမ်း ၺႃးယိုဝ်းသေ လႆႈလူႉလွၼ်ႇ ၵႂႃႇၼၼ်ႉ ဝႃႈၼႆ။
ဝၼ်းတီႈ 21/10/2019 ယူႇတီႈမုၵ်ႉၸုမ်းသင်ၶတဢၢင်း ႁူမ်ႈၵၼ်ဢွၵ်ႇလိၵ်ႈပိုၼ်ၽၢဝ်ႇသၢၼ်ၶတ်းလွင်ႈ ၸဝ်ႈသြႃႇ ပၺ် ၺႃၸေႃးတ ၸဝ်ႈၵွၼ်းဝတ်ႉၶိူဝ်းၼိမ်း(ၼွင်မွၼ်) ဢိူင်ႇၶိူဝ်းၼိမ်း ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ဢၼ်ၺႃးယိုဝ်း သေလႆႈလူႉလွၼ်ႇၵႂႃႇ မိူဝ်ႈဝၼ်းတီႈ 20/10/2019 ယၢမ်းႁူဝ်ၶမ်ႈ မွၵ်ႈ 6:45 မူင်းၼၼ်ႉ ဝႃႈၼႆ။
ၸဝ်ႈသြႃႇ ပၺ်ၺႃၸေႃးတၼႆႉ ၺႃးယိုဝ်းတိူဝ်ႉ 5 ၵမ်း။ ၸွမ်းၵွၵ်းႁူဝ်၊ ၼႃႈလႄႈ တူဝ် ၸဵမ်ၸိူဝ်းၼႆႉ။ တေႃႈလဵဝ် ယူႇတီႈ တၵ်ႉၵႃႇသတ်ႉထႃး ဝၢၼ်ႈၶိူဝ်းၼိမ်း လႆႈဢဝ်ၶၢပ်ႈတူဝ်ၸဝ်ႈမႃးလုမ်းလႃးဝႆႉတီႈဝတ်ႉၶိူဝ်းၼိမ်း တႃႇၶၢဝ်းတၢင်း 5 ဝၼ်း။ ပေႃးယဝ်ႉ ၸင်ႇလုမ်းလႃးလူႇတၢၼ်းၽၢဝ်ၾႆးၵႂႃႇ ဝႃႈၼႆ။
မိူၼ်ၼႆၵူၺ်းၼင်ႇၵဝ်ႇ မိူဝ်ႈပီ 2018 ၼၼ်ႉၵေႃႈ ၸဝ်ႈတူၼ်ၶူးၵလျႃႇၼဝမ်ႇသ ဝတ်ႉၵျွင်းသူၺ်ႇၵျိၼ်ႇ ဝဵင်းၵျွၵ်ႉမႄးၵေႃႈ ၺႃးၵူၼ်း 2 ၵေႃႉ ၶီႇရူတ်ႉၶိူင်ႈ မႃးယိုဝ်းတီႈဝတ်ႉၵျွင်း။ ၸဝ်ႈတူၼ်ၶူးပၺ်ၺႃၸေႃးတၼႆႉၵေႃႈ ၺႃးယိုဝ်းလွၼ်ႇထႅင်ႈသေ ၵဵဝ်ႇၵပ်းလွင်ႈၼႆႉ ႁႂ်ႈၽူႈမီးပုၼ်ႈၽွၼ်းၶဝ် ႁႂ်ႈၸဵဝ်းတီႉလႆႈတူဝ်ၵူၼ်းႁၢႆႉၼၼ်ႉမႃးပၼ်တူတ်ႈတၢမ်ႇၽႂ်းၽႂ်းသေၵမ်းၼႆ မုၵ်ႉၸုမ်းသင်ၶၸၢဝ်း(လွႆ) တဢၢင်းတုၵ်းယွၼ်းၼင်ႇၼႆ။
ၸဝ်ႈတူၼ်ၶူး ပၺ်ၺႃၸေႃးတၼႆႉ တႄႇၼင်ႈဝတ်ႉၶိူဝ်းၼိမ်းမႃး မိူဝ်ႈပီ 2003 သေ ပိုတ်ႇပၢင်တြႃးပၼ်တၵ်ႇၵႃႇသတ်ႉထႃး ဢမ်ႇလိူၵ်ႈၸၢဝ်းၶိူဝ်းလႂ် ၽိုၵ်းသွၼ်ၵၼ်တိုဝ်းၵမ်တြႃးမႃးၵူႈပီပီ ဝႃႈၼႆ။
လိူဝ်ၼၼ်ႉ ပေႃးထိုင်ၶၢဝ်းမႆႈလႆႈပိုတ်ႇပၢင်သွၼ်လိၵ်ႈတႆး၊ လိၵ်ႈတဢၢင်း ပၼ်ၶိူဝ်းလႂ်ၶိူဝ်းၼၼ်ႉမႃး ၵူႈပီ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ