ၵူၼ်းဝၢၼ်ႈ ပၢင်ႇလေႃႉ ဝဵင်းလႃႈသဵဝ်ႈ ၵေႃႉၼိုင်ႈ ၵႂႃႇႁဵတ်းၵၢၼ်သူၼ် မၢၵ်ႇၵဵင် ၺႃးယိုဝ်းတီႈၼႂ်းထဵင် တၢႆထင်တီႈ။
ဝၼ်းတီႈ 19/10/2019 ယၢမ်းၵၢင်ၶိုၼ်း 9 မူင်းၶိုင်ႈၼၼ်ႉ လုင်းၸၢႆးမွင်ႇဝုၼ်း ဢႃယု 43 ပီ ၵူၼ်းဝၢၼ်ႈပၢင်ႇလေႃႉ ဢိူင်ႇ ၼွင်မွၼ် ၸႄႈဝဵင်းလႃႈသဵဝ်ႈ ၺႃးၵူၼ်းဢမ်ႇႁူႉၾၢႆႇ ငွႆးယိုဝ်း တီႈထဵင်သူၼ်မၢၵ်ႇၵဵင် လႆႈလူႉတၢႆထင်တီႈ။
ၵူၼ်းဝၢၼ်ႈ ပၢင်ႇလေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဢၼ်မႃးငွႆးယိုဝ်း လုင်းမွင်ႇဝုၼ်းၼႆႉ လႅပ်ႈယူႇ တၢင်း ၸဵင်ႇႁွင်ႇဝၼ်းဢွၵ်ႇထဵင်သေ မႃးပႅပ်ႉယုမ်းၽၵ်းမုင်ႈ ႁိမ်းထဵင် တေယၢၼ်ၵႆထဵင် မွၵ်ႈ 23 ထတ်းၼႆႉသေယိုဝ်း။ ၵွင်ႈဢၼ် မႃးယိုဝ်းၼၼ်ႉ ပဵၼ်ၵွင်ႈသတ်ႉယၢမ်း။ ႁၼ်လႆႈၸၢၵ်ႇမၢၵ်ႇၾႆး။ ၽႅၼ်ႇတပ်းၵွင်ႈယၢမ်းတူၵ်းဝႆႉႁိမ်းယုမ်းၽၵ်းမုင်ႈ” ဝႃႈၼႆ။
မၢၵ်ႇၵွင်ႈတိူဝ်ႉသႂ်ႇ လုင်းမွင်ႇဝုၼ်း 3 လုၵ်ႈ။ တႃႇ 2 လုၵ်ႈတႄႉ ပွင်ႇဢွၵ်ႇၶေႃးၵႂႃႇ။ တႃႇ 1 လုၵ်ႈတႄႉ ၶမ်ဝႆႉတီႈတူဝ်မၼ်း ၸၢႆး။ မိူဝ်ႈၽွင်းၺႃးယိုဝ်းၼၼ်ႉ လႅပ်ႈလုင်းမွင်ႇဝုၼ်းၼႆႉ တိုၵ်ႉၵူမ်ႈလဵၼ်ႈၾူၼ်းယူႇ ဝႃႈၼႆ။
လုင်းၸၢႆးမွင်ႇဝုၼ်းၼႆႉ ပဵၼ်ၽူဝ်ၼၢင်းမျႃႉၸိင်ႇ ယူႇတီႈဝၢၼ်ႈပၢင်ႇလေႃႉ မီးလုၵ်ႈႁူမ်ႈၵၼ် 4 ၵေႃႉ ၸၢႆး 3 ၵေႃႉ၊ ယိင်း 1 ၵေႃႉ ဝႃႈၼႆ။
ၵူၼ်းယိုဝ်းလုင်းမွင်ႇဝုၼ်းၼႆႉပဵၼ်ၽႂ်၊ မီးလွင်ႈသင်ၵၼ်တႄႉဢမ်ႇႁူႉ၊ ယူႇတီႈၾၢႆႇၸဝ်ႈၼႃႈတီႈ SSPP ၶဝ် တိုၵ်ႉၵူတ်ႇ ထတ်း သွၵ်ႈတဝ် တူဝ်ၵူၼ်းႁၢႆႉၼၼ်ႉယူႇ ၸဝ်ႈၼႃႈတီႈ SSPP ၸဝ်ႈၼိုင်ႈလၢတ်ႈ။
လုင်းၸၢႆးမွင်ႇဝုၼ်းၼႆႉ ဢႃယုလႆႈ 43 ပီ ပဵၼ်လုၵ်ႈၸၢႆး လုင်းၸရေးသၢင်ႇမူၼ်းလႄႈ ပႃႈဢွင်ႇ ပဵၼ်ၵူၼ်းၸႃတိ ဝၢၼ်ႈ ၸၢင်ႉ ၸႄႈဝဵင်းမိူင်းယႆ။ မႃးတႄႇၼႃႈႁိူၼ်း ၵိုၵ်းၸွမ်းၼၢင်းမျုႉၸိင်ႇ ၵူၼ်းဝၢၼ်ႈပၢင်ႇလေႃႉ ဢိူင်ႇၼွင်မွၼ် ၸႄႈဝဵင်း လႃႈသဵဝ်ႈ။
