ႁၢၼ်ႉၶၢႆၼမ်ႉမၼ်းရူတ်ႉ တၢင်းၶဝ်ႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ၺႃးၵူၼ်း ဢဝ်မၢၵ်ႇပွမ်းပွမ် လွၵ်ႇငိုတ်ႈ ၼႂ်းႁွင်ႈၼမ်ႉသေ သူင်ႇလိၵ်ႈ ယွၼ်းငိုၼ်း 10 သႅၼ်ပျႃး ဝႃႈၼႆ။
မိူဝ်ႈၼႆႉ ဝၼ်းတီႈ 21/10/2019 ယၢမ်းၵၢင်ၼႂ် ႁၢၼ်ႉၶၢႆၼမ်ႉမၼ်း DENKO ဢၼ်ပိုတ်ႇဝႆႉႁိမ်းဝၢၼ်ႈၶူဝ်ဢုင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၺႃးၵူၼ်း/ ဢဝ်မၢၵ်ႇပွမ်းပွမ်လွၵ်ႇငိုတ်ႈ ပၼ်လိၵ်ႈယွၼ်းငိုၼ်း 10 သႅၼ်ပျႃး ႁႂ်ႈၵႂႃႇပၼ် ၸွမ်းၼင်ႇ ၼႂ်းလိၵ်ႈတႅမ်ႈဝႆႉၼၼ်ႉ ဝႃႈၼႆ။
ၸၢႆးထုၼ်းဝိၼ်း ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်း ဝႆႉတႄႉ မၢၵ်ႇမႅင်းဢၼ်ႁၢင်ႈၵၢင်ဝႆႉၼၼ်ႉ ပဵၼ်မၢၵ်ႇမႅင်းဢၼ်ပွမ်။ ၽိူဝ်ႇၵႂႃႇထတ်းတူၺ်းတႄႉတႄႉ။ ၵူၼ်းဢၼ်မႃးႁဵတ်းၼၼ်ႉ ပဵၼ်ၽႂ်ၸုမ်းလႂ် ဢၼ်ဝႃႈၼၼ်ႉ ဢမ်ႇႁူႉၶႃႈ။ မၢၵ်ႇမႅင်း(ပွမ်) ၼၼ်ႉ ၶဝ်ႁၢင်ႈၵၢင်ဝႆႉ လုၵ်ႈၼိုင်ႈ တီႈ ၼႂ်းႁွင်ႈၼမ်ႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈၼႃႈတီႈပလိၵ်ႈၸႄႈဝဵင်းၵျွၵ်ႉမႄး လႆႈဢွၼ်ၵၼ်ၵႂႃႇၽဵဝ်ႈဢဝ်ဢွၵ်ႇမႃး ယၢမ်းၵၢင်ၼႂ် မွၵ်ႈ 7 မူင်းၼၼ်ႉ ဝႃႈၼႆ။
ၽူႈၸတ်းၵၢၼ် ႁၢၼ်ႉၶၢႆၼမ်ႉမၼ်း DENKO လၢတ်ႈတီႈသိုဝ်ႇၶၢဝ်ႇဢၼ်ၵပ်းထၢမ်ၼၼ်ႉဝႃႈ “ ၼႂ်းလိၵ်ႈၼၼ်ႉ ၶဝ်တႅမ်ႈ ဝႆႉဝႃႈ တီႈၼႂ်းႁွင်ႈၼမ်ႉၼၼ်ႉ မီးမၢၵ်ႇမႅင်းႁၢင်ႈၵၢင်ဝႆႉ သင်ဝႃႈ တဵၵ်းၼဵၼ်မၼ်းၵမ်းၼိုင်ႈၵူၺ်းၵေႃႈ မၢၵ်ႇတႅၵ်ႇယဝ်ႉ။ ၼင်ႇႁိုဝ် တေဢမ်ႇပဵၼ်ၼၼ်ႉ ၸွမ်းၼင်ႇလိၵ်ႈတႅမ်ႈဝႆႉၼၼ်ႉ ႁႂ်ႈဢဝ်ငိုၼ်းမႃးပၼ် 10 သႅၼ်ပျႃး” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၽူႈၸတ်းၵၢၼ် တီႈႁၢၼ်ႉၶၢႆၼမ်ႉမၼ်းၼႆႉ လႆႈၵပ်းၾူၼ်းပွင်ႇၶၢဝ်ႇၸူး ၸဝ်ႈၼႃႈ တီႈပလိၵ်ႈ ၵမ်းသိုဝ်ႈသေ ယူႇတီႈၸဝ်ႈၼႃႈတီႈပလိၵ်ႈ လႆႈမႃးၵူတ်ႇထတ်း ၽဵဝ်ႈမၢၵ်ႇမႅင်းၼၼ်ႉ။ ႁၢၼ်ႉၶၢႆၼမ်ႉမၼ်း ၵေႃႈလႆႈဢိုတ်း ဝႆႉၵမ်းၼိုင်ႈ ဝႃႈၼႆ။
ၸၢႆးထုၼ်းဝိၼ်း သိုပ်ႇလၢတ်ႈဝႃႈ “ တေႃႈလဵဝ်ၼႆႉ ၵၢၼ်ႁူမ်ႇလူမ်ႈၼႂ်းမိူင်းႁဝ်းၶႃႈၼႆႉ မၼ်းဢမ်ႇမီးၶႃႈ။ ယွၼ်ႉဢမ်ႇမီး ပၵ်းပိူင်ႁူမ်ႇလူမ်ႈလႄႈ ၼႂ်းၵျွၵ်ႉမႄးႁဝ်းၶႃႈၼႆႉ ၶႂ်ႈဝႃႈပဵၼ်ၵႂႃႇၵူႈၸိူဝ်ႉ ၵူႈပိူင်ယဝ်ႉ။ ႁဝ်းၶႃႈတႄႉ ႁၼ်ထိုင်ဝႃႈ ပၵ်းပိူင်ၼႆႉ မၼ်းဢမ်ႇမီးလွင်ႈႁူမ်ႇငမ်းလႆႈၵူႈဢၼ်/ ၵူႈတီႈလႄႈ ၵဵဝ်ႇၵပ်းႁူမ်ႇလူမ်ႈတႄႉ ၵူၼ်းမိူင်းႁဝ်းၶႃႈ ပဵၼ်ဢၼ်မႆႈၸႂ်ၵၼ် တႄႉတႄႉၶႃႈယဝ်ႉ” ဝႃႈၼႆ။
ၼႂ်းၸႄႈဝဵင်းၵျွၵ်ႉမႄးၼႆႉ မီးၸုမ်းယိပ်းၵွင်ႈၵၢင်ႇတူင်ႉၼိုင်ၵႂႃႇမႃးတင်းၼမ်၊ ၵူၼ်းႁေႃႈၵႃးတၢင်ႇဝူဝ်း/ ၵႂၢႆး ဢၼ်ၺႃးယိုဝ်း မၢတ်ႇၸဵပ်းလူႉတၢႆၵေႃႈမီးၼမ်။ ၵူၼ်းမိူင်းၸိူဝ်းၵႂႃႇႁႆႈ/ ၵႂႃႇသူၼ်ၵေႃႈ ၵႆႉယဵပ်ႇၺႃးမၢၵ်ႇၾင်လိၼ် မၢတ်ႇၸဵပ်းလူႇတၢႆၵေႃႈ မီးယူႇၵူႈလိူၼ်။
