တင်ႈတႄႇဝၼ်းတီႈ 20 ၼႆႉမႃး ၸိူဝ်ႉၶိူဝ်းတႆး ၼႂ်းၸႄႈဝဵင်းၼမ်ႉၶမ်း ႁူမ်ႈၵၼ်တႄႇႁဵတ်း ပွႆးသၢဝ်းသၢမ် ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။
ပွႆး 23 ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ပီၼႆႉ တႄႇၸတ်းႁဵတ်း 20-21/10/2019 တႃႇၶၢဝ်းတၢင်း 2 ဝၼ်း 3 ၶိုၼ်း တီႈ ဝတ်ႉၵေႃႇမိူင်း/ ၵျွင်းတေႃႇၵၢင်ဝဵင်း ပၢင်ႇပွႆးၵၢင်ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ မီးသင်ၶၸဝ်ႈလႄႈ တၵ်ႉၵႃႇသတ်ႉထႃး ၶဝ်ႈႁူမ်ႈလွင်းသွမ်း ၵိုၼ်းၶွၼ်ႈၼမ်။
ၸၢႆးမၢဝ်း ၵူၼ်းၼုမ်ႇတႆး ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ “ ပွႆး 23 တီႈၼမ်ႉၶမ်းႁဝ်းၶႃႈၼႆႉ ၸတ်းႁဵတ်းမႃးၵူႈပီၶႃႈ။ ပေႃးထိုင်မႃး လိူၼ်သိပ်းဢဵတ်းလွင်ႈ 8 ၶမ်ႈ။ မိူဝ်ႈၼႆႉ ဝၼ်းတီႈ 21 ယၢမ်းၵၢင်ၼႂ် 7 မူင်း လွင်းသွမ်းသင်ၶၸဝ်ႈ တင်း မူတ်း 400 တူၼ်။ ယဝ်ႉၵေႃႈ ဝၢႆးဝၼ်း 1 မူင်းသမ်ႉ တေဢွၼ်ၵၼ်လဵပ်ႈၶူဝ်းလူႇပၼ်ႇလဵပ်ႈဝဵင်းၼမ်ႉၶမ်းၶႃႈ” ဝႃႈၼႆ။
ပွႆးတၢၼ်းသင်ၶၸဝ်ႈ မိူဝ်ႈၼႆႉ ယၢမ်းၵၢင်ၼႂ် 7 မူင်း တႄႇဢဝ်တီႈၽၵ်းတူဝတ်ႉၵျွင်းတေႃႇၵၢင်ဝဵင်းသေ ပႆတုင်းသွမ်း ထိုင် ပွၵ်ႉလူင် ဝတ်ႉမင်ၵလႃ တင်းမူတ်း သင်ၶၸဝ်ႈ 400 တူၼ်။
ၸၢႆးမၢဝ်း သိုပ်ႇလၢတ်ႈဝႃႈ “ ပွႆး 23 တီႈၼမ်ႉၶမ်းႁဝ်းၶႃႈ ပီၼႆႉ တေႁဵတ်း 2 ဝၼ်း 3 ၶိုၼ်းၶႃႈ။ မိူဝ်ႈဝႃးတႄႉ လဵပ်ႈၶူဝ်းလူႇ/ လဵပ်ႈတူၼ်ႈ လူင်းၵႂႃႇပွတ်းတၢင်းတႂ်ႈၼမ်ႉၶမ်း။ မိူဝ်ႈၼႆႉသမ်ႉ တေလဵပ်ႈမႃးတၢင်းပွတ်းၼိူဝ် ၼမ်ႉၶမ်းႁဝ်းၼႆႉၶႃႈ”ဝႃႈၼႆ။
ပွႆး 23 ဝဵင်းၼမ်ႉၶမ်းၼႆႉ ယၢမ်းၵၢင်ၶမ်ႈသမ်ႉ မီးၸၢတ်ႈသႅင်းတႆး၊ ပၢင်ႁွင်ႉၽဵင်းၵႂၢမ်းတႆးပၢၼ်မႂ်ႇ လဝ်ႇမူၼ်ႈ တူၼ်ႈၸႂ်ပၼ် ဝႃႈၼႆ။
ပွႆး 23 ဝဵင်းၼမ်ႉၶမ်းၼႆႉ တႄႇႁဵတ်းမႃး ႁူဝ်ပၢၵ်ႇပီ ၸဵမ်မိူဝ်ႈပၢၼ်ၸဝ်ႈၾႃႉမႃး တေႃႇထိုင်ယၢမ်းလဵဝ် လိူဝ်ၼၼ်ႉ မီးၵူၼ်း ၶဝ်ႈႁူမ်ႈၵိုၼ်းၶွၼ်ႈၵူႈပီ ဝႃႈၼႆ။ ယွၼ်ႉႁဵတ်းပွႆးတၢၼ်း/ ပွႆးလမ်ႁူဝ်(ၵၢၼ်ႇတေႃး) ၽြႃး၊ တြႃး၊ သင်ၶလႄႈ ၸဝ်ႈၸွမ်တႆး ၼႂ်းလိူၼ် 11 လွင်ႈ ပႅတ်ႇၶမ်ႈ ၼပ်ႉဢဝ်ၶမ်ႈဝၼ်းတီႈ 1 လိူၼ်သိပ်းဢဵတ်းမႂ်ႇ 1 ၶမ်ႈ တေႃႇလိူၼ် 11 လွင်ႈ 8 ၶမ်ႈ မီး 23 ဝၼ်းလႄႈ ႁွင်ႉႁိၵ်ႈပွႆးသၢဝ်းသၢမ်ၵိုၵ်း ၵပ်းၸိူဝ်ႉၶိူဝ်းတႆးမႃး ၼပ်ႉႁူဝ်ပၢၵ်ႇပီ တေႃႇဝၼ်းမိူဝ်ႈၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ