ၸဝ်ႈသိလ်ထမ်းဝုၼ်းၸုမ်ႉ(ႁိုဝ်/ ၸဝ်ႈမိူင်းၽူင်း) ယေႃးတူဝ်ၶဝ်ႈထမ်ႈ တိုဝ်းၵမ်သိလ်ထမ်း 3 ပီ 3 လိူၼ်ပၢႆ 3 ဝၼ်း တီႈ ထမ်ႈမိူင်းၵႅတ်ႇ ၸိုင်ႈတႆး ပွတ်းဢွၵ်ႇ ၶွပ်ႈတဵမ် 6 လိူၼ်ၼႆႉ လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ ႁူမ်ႈၵၼ်သုတ်ႇမုၼ်း သူင်ႇမဵတ်ႉတႃႇထိုင်။
ဝၼ်းတီႈ 20/10/2019 ယၢမ်းဝၢႆးဝၼ်း 3:30 ထိုင် 4:30 မူင်း လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ တင်း တၵ်ႉၵႃႇသတ်ႉ ထႃး ႁူမ်ႈၵၼ် သုတ်ႇမုၼ်းသူင်ႇမဵတ်ႇတႃႇထိုင် ၸဝ်ႈသိလ်ထမ်းဝုၼ်းၸုမ်ႉ တီႈဝတ်ႉမႂ်ႇတႆး သႃထုပရႃတိတ်ႇ၊ သွႆး 44/1 ယၢၼ်းၼႃးဝႃး၊ မိူင်းၵွၵ်ႇ ၸိုင်ႈထႆး။
ၸဝ်ႈၶူး ဢိတ်ႉသရိယ ႁူဝ်ပဝ်ႈ လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ဢိင်ၼိူဝ် ၸဝ်ႈ သိလ်ထမ်းပေႃႈ မဵတ်ႇတႃႇထိုင်ဝႆႉ မိူဝ်ႈၸဝ်ႈႁဝ်းတေၶဝ်ႈထမ်ႈၼၼ်ႉ ပေႃးဝႃႈ ထိုင်မႃး 3 လိူၼ် 1 ပွၵ်ႈၸိုင် ႁႂ်ႈသင်ၶၸဝ်ႈ လႄႈ တၵ်ႉၵႃႇသတ်ႉထႃး တီႈၸမ်ၵႆ ဢွၼ်ၵၼ်မႃးသုတ်ႇမုၼ်းတီႈၼႃႈပၢၵ်ႇထမ်ႈ။ ဢိင်ဢဝ်ဢၼ်ၼၼ်ႉသေ ႁဝ်းၶႃႈ သင်ၶၸဝ်ႈ ယူႇတီႈလႂ် မီးတီႈလႂ်ၵေႃႈ ဢွၼ်ၵၼ်သုတ်ႇမုၼ်းသူင်ႇမဵတ်ႉတႃႇ ႁူမ်ႈသၢင်ႈပႃႇရမီႇၸွမ်းၶူးဝႃးႁဝ်း ဢၼ်ၶဝ်ႈ ထမ်ႈ 3 ပီ 3 လိူၼ် 3 ဝၼ်းၼၼ်ႉၶႃႈ” ဝႃႈၼႆ။
သိုပ်ႇလၢတ်ႈဝႃႈ “ယိူင်းဢၢၼ်းတႄႉ ႁႂ်ႈၶူးဝႃးႁဝ်းၶႃႈ လႆႈထၢပ်ႈသၢင်ႈပႃႇရမီႇ တိုဝ်းၵမ်ၽႃဝၼႃႇ ငၢႆႈငၢႆႈလူမ်လူမ်ၵႂႃႇ ယႃႇႁႂ်ႈ မီးဢၼ်ယႃႉဢၼ်ၵဝ်းသေၵမ်း” ဝႃႈၼႆ။
ပၢင်သုတ်ႇမုၼ်းသူင်ႇမဵတ်ႉတႃႇထိုင် ၸဝ်ႈသိလ်ထမ်းဝုၼ်းၸုမ်ႉ ၶဝ်ႈထမ်ႈတိုဝ်းၵမ် တီႈထမ်ႈမိူင်းၵႅတ်ႇၼႆႉ သင်ၶတႆး တင်း တၵ်ႉၵႃႇသတ်ႉထႃး မိူင်းၵွၵ်ႇ ႁူမ်ႈၵၼ်သုတ်ႇမုၼ်း တင်းမူတ်း မွၵ်ႈ 150 တူၼ်/ ၵေႃႉ ဝႃႈၼႆ။
လုၵ်ႈႁဵၼ်းသင်ၶတႆး ၸၼ်ႉၸွမ် မိူင်းၵွၵ်ႇၼႆႉ ၸတ်းႁဵတ်းမႃး ပၢင်သုတ်ႇမုၼ်း သူင်ႇမဵတ်ႉတႃႇထိုင် ၸဝ်ႈသိလ်ထမ်းဝုၼ်း ၸုမ်ႉၼႆႉ မီးမႃး 2 ပွၵ်ႈယဝ်ႉ။ မိူဝ်ႈပွၵ်ႈၵမ်းႁႅၵ်ႈၼၼ်ႉ ၸတ်းႁဵတ်းတီႈၸၼ်ႉၸွမ်မႁႃၸူးလႃးလူင်းၵွၼ်း ဢယုတ်ႉထယႃး ဝၢင်းၼွႆႉ။ ပွၵ်ႈၵမ်း 2 ၼႆႉသမ်ႉ လႆႈၸတ်းႁဵတ်းတီႈဝတ်ႉမႂ်ႇတႆး ဝႃႈၼႆ။
လိူဝ်ၼၼ်ႉ သင်ၶၸဝ်ႈ ၼႂ်းမိူင်းတႆး/ ၼွၵ်ႈမိူင်းၵေႃႈ ႁူမ်ႈၵၼ်သုတ်ႇမုၼ်းသူင်ႇမဵတ်ႉတႃႇထိုင် ၸဝ်ႈသိလ်ထမ်းဝုၼ်းၸုမ်ႉ ယူႇ ဝႃႈၼႆ။
မိူဝ်ႈဝၼ်းတီႈ 23-24/7/2019 ၼၼ်ႉ ၸဝ်ႈတူၼ်ၶူးလူင် ပၺ်ႇၺႃႇၼၼ်ႇတ ႁူဝ်ပဝ်ႈသင်ၶၸဝ်ႈၸိုင်ႈတႆး ဝတ်ႉ ထၢတ်ႈ တေႃႇလွႆလႅမ် ဢွၼ်ႁူဝ်သင်ၶၸဝ်ႈ ၸိုင်ႈတႆးသေ ၵႂႃႇလွတ်ႈႁေႃႈပလိၵ်ႈလူင် 11 သုတ်ႈ၊ လွတ်ႈႁေႃးထမ်မၸၵ်ႇၵျႃႇ လႄႈ သူင်ႇမဵတ်ႉတႃႇပၼ်ၽီသၢင်သတ်းၵူၼ်း တီႈပၢၵ်ႇထမ်ႈမိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းသၢတ်ႇ ၸိုင်ႈတႆးပွတ်း ဢွၵ်ႇၶူင်း။
ၸဝ်ႈပေႃႈသိလ်ထမ်းဝုၼ်းၸုမ်ႉၼႆ့ ၼုင်ႈၽႃႈလိူင်သၢင်ႇၵၢၼ်းၸဵမ်မိူဝ်ႈဢႃယု 11 ၶူပ်ႇ တိုဝ်းၵမ်သိလ်ထမ်းၸိုဝ်ႈယႂ်ႇၵိုၵ်း ၵပ်းၶိူဝ်းတႆးမႃး။ မိူဝ်ႈပီ2010/04/18 ၶဝ်ႈတိုဝ်းၵမ်သိလ်ၼႂ်းထမ်ႈရၢတ်ႉၶျၶိုဝ်ႊ ဢိူင်ႇဝၢၼ်ႈဢွၼ်ႉ ၸႄႈဝဵင်းငၢဝ်း ၸႄႈတွၼ်ႈလမ်းပၢင်း (ถ้ำราชคฤห์ บ้านแม่แก้ หมู่ที่ 5 ตำบลบ้านอ้อน อำเภองาว จังหวัดลำปาง) တႃႇၶၢဝ်းတၢင်း 3 ပီ 3လိူၼ် 3 ဝၼ်း မၼ်းၸဝ်ႈ ဢွၵ်ႇထမ်ႈမိူဝ်ႈဝၼ်းတီႈ 21/07/2013။ ဝၢႆးဢွၵ်ႇထမ်ႈ ယဝ်ႉ ဢွၵ်ႇၶၢဝ်းတၢင်းပိုၼ်ၽႄႈ သႃသၼႃ မိူင်း တႆး၊ မိူင်းမၢၼ်ႈ၊ မိူင်းထႆး၊ မိူင်းပူႊတၢၼ်ႊ၊ မိူင်းသိင်ႇၶပူဝ်ႊ၊ မိူင်းမလေႊသျိူဝ်ႊ ၸိူဝ်းၼႆ့သေ ၶဝ်ႈတိုဝ်းၵမ်ၼႂ်းထမ်ႈ ၶိုၼ်း တႃႇၶၢဝ်း တၢင်း 3 ပီ 3လိူၼ် 3 ဝၼ်း တီႈထမ်ႈမိူင်းၵႅတ်ႇ ဢိူင်ႇမိူင်းၵႅတ်ႇ ၸႄႈဝဵင်းမိူင်းသၢတ်ႇ ၸိုင်ႈတႆးပွတ်းဢွၵ်ႇ ၶူင်း။
သိလ်ထမ်းၸဝ်ႈဝုၼ်းၸုမ်ႉၼႆႉ ယွၼ်ႉသၢင်ႈဝတ်ႉသၢင်ႈဝႃး ၶၢင်ႈၾင်ႇၼမ်ႉၶွင် ဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်းသေ ပိုၼ်ၽႄသႃသၼႃလႄႈ ၸပ်းၸိုဝ်ႈၸဝ်ႈမိူင်းၽူင်းမႃးတေႃႇထိုင်ဝၼ်းမိူဝ်ႈၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ