တႆးႁွတ်ႈၵဵင်းမႆႇ တေႁူမ်ႈၵၼ်ၵႃႈၼူၵ်ႉ/ ၵႃႈတူဝ်း ၼႄၾၢင်ႁၢင်ႈတႆး ၾိင်ႈထႆးႁဵတ်းပွႆး “ ပွႆးလွႆးၵရထူင်း” ပွႆးတွပ်ႇတႅၼ်း ၵုင်ႇမုၼ်မႄႈၼမ်ႉ ဝႃႈၼႆ။
ပေႃးထိုင်မႃး ဝၼ်းတီႈ 12/11/2019 ယၢမ်းၵၢင်ၶမ်ႈ 6 မူင်းၸိုင် ယူႇတီႈၶွင်ႇသီႇၸၢဝ်းၶိူဝ်းတႆး ၵဵင်းမႆႇ တင်း သမႃးၽၼ်း ၶျူၼ်ႊၶျၢတ်ႉတႆး တေဢွၼ်ႁူဝ်ၼမ်းၼႃႈသေ ၶဝ်ႈႁူမ်ႈပႆၼႄၾၢင်ႁၢင်ႈမိၵ်ႈမၢႆတႆး ဢိၵ်ႇပႃး တၢင်းၵႃႈၾိင်ႈႁိတ်ႈႁွႆးတႆး ၼူၵ်ႉ/ တူဝ်း တေတႄႇဢဝ်တီႈၸဵင်ႇၶူးမိူင်း ၼႂ်းၵႄႈၽၵ်းတူ ၵဵင်းမႆႇ – ၽၵ်းတူတႃႈၽႄး ပႆထိုင် ၵၢတ်ႇမိူင်းမႂ်ႇ ၸႄႈဝဵင်းၵဵင်း မႆႇ ၸိုင်ႈထႆး။
ၸၢႆးသႅင်မိူင်း မင်းၵွၼ်း ႁူဝ်ပဝ်ႈ ၶွင်ႇသီႇၸၢဝ်းၶိူဝ်းတႆး (สภาชาติพันธุ์ ไทยใหญ่) လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ ႁဝ်းၶႃႈ တေ ဢွၼ်မိူဝ်းၶဝ်ႈႁူမ်ႈ ၼႂ်းဝၼ်းပွႆးလွႆၵရႃႇထူင်းယႂ်ႇ ဝၼ်းတီႈ 12 ၼၼ်ႉၶႃႈ။ တေၶဝ်ႈၶႅင်ႇတၢင်းၵႃႈပႃးၶႃႈဢေႃႈ ပီၼႆၵေႃႈ။ မိူဝ်ႈပီ ပူၼ်ႉၵေႃႈ ၶဝ်ႈႁူမ်ႈၶႅင်ႇယူႇၶႃႈ။ ယွၼ်ႉၼၼ် တုၵ်းသူၼ်းထိုင် ပီႈၼွင်ႉတႆးႁဝ်း ၼႂ်းၵဵင်းမႆႇ တီႈၸမ်ၵႆ ဢွၼ်ၵၼ်မႃး ၶဝ်ႈ ႁူမ်ႈပႆၼႄၾၢင်ႇႁၢင်ႈမိၵ်ႈမၢႆတႆးႁဝ်းၶႃႈၼမ်ၼမ်သေၵမ်း” ဝႃႈၼႆ။
သိုပ်ႇလၢတ်ႈဝႃႈ “ ပီၼႆႉ ႁဝ်းၶႃႈ တေတုမ်ၵၼ် တီႈၸဵင်ႇၶူးမိူင်း ၼႂ်းၵႄႈၽၵ်းတူတႃႈၽႄး တင်း ၽၵ်းတူၵဵင်းမႆႇ။ လိူဝ် ၼၼ်ႉ ႁႂ်ႈပီႈၼွင်ႉတႆးႁဝ်း ဢွၼ်ၵၼ်ၼုင်ႈၶူဝ်းတႆးတဵမ်ႁၢင်ႈသေ မႃးၶဝ်ႈႁူမ်ႈၶႃႈ။ ယဝ်ႉၵေႃႈ ၶႂ်ႈၾၢင်ႉထိုင်ထႅင်ႈဢၼ် ၼိုင်ႈတႄႉ ၼၢင်းယိင်းၶဝ် ယႃႇပေတိုဝ်းၶႅပ်းသူၼ်ႈသုင်ၵၼ်ၶႃႈ ယွၼ်ႉမၼ်းတေလႆႈပႆၵႆဢိတ်းၼိုင်ႈလႄႈ ၵူဝ်တိၼ် ၸဵပ်း” ဝႃႈၼႆ။
ပၢင်ၼႄၾၢင်ႁၢင်ႈမိၵ်ႈမၢႆတႆး ၼႂ်းဝၼ်းပွႆးလွႆးၵရထူင်း ၵဵင်းမႆႇ ၸိုင်ႈထႆးၼၼ်ႉ ယူႇတီႈပီႈၼွင်ႉတႆးၼႂ်းၵဵင်းမႆႇ ႁူမ်ႈၵၼ် ပႆၼႄမႃး တႄႇဢဝ်ပီ 2017 မႃး။ ပီ 2018 တႄႇၶဝ်ႈႁူမ်ႈၶေႉၶဵင်ႇပႆၼႄၾၢင်ႁၢင်ႈတၢင်းၵႃႈတၢင်းဝႅၼ်ၼၢင်းငၢမ်းပႃး။ ပီ 2019 ၼႆႉၵေႃႈ တေၶဝ်ႈႁူမ်ႈထႅင်ႈ ဝႃႈၼႆ။
လိူဝ်ၼၼ်ႉ သင်ဝႃႈ ပီႈၼွင်ႉတႆး/ ႁႅင်းၵၢၼ်တႆး ၼႂ်းၵဵင်းမႆႇ ၶႂ်ႈတွင်ႈထၢမ် လၢႆးႁူဝ်ယွႆႈယႅမ်းမၼ်းၼႆၸိုင် ၵပ်းသိုပ်ႇလႆႈတီႈ မၢႆၾူၼ်း 081-7657817 ။