မိူဝ်ႈၼႆႉ ဝၼ်းတီႈ 18/10/2019 ယၢမ်းၵၢင်ၼႂ် 10 မူင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA တင်း လွင်ႈ ငမ်းယဵၼ်လႄႈ သုၼ်ၵၢင်မႄးလီ ၼႂ်းၸိူဝ်ႉၸၢတ်ႈ NRPC ႁူပ်ႉၵၼ် ၼွၵ်ႈလႅၵ်ႈ တီႈၵဵင်းမႆႇ ၸိုင်ႈထႆး ဝႃႈၼႆ။
ၸဝ်ႈၶိုၼ်းသႂ် ၸႂ်ယဵၼ် ၽူႈၵိူဝ်းၵုမ် PPSTလႄႈ ၽူႈၵိူဝ်းၵုမ် RCSS လၢတ်ႈတီႈၽူႈတွႆႇႁွၵ်ႈဝႃႈ “ RCSS တင်း NRPC ႁူပ်ႉ ၵၼ် မိူဝ်ႈၼႆႉ တေဢုပ်ႇဢူဝ်းၵၼ်ၵေႃႈ တေပဵၼ်ၶၵ်ႉၵၢၼ်လွင်ႈငမ်းယဵၼ်ၵူၺ်း” ဝႃႈၼႆ။
တၢင်းၾၢႆႇ NRPC သမ်ႉ ဢၼ်မႃးႁူပ်ႉၵၼ်တင်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႈၵဵင်းမႆႇ ၸိုင်ႈထႆးတႄႉ ပဵၼ် ဢူးၶိၼ်ႇ ၸေႃႇဢူး၊ ဢူးၸေႃႇထေး၊ ဢူးလႃႉမွင်ႇသူၺ်ႇ၊ ဢူးမူဝ်းသေႃႇဢူး၊ ဢူးၵျေႃႇလိၼ်းဢူး။ တၢင်းၾၢႆႇ RCSS သမ်ႉ ၸွမ်ႁၢၼ် ပွင်ၶိူဝ်း၊ ၸဝ်ႈသိုၵ်းလူင် ၸၢႆးငိုၼ်း၊ ၸၢႆးလႅင်း၊ ၸၢႆးဢူး လႄႈ ၸဝ်ႈႁၢၼ် ၸိူင်းသႅၼ်မႂ်ႇ ၸိူဝ်းၼႆႉ ဝႃႈၼႆ။
“လႆႈႁူႉတႄႉ မိူဝ်ႈၼႆႉ ဝၼ်းတီႈ 18/10/2019 ယၢမ်းဝၢႆးဝၼ်း 1 မူင်း ယူႇတီႈ ပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် KNPP ၵႅမ်ႁူဝ်ပဝ်ႈ ၶူႇဢူးရႄႇ တင်း NRPC ႁူပ်ႉၵၼ် ” ၸဝ်ႈၶိုၼ်းသႂ် ၸႂ်ယဵၼ် လၢတ်ႈၼႄၼင်ႇၼႆ။
ၶၢဝ်းတၢင်း NRPC ႁူပ်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႈၵဵင်းမႆႇ ၸိုင်ႈထႆးၼၼ်ႉ လႆႈႁူပ်ႉၵၼ် ပႃးတင်း ၸုမ်းလူင်းလၢႆး မိုဝ်း NCA လႄႈ ၸုမ်းပႆႇလူင်းလၢႆးမိုဝ်း NCA ၸိူဝ်းၼႆႉ။
လိူဝ်သေၼၼ်ႉ ယင်းမီးၶၢဝ်ႇဝႃႈ NRPC တေႁူပ်ႉပႃး ႁူဝ်ပဝ်ႈလူင် KIO ဝႃႈၼႆသေတႃႉ ယူႇတီႈၽူႈတွႆႇႁွၵ်ႈတႄႉ ပႆႇယိုၼ် ယၼ်လႆႈ။
