ၵူၼ်းမိူင်းၶႄႇ 5 ၵေႃႉ ပွမ်တူဝ်ပဵၼ်ပလိၵ်ႈမၢၼ်ႈသေ လၵ်ႉၶဝ်ႈမႃးၼႂ်းၼႃႈလိၼ်ၽွင်းငမ်းတူဝ်ၵဝ်ႇ ၵဝ်ႈၵၢင်ႉ ဝဵင်းလၢဝ်ႇၵၢႆး လႅၼ်လိၼ် တႆး – ၶႄႇ ပလိၵ်ႈမၢၼ်ႈတီႉၺွပ်းၵူတ်ႇထတ်းဝႆႉယူႇ ဝႃႈၼႆ။
ဝၼ်းတီႈ15/10/2019 ယၢမ်းၵၢင်ၶမ်ႈ ပလိၵ်ႈမၢၼ်ႈဝဵင်းလၢဝ်ႇၵၢႆး တီႉၺွပ်းၵူၼ်းၸၢဝ်းၶႄႇ 5 ၵေႃႉ လၵ်ႉၶဝ်ႈမိူင်း တီႈၼႂ်း ၼႃႈလိၼ် သူၺ်ႇသိၼ် ဝဵင်းလၢဝ်ႇၵၢႆး။
ၸေႃႇၶိၼ်ႇဢွင်ႇ ၽူႈၵွၼ်းပလိၵ်ႈၸႄႈမိူင်းတႆး လၢတ်ႈတီႈၽူႈတွႆႇႁွၵ်ႈဝႃႈ “ လႆႈငိၼ်းၶၢဝ်ႇဝႃႈ မီးၸၢဝ်းၶႄႇ 5 ၵေႃႉ လၵ်ႉ ၶဝ်ႈမိူင်းသေလႄႈ ၶဝ်တီႉၺွပ်းဝႆႉၼႆ။ ၶႄႇ 5 ၵေႃႉၼၼ်ႉ ၸွင်ႇၶဝ်ၼုင်ႈၶူဝ်းပလိၵ်ႈမၢၼ်ႈမႃးၼႆ ႁဝ်းၶႃႈ ပႆႇလႆႈႁူႉတႅတ်ႈ တေႃး” ဝႃႈၼႆ။
ပလိၵ်ႈမၢၼ်ႈၵူတ်ႇထတ်းၸၢဝ်းၶႄႇ 5 ၵေႃႉ လႆႈႁၼ်မႅၼ်ႈပႃးသိူဝ်ႈၶူဝ်း ပလိၵ်ႈမၢၼ်ႈ 2 ၸုမ်ႇ၊ သေႃးမိုဝ်း 5 ဢၼ်၊ သိူဝ်ႈ ႁႄႉမၢၵ်ႇၵွင်ႈ 1 ၽိုၼ်၊ ၵွင်ႈပွတ်း 9 မမ (ၵွင်ႈပွမ်/ ဢမ်ႇမီးမၢၵ်ႇ) 2 လဝ်း၊ ၵွင်ႈ M 22 သီလမ် (ပွမ်) ၸဵမ်ၸိူဝ်းၼႆႉ။
ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈဝဵင်းလၢဝ်ႇၵၢႆး လႆႈပိုတ်ႇလိူင်ႈ ၵူၼ်းၸၢဝ်းၶႄႇ 5 ၵေႃႉၼႆႉဝႆႉတီႈႁူင်းပလိၵ်ႈလူၺ်ႈ မၢႆမီႈ မၢတ်ႉတႃ 170 ဝႃႈၼႆ။
