ၵူၼ်းဝၢၼ်ႈပၢင်ႇသိမ်ႇ ၽူႈၸၢႆး 2 ၵေႃႉ ႁိမ်ၼမ်ႉၼႃးၵၼ် ထိုင်တီႈၽိတ်းမေႃးၵၼ် ပေႃႉထုပ်ႉ ႁူဝ်ၵၼ်တႅၵ်ႇ ဢွၵ်ႇလိူတ်ႈ။
ဝၼ်းတီႈ 16/10/2019 ယၢမ်းၵၢင်ၼႂ် 9 မူင်း လုင်းၸၢႆးဢွင်ႇပီး ဢႃယု 62 ပီ တင်း လုင်းၸၢႆးၵျေႃႇ ဢႃယု 48 ပီ ၽိတ်းမေႃး ၵၼ် လွင်ႈႁိမ်ၼမ်ႉၼႃးၵၼ် တီႈႁူဝ်ၾၢႆ ၼႂ်းၼႃးလုင်းၸၢႆးၵျေႃႇ ယၢၼ်ၵႆဝၢၼ်ႈပၢင်ႇသိမ်ႇ 5 ၵီႊလူဝ်ႊ မီးၾၢႆႇၸၢၼ်းဝၢၼ်ႈ ပၢင်ႇသိမ်ႇ ၼႂ်းဢိူင်ႇမိူင်းၸိတ်ႇ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ လုင်းၸၢႆးၵျေႃႇ ဢဝ်မႆႉသၢင်း တၢင်းယၢဝ်းမွၵ်ႈသွၵ်ႇ ပၢႆၼၼ်ႉ ထုပ်ႉသႂ်ႇလုင်းၸၢႆးဢွင်ႇပီး ဝႃႈၼႆ။
ၸၢႆးလႃႉ ၵူၼ်းမိူင်းၸိတ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်ႁိမ်ၼမ်ႉၼႃးၵၼ်ဢိူဝ်ႈ။ မိူဝ်ႈပူၼ်ႉမႃး ၾူၼ်ဢမ်ႇမႃး ၼမ်ႉၼႃး ႁႅင်ႈ၊ ဝၼ်း- သွင်ဝၼ်းမႃးၼႆႉ ၾူၼ်တူၵ်း ၼမ်ႉၵေႃႈၶိုၼ်းမီးသေလႄႈ ႁိမ်ၼမ်ႉၵၼ် ၽႂ်ၵေႃႈ လူဝ်ႇသႂ်ႇၼႃးၽႂ် ၼႃးမၼ်း။ ၼႃးၶဝ်သွင်ၵေႃႉၼႆႉ ၸမ်ၵၼ် ၸႂ်ႉႁွင်ႈၼမ်ႉဢၼ်လဵဝ်ၵၼ်။ ၼႃးတၢင်းမိူင်းႁဝ်းၼႆႉ ပဵၼ်ၼႃး ၼမ်ႉၾႃႉ ပေႃးၾူၼ်မႃး ၵေႃႈလႆႈၼမ်ႉ။ ပေႃးၾူၼ်ဢမ်ႇမႃးၵေႃႈဢမ်ႇမီးၼမ်ႉ” ဝႃႈၼႆ။
ၵေႃႉမၢတ်ႇၸဵပ်း ပဵၼ်လုင်းၸၢႆးဢွင်ႇပီး။ ၵွၵ်းႁူဝ်ၾၢႆႇ သၢႆႉတႅၵ်ႇ။ တေႃႈလဵဝ်တႄႉ လႆႈဢဝ်ၵႂႃႇယူတ်းယႃယဝ်ႉ။ တွၼ်ႈတႃႇ လုင်းၸၢႆးၵျေႃႇၼၼ်ႉတႄႉ ယူႇတီႈၽူႈမီးပုၼ်ႈၽွၼ်း တၢင်းၼႃႈလိၼ် မၢႆ 1 ပွတ်းႁွင်ႇ SSPP ၊ ႁွင်ႉၵႂႃႇထဵတ်ႈထၢမ်ဝႆႉ ဝႃႈ ၼႆ။
လုင်းၸၢႆးဢွင်ႇပီး တင်း ၸၢႆးၵျေႃႇၼႆႉ ပဵၼ်ၵူၼ်းဝၢၼ်ႈလဵဝ်ၵၼ် ၵူၼ်းဝၢၼ်ႈပၢင်ႇသိမ်ႇ ဢိူင်ႇမိူင်းၸိတ်ႇ ၸႄႈဝဵင်းသီႇပေႃႉ ဝႃႈၼႆ။
