ပူႇၵႄႇ မၢၼ်ႈၵွင်း ဢိူင်ႇၼႃးၵုၼ်လူင် ၸႄႈဝဵင်းလႃႈသဵဝ်ႈ ၺႃးၸုမ်းဢမ်ႇႁူႉၾၢႆႇယိုဝ်းတၢႆ။
ဝၼ်းတီႈ 15/10/2019 ယၢမ်းၵၢင်ၼႂ် လုင်းမႃႇၵူး ဢႃယု 60 ပီ ပူႇၵႄႇ/ ၵူၼ်းလူင်ဝၢၼ်ႈ မၢၼ်ႈၵွင်း ၺႃးၸုမ်းဢမ်ႇႁူႉၾၢႆႇ ယိုဝ်း မၢၵ်ႇၵွင်ႈတိူဝ်ႉၸွမ်းတူဝ် 6 ႁွႆးသေ လူႉတၢႆထင်တီႈ တီႈႁိူၼ်းမၼ်းၸၢႆး။
ၸၢႆးထုၼ်း ၸုမ်းၵူၼ်းၼုမ်ႇ ၸွႆႈထႅမ်တူင်ႇဝူင်းၵူၼ်း ၸႄႈဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ႁဝ်းၶႃႈ လႆႈ ႁပ်ႉၸႅင်ႈလႄႈ ယၢမ်းၵၢင်ဝၼ်းတဵင်ႈၼၼ်ႉ ႁဝ်းၶႃႈ ဢွၼ်ၵၼ်ၵႂႃႇဢဝ်ၶၢပ်ႈတူဝ်လုင်းမႃႇၵူးမႃး။ တၢင်းၵႂႃႇဝၢၼ်ႈၶဝ်ၼၼ်ႉ ယၢပ်ႇၼႃႇ။ ယွၼ်ႉၾူၼ်တူၵ်းႁႅင်းသေ သဵၼ်းတၢင်းယၢပ်ႇၶႃႈဢေႃႈ။ တေႃႈလဵဝ် တူဝ်တၢႆလုင်းမႃႇၵူးၼႆႉ လႆႈဢဝ်မႃး ဝႆႉတီႈႁူင်းယႃ လႃႈသဵဝ်ႈယဝ်ႉ” ဝႃႈၼႆ။
လုင်းမႃႇၵူးၼႆႉ တိူဝ်ႉၺႃးမၢၵ်ႇၵွင်ႈ တီႈၼႃႈၽၢၵ်ႇသိုဝ်ႈသိုဝ်ႈ ႁွႆးၼိုင်ႈ။ တီႈၶေႃး ႁွႆးၼိုင်ႈ၊ တီႈဢူၵ်း 2 ႁွႆးလႄႈ တီႈၵုမ်ႇၵူၼ်ႈ 2 ႁွႆး။
ၵဵဝ်ႇၵပ်းလွင်ႈၼႆႉ တေႃႈလဵဝ် ယူႇတီႈပလိၵ်ႈၶဝ် လႆႈပိုတ်ႇလိူင်ႈ ဝႆႉတီႈႁူင်းပလိၵ်ႈၸႄႈဝဵင်းလႃႈသဵဝ်ႈ ၸွမ်းၼင်ႇပၵ်းပိူင် မၢႆမီႈဝၢၼ်ႈမိူင်းမီး။ ယဝ်ႉၵေႃႈ တိုၵ်ႉၵူတ်ႇထတ်းတူၺ်းယူႇ ဝႃႈပဵၼ်ၼမ်ႉမိုဝ်းၽႂ် ၸုမ်းလႂ်၊ ယွၼ်ႉသင်လႄႈယိုဝ်း ၸဵမ်ၸိူဝ်း ၼႆႉ ဝႃႈၼႆ။
