တၵ်ႉၵႃႇသတ်ႉထႃး ၼႂ်းၸႄႈဝဵင်းလၢႆးၶႃႈ ႁူမ်ႈၵၼ်လူႇတၢၼ်း/ လွင်းသွမ်း ပွႆးၽြႃးလူင်းမိူင်း လိူၼ်သိပ်းဢဵတ်းလွင်ႈ 3 ၶမ်ႈ ၵိုၼ်းၶွၼ်ႈၼမ်။

မိူဝ်ႈၼႆႉ ဝၼ်းတီႈ 16/10/2019 (တူၵ်းမႅၼ်ႈလိူၼ်သိပ်းဢဵတ်းလွင်ႈ 3 ၶမ်ႈ) ယၢမ်းၵၢင်ၼႂ် 7 မူင်း ထိုင် 10 မူင်းၶိုင်ႈၼၼ်ႉ တၵ်ႉၵႃႇသတ်ႉထႃး ၼႂ်းၸႄႈဝဵင်းလၢႆးၶႃး ႁူမ်ႈၵၼ်လူႇတၢၼ်း ၼႂ်းပွႆးၽြႃးလူင်းမိူင်း။ သင်ၶၸဝ်ႈ ၶဝ်ႈႁူမ်ႈတုင်းသွမ်း မွၵ်ႈ 1,300 တူၼ်။ တႄႇဢဝ် ဝတ်ႉၽြႃးလူင်ႁူဝ်ဝဵင်း(မူၺ်ႇတေႃႇ) သေ ပႆႁွတ်ႈၽႅဝ်ၼႃႈဝတ်ႉ/ ၵျွင်းပၢင်ႇ ၸႄႈဝဵင်းလၢႆးၶႃႈ ၸႄႈ တွၼ်ႈလွႆလႅမ် ၸိုင်ႈတႆးပွတ်းၸၢၼ်း။

ၸဝ်ႈတူၼ်ၶူး ပၼ်ႇတဝ ၽူႈၵွၼ်းဝတ်ႉ/ ၵျွင်းပၢင်ႇ ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ တီႈတႄႇမၼ်းၼႆႉ ဝၼ်း ၽြႃးလူင်းမိူင်းၼႆႉ ပဵၼ်ဝၼ်းလိူၼ်သိပ်းဢဵတ်းမူၼ်း။ ၵူၺ်းၵႃႈ မိူဝ်ႈၽွင်းၼၼ်ႉ ပဵၼ်ဝၼ်းဢွၵ်ႇဝႃႇလႄႈ တၵ်ႉၵႃႇသတ်ႉ ထႃးၶဝ်ၵေႃႈ ဢမ်ႇတၼ်းသေ ၵုမ်ႇသုၵ်ႉသၵ်ႉယူႇတီႈဝတ်ႉၽႂ် ၵျွင်းမၼ်းလႄႈ ၸင်ႇလႆႈမႃးလိူၵ်ႈ ႁဵတ်းၼႂ်းဝၼ်း လိူၼ် သိပ်းဢဵတ်းလွင်ႈ 3 ၶမ်ႈၼႆႉ ၵူႈပီယဝ်ႉ”ဝႃႈၼႆ။

ပွႆးၽြႃးလူင်းမိူင်း တီႈဝဵင်းလၢႆးၶႃႈၼႆႉ သင်ၶၸဝ်ႈၶဝ်ႈႁူမ်ႈတုင်းသွမ်းၵေႃႈၼမ် တၵ်ႉၵႃႇသတ်ႉထႃးၵေႃႈ ၶဝ်ႈႁူမ်ႈလူႇ တၢၼ်းတင်းၼမ်။

ၸၢႆးလႅင်းႁိူင်း ၽူႈတူင်ႉၼိုင်တူင်ႇဝူင်းၵူၼ်း ၼႂ်းၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ ပေႃးဢဝ်ပုတ်ႉထၽႃသႃဝႃႈ တႄႉၵေႃႈ ၽြႃးလူင်းမိူင်းၼႆႉ မၼ်းၸဝ်ႈၵႂႃႇဢဝ်ဝႃႇသႃ 3 လိူၼ် မိူဝ်းႁေႃးတြႃးပၼ်ၵေႃႉပဵၼ်မႄႈၸဝ်ႈၵေးၸူး တီႈမိူင်းၽီ သေ လူင်းမႃး မိူင်းၵူၼ်း၊ ပီႈၼွင်ႉၵူၼ်းမိူင်း ဢွၼ်ၵၼ်ႁပ်ႉတွၼ်ႈ ဢွၼ်ၵၼ်လူႇ၊ ဢွၼ်ၵၼ်တၢၼ်း။ ႁဵတ်းၶဵင်ႇတၢင်ႇပုတ်ႈ လူႇမၢၵ်ႇလူႇတဵၼ်း၊ လွင်းၶဝ်ႈသွမ်းသၢၼ်ၸိူဝ်းၼႆႉ မၼ်းၵဵဝ်ႇၵပ်းၵၢၼ်သႃသၼႃ ၸၢဝ်းပုတ်ႉႁဝ်းလႄႈ ႁဝ်းၸင်ႇလႆႈ ႁဵတ်းမႃးၵူႈ ပီ ပွႆးၽြႃး လူင်းမိူင်းတီႈလၢႆးၶႃႈႁဝ်းၶႃႈၼႆႉ” ဝႃႈၼႆ။

ပွႆးၽြႃးလူင်းမိူင်း တီႈဝဵင်းလၢႆးၶႃႈၼႆႉ ပေႃးထိုင်မႃးလိူၼ်သိပ်းဢဵတ်းလွင်ႈ 3 ၶမ်ႈၸိုင် ၸတ်းႁဵတ်းမႃးၵူႈပီ။ ပီၼႆႉ သင်ၶ ၸဝ်ႈ ၼႂ်းၸႄႈဝဵင်းလၢႆးၶႃႈ ၸဵမ်ၼႂ်းဝဵင်း/ ၼွၵ်ႈဝဵင်း ဢွၼ်ၵၼ်မႃးၶဝ်ႈႁူမ်ႈတုင်းသွမ်း မွၵ်ႈ 1,300 တူၼ်။

ၸၢႆးလႅင်းႁိူင်း သိုပ်ႇလၢတ်ႈဝႃႈ “ မိူဝ်ႈၵူႈပီပူၼ်ႉမႃးၼၼ်ႉ ၵမ်ႈၼမ်ပဵၼ်သင်ၶၸဝ်ႈၼႂ်းဝဵင်းလၢႆးၶႃႈႁဝ်းၵူၺ်း ဢၼ်လူင်း တုင်းသွမ်း တေမီး 700 – 800 တူၼ်ၼႆႉ။ ပီၼႆႉ ႁူမ်ႈပႃး ၼႂ်းဝဵင်း/ၼွၵ်ႈဝဵင်း တင်းမူတ်း တေမီးမွၵ်ႈ 1,300 တူၼ်ၼႆႉ” ဝႃႈၼႆ။