ၵႃးၽႃႇၵၼ် တီႈဝၢၼ်ႈၼွင်ဢေႃႈ ၸႄႈဝဵင်းၵဵင်းတုင် ၼိူဝ်သဵၼ်ႈတၢင်းလူင် ၵဵင်းတုင် – မိူင်းၶၢၵ်ႇ လူႉၵွႆတင်းၼမ်။

မိူဝ်ႈဝၼ်းတီႈ12/10/2019 ယၢမ်းၵၢင်ဝၼ်းၼၼ်ႉ ၵႃးသႅၼ်း Vigo (ဝီႊၵူဝ်ႊ) သီလမ် တင်း ၵႃးမၢၵ်ႉတူး လႄႈ ၵႃးပရူဝ်ႊ ပွၵ်ႉ 3 လမ်း ၽႃႇၵၼ် တီႈဝၢၼ်ႈၼွင်ဢေႃႈ ၼိူဝ်သဵၼ်ႈတၢင်း ၵဵင်းတုင် – မိူင်းၶၢၵ်ႇ ၸႄႈဝဵင်းၵဵင်းတုင် ၸိုင်ႈတႆးပွတ်း ဢွၵ်ႇၶူင်း။

ၵူၼ်းဝၢၼ်ႈၵၢတ်ႇတဝ်ႇ ဢႃယု မွၵ်ႈ 30 ပၢႆ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လုၵ်ႉဝဵင်းဢွၵ်ႇမႃး လႆႈမႃးႁၼ်မႅၼ်ႈ တီႈ ဝၢၼ်ႈၼွင်ဢေႃႈ ၼႃႈဝတ်ႉၼၼ်ႉၵမ်းလဵဝ်ၶႃႈယဝ်ႉ။ ၵႃးဝီႊၵူဝ်ႊသီလမ်ၼႆႉ လႅပ်ႈလုၵ်ႉတၢင်းၵၢတ်ႇတဝ်ႇၶိုၼ်ႈမႃး၊ ၵႃး မၢၵ်ႉတူးသမ်ႉ လုၵ်ႉတၢင်းဝဵင်းဢွၵ်ႇၵႂႃႇ။ ယဝ်ႉၵေႃႈ ၵႃးပရူဝ်ႊပွၵ်ႉသမ်ႉ မႃးၸွမ်းလင်ၵႃးဝီႊၵူဝ်ႊသီလမ်ၼၼ်ႉ။ ၵႃး 3 လမ်း ၼႆႉ တေၽႃႇၵၼ်ႁႅင်းၶႃႈယဝ်ႉ ၵႃးပရူဝ်ႊပွၵ်ႉၼၼ်ႉ သဵၼ်ဢွၵ်ႇတၢင်းၵႂႃႇပႅတ်ႈၵမ်းလဵဝ်” ဝႃႈၼႆ။

သိုပ်ႇလၢတ်ႈဝႃႈ “ မိူဝ်ႈၽွင်းႁဝ်းမႃးႁၼ်ၼၼ်ႉ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇႁၼ်၊ ႁၼ်ၵႃးၵွႆဝႆႉတင်းသၢမ်လမ်းၵူၺ်း ။ လႅပ်ႈတေမီးၵူၼ်းမၢတ်ႇၸဵပ်းယူႇ ၶဝ်ၽႃႇၵၼ်ႁႅင်းပေႃးပဵၼ်ထၢၼ်ႇၼႆႉ” ဝႃႈၼႆ။

တေႃႈလဵဝ် ရူတ်ႉၵႃးၸိူဝ်းၼၼ်ႉ ယူႇတီႈပလိၵ်ႈၶဝ် လႆႈဢဝ်ၵႂႃႇဝႆႉတီႈႁူင်းပလိၵ်ႈ ၸႄႈဝဵင်းၵဵင်းတုင်သေ တိုၵ်ႉၵူတ်ႇထတ်း တူၺ်းလွင်ႈတၢင်းယူႇ ဝႃႈၼႆ။

“သဵၼ်ႈတၢင်းၵဵင်းတုင် – မိူင်းၶၢၵ်ႇၼႆႉ သိုဝ်ႈလီ၊ သိူဝ်ႇယၢင်ဝႆႉ ၶႅမ်ႉလႅပ်ႈလႄႈ ၽႂ်ၽႂ်ၵေႃႈ ၶႂ်ႈႁေႃႈဝႆး” ၸဝ်ႈၵႃးၵူၼ်းၵဵင်း တုင်ၵေႃႉၼိုင်ႈလၢတ်ႈ။

လႅင်ႇၶၢဝ်ႇ လႅတ်ႇၼုမ်ႇ မင်းရၢႆး