ပၢင်ပွႆးလူႇတၢၼ်း လွင်းသွမ်းသၢၼ် သင်ၶၸဝ်ႈ 5 ၸိုင်ႈမိူင်း တီႈလႅၼ်လိၼ် တႆး – ထႆး တႃႈၶီႈလဵၵ်း – မႄႈသၢႆ ၵိုၼ်းၶွၼ်ႈ လီ။

မိူဝ်ႈၼႆႉ ဝၼ်းတီႈ 16/10/2019 ယၢမ်းၵၢင်ၼႂ် 6 မူင်း ပီႈၼွင်ႉၵူၼ်းမိူင်းသွင်ၽႅၼ်ႇလိၼ်တႆး – ထႆး လူႇတၢၼ်း လွင်းသွမ်း သၢၼ် သင်ၶၸဝ်ႈ 5 ၸိုင်ႈမိူင်း မိူၼ်ၼင်ႇ မိူင်းတႆး၊ မိူင်းထႆး၊ မိူင်းလၢဝ်း၊ မိူင်းၵမ်ႇပူးၶျႃးလႄႈ မိူင်းၶႄႇ တီႈၶူဝ်မိုတ်ႈၵိုဝ်းမၢႆ 1 လႅၼ် လိၼ် တႆး – ထႆး တႃႈၶီႈလဵၵ်း – မႄႈသၢႆ၊ သင်ၶၸဝ်ႈ တင်းမူတ်းမီး 400 တူၼ်။

ၸၢႆးမိူင်း ၵူၼ်းမိူင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ပွႆးလူႇတၢၼ်းလွင်းသွမ်းသၢၼ်ၼႆႉ တင်းမူတ်း သင်ၶၸဝ်ႈ 5 ၸိုင်ႈမိူင်း ႁူမ်ႈၵၼ် မႃးတုင်းသွမ်း သင်ၶၸဝ်ႈတေမီးမွၵ်ႈ 400 တူၼ်။ ၵူၺ်းၵႃႈ သင်ၶၸဝ်ႈ တၢင်းၾၢႆႇမိူင်းၶႄႇတႄႉ ဢမ်ႇ ႁၼ်မႃး ပွႆးလွင်းသွမ်းသၢၼ်ၼႆႉ ၸွမ်ၽွင်းလူင်မိူင်းတႆး ၻွၵ်ႊတိူဝ်ႊလိၼ်းထုတ်ႉ၊ ၽွင်းလူင်ၾၢႆႇလိူမ်ႈလႆႇ ၸၢႆးသူမ်ၶျႆး ၶဝ် ၵေႃႈ မႃးၶဝ်ႈႁူမ်ႈ” ဝႃႈၼႆ။

ပၢင်ပွႆးလူႇတၢၼ်း သွမ်းသၢၼ်ၼႆႉ သင်ၶၸဝ်ႈ လုၵ်ႉတၢင်းၾင်ႇမိူင်းထႆး မႄႈသၢႆသေ ပႆၶၢမ်ႈၶူဝ်မိုတ်ႈၵိုဝ်းမၢႆ 2 တႃႈၶီႈလဵၵ်း – မႄႈသၢႆ တုင်းသွမ်းထိုင်တီႈၵၢင်ပၢင်ႇ (ရှမ်းရိုးမကွင်း) တႃႈၶီႈလဵၵ်း။ လိူဝ်ၼၼ်ႉ ပွၼ်ႈထမ်းပၼ် တၵ်ႉၵႃႇသတ်ႉထႃး ယၢတ်ႇၼမ်ႉလူႇတၢၼ်း။

ပၢင်ပွႆးလူႇတၢၼ်းသွမ်းသၢၼ်ပွၵ်ႈၵမ်း 2 ၼႆႉ ယူႇတီႈသင်ၶၸဝ်ႈ လႆႈၶဝ်ႈႁပ်ႉတုင်းသွမ်းထိုင်တၢင်းၾင်ႇတႃႈၶီႈလဵၵ်း။ မိူဝ်ႈ ပီပူၼ်ႉ သင်ၶၸဝ်ႈ တၢင်းၾင်ႇတႃႈၶီႈလဵၵ်း လႆႈၶဝ်ႈၵႂႃႇတုင်းသွမ်းတၢင်းၾင်ႇမႄႈသၢႆ ၸိုင်ႈထႆး။

လိူဝ်ၼၼ်ႉ ၼႂ်းပၢင်ပွႆးၼႆႉ မီးၽူႈႁွင်ႉၵႂၢမ်းၸိုဝ်ႈသဵင်ယႂ်ႇမၢၼ်ႈ မႃးလဝ်ႇမူၼ်ႈတူၼ်ႈၸႂ်ပႃးထႅင်ႈလူးၵွၼ်ႇ ဝႃႈၼႆ။