ၸုမ်းၵူၼ်းၼုမ်ႇတႆးၼႂ်းၵဵင်းမႆႇ ႁူမ်ႈၵၼ် သႂ်ႇပၼ်ၾွၼ်ႉ ယူႊၼီႊၶူတ်ႉ (Unicode) ၼႂ်းၾူၼ်း/ မိုဝ်းထိုဝ်လႄႈ ၶွမ်ႊၽိဝ်ႊ တိူဝ်ႊပီႈၼွင်ႉမႃးပွႆးဢွၵ်ႇဝႃႇ ႁိမ်း 100 ၶိူင်ႈ ၼႂ်းဝၼ်းဢွၵ်ႇဝႃႇသႃ။

ဝၼ်းတီႈ 13/10/2019 ယၢမ်းၵၢင်ၼႂ် 9 မူင်း ထိုင် 17 မူင်းႁူဝ်ၶမ်ႈ ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ၊ ၸုမ်း IT တႆး ၵဵင်းမႆႇလႄႈ Shan Unicode ႁူမ်ႈၵၼ်သေ သႂ်ႇၾွၼ်ႉ Unicode ပၼ်ပီႈၼွင်ႉတႆး/ ႁႅင်းၵၢၼ်တႆး တီႈဝတ်ႉၵူႇတဝ်ႈ ဢိူင်ႇသီၽုမ်း ၸႄႈဝဵင်းၵဵင်းမႆႇ ၸိုင်ႈထႆး။

ၸၢႆးဢွၼ်ႇလႅင်း ၸုမ်း IT တႆး ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ “ ပီၼႆႉ ႁဝ်းၶႃႈလႆႈသႂ်ႇပၼ် ၾွၼ်ႉယူႊၼီႊၶူတ်ႉၵႂႃႇ ၼႂ်း ဝၼ်းဢွၵ်ႇဝႃႇၼႆႉ ၸဵမ်ၾူၼ်း၊ မိုဝ်းထိုဝ်လႄႈ ၶွမ်ႊၽိဝ်ႊတိူဝ်ႊ တင်းမူတ်းတေမီးႁိမ်းမွၵ်ႈ 100 ၶိူင်ႈၼႆႉၶႃႈ။ ဢၼ်ဢမ်ႇ သႂ်ႇလႆႈတေမီးၵမ်ႈဢေႇၵူၺ်းၶႃႈ။ တေလႆႈဝႃႈၶႅမ်ႉလႅပ်ႈၵႂႃႇၵူႈလွင်ႈယူႇၶႃႈ” ဝႃႈၼႆ။

ပီႈၼွင်ႉတႆး/ ႁႅင်းၵၢၼ်တႆး မႃးသႂ်ႇၾွၼ်ႉၼႆႉပဵၼ် ၾူၼ်းသႅၼ်း Samsung, Vivo, Oppo လႄႈ iphone ၸဵမ်ၸိူဝ်းၼႆႉ။ ၶွမ်ႊၽိဝ်ႊတိူဝ်ႊသမ်ႉ မီးမွၵ်ႈ 10 လုၵ်ႈ ဝႃႈၼႆ။

ၸၢႆးဢွၼ်ႇလႅင်း သိုပ်ႇလၢတ်ႈဝႃႈ “ၼႂ်းၸုမ်းႁဵတ်းၵၢၼ် (ထိမ်းငၢၼ်း) ႁဝ်း လႆႈဢုပ်ႇၵၼ်ဝႆႉတႄႉ ပေႃးပွႆးပီမႂ်ႇတႆး 2114 ၼီႈ မႃး ႁဝ်းၶႃႈ တေႁူမ်ႈၵၼ် လူင်းပၼ်ၾွၼ်ႉယူႊၼီႊၶူတ်ႉထႅင်ႈ တႃႇၶၢဝ်းတၢင်း မွၵ်ႈ 2-3 ဝၼ်းၼႆႉၶႃႈ။ ပွႆးဢွၵ်ႇဝႃႇၼႆႉ ႁဝ်း ၶႃႈ လႆႈၸႂ်ႉၶၢဝ်းယၢမ်းဝၼ်းၼိုင်ႈၵူၺ်းလႄႈ လႆႈဝႃႈၶၢဝ်းယၢမ်းႁဝ်းၶႃႈၵေႃႈဢေႇဝႆႉၶႃႈ” ဝႃႈၼႆ။

ၸုမ်း IT တႆး၊ Shan Unicode လႄႈ ၵေႃလိၵ်ႈလၢႆး ၵဵင်းမႆႇ ႁူမ်ႈၵၼ်သေ လူင်းၾွၼ်ႉ Unicode ပၼ်ပီႈၼွင်ႉမႃးပွႆးၼႆႉ ၸဵမ် မိူဝ်ႈပီ 2013 မႃး ၵမ်ႈၼမ်တေပႂ်ႉသႂ်ႇၾွၼ်ႉပၼ် ႁပ်ႉလူင်းပၼ်လၢႆ ၸဵမ်ၼႂ်းပၢင်ပွႆးဢွၵ်ႇဝႃႇသႃ၊ ပီမႂ်ႇတႆးလႄႈ ပွႆးသၢင်ႇလွင်း ၸိူဝ်းၼႆႉ။

ဝၼ်းဢွၵ်ႇဝႃႇသႃပီၼႆႉ လိူဝ်သေတီႈၵဵင်းမႆႇယဝ်ႉ ယင်းမီးထႅင်ႈပၢင်လူင်းၾွၼ်ႉ Unicode ပၼ်လၢႆလၢႆတီႈပႃးၸဵမ် ၼႂ်း မိူင်းတႆး။