မၢၵ်ႇလူင် တူၵ်းသႂ်ႇႁိူၼ်းၵူၼ်းဝၢၼ်ႈ လင်ၼိုင်ႈ တီႈသႅၼ်ဝီ ၼႂ်ၼႆႉ ၵူၼ်းဝၢၼ်ႈဝႃႈပဵၼ်သဵင်ယိုဝ်းၾၢႆႇလဵဝ်

မၢၵ်ႇလူင်တူၵ်းသႂ်ႇႁိူၼ်း ၵူၼ်းဝၢၼ်ႈ သွင်ပူႇဢွၵ်ႇ/ ၽူဝ်မေး တီႈဝဵင်းသႅၼ်ဝီ ၼႂ်ၼႆႉ ၵူၼ်းမိူင်းဝႃႈ ပဵၼ်သဵင်ယိုဝ်းၾၢႆႇလဵဝ် ၵူၺ်း ပဵၼ်ၾၢႆႇလႂ်ယိုဝ်းဢမ်ႇလႆႈႁူႉၸွမ်း ဝႃႈၼႆ။

မိူဝ်ႈၼႆႉ ဝၼ်းတီႈ 11/10/2019 ယၢမ်းၵၢင်ၼႂ် 5 မူင်းၶိုင်ႈၼၼ်ႉ မၢၵ်ႇလူင်လုၵ်ႈၼိုင်ႈ တူၵ်းသႂ်ႇႁိူၼ်း ဢူးဢႃးဝၼ်းပေႃႇ တီႈပွၵ်ႉ 3 ၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ။ ၸဝ်ႈႁိူၼ်း ဢူးဢႃးဝၼ်းပေႃႇ ဢႃယု 25 ပီ တင်း ၵေႃႉပဵၼ်မေးၼၢင်း ၸိုဝ်ႈႁွင်ႉ မ လီမီး ဢႃယု 20 ပီ။ ပႃးတွင်ႉဝႆႉၼၼ်ႉ မၢတ်ႇၸဵပ်းၸၢၵ်ႇမၢၵ်ႇယၢမ်းလဵဝ်သူင်ႇယူတ်းယႃတူဝ်ဝႆႉတီႈႁူင်းယႃ လႃႈသဵဝ်ႈယဝ်ႉ ဝႃႈၼႆ။

ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ မၢတ်ႇၸဵပ်း 2 ၵေႃႉ။ ပဵၼ်သွင် ၽူဝ် မေး။ ၵေႃႉပဵၼ်မေးၼၢင်းတႄႉ ပႃးတွင်ႉဝႆႉ တေႃႈလဵဝ် ယူႇတီႈမေႃယႃ ၸႄႈဝဵင်းသႅၼ်ဝီသေ လႆႈသူင်ႇၵႂႃႇယူတ်းယႃ တီႈ လႃႈသဵဝ်ႈယဝ်ႉ။ မိူဝ်ႈၵႆႈၶႃႈၶဝ်ၵႂႃႇ တီႈႁူင်းယႃသႅၼ်ဝီ ဢမ်ႇတၼ်းၶိုတ်းၶႃ သွင်ၵေႃႉၽူဝ်မေး” ဝႃႈၼႆ။

ၵေႃႉပဵၼ်ၽူဝ်ၺႃးၸၢၵ်ႇမၢၵ်ႇ တိူဝ်ႉၺႃးတီႈတိၼ် ၸၢၵ်ႇမၢၵ်ႇၶဝ်ႈလိုၵ်ႉဝႆႉ။ ၵေႃႉပဵၼ်မေးၼၢင်းသမ်ႉ တိူဝ်ႉၺႃးတီႈမိုဝ်း ငွၵ်းသွၵ်ႇ ၸိူဝ်းၼႆႉ ဝႃႈၼႆ။

ဢိင်ၼိူဝ်လွင်ႈပဵၼ်ပၢင်တိုၵ်းၵၼ် ၼႂ်းၸႄႈဝဵင်းသႅၼ်ဝီၼႆႉမႃးသေ ၵူၼ်းမိူင်း ဢွၼ်ၵၼ်တိုၼ်ႇသၢၼ်ႈ ၵူဝ်ၵၼ်ဝႆႉယူႇ မၢင် ၵေႃႉ ဢမ်ႇပႆႇႁတ်းဢွၵ်ႇႁိူၼ်းၵေႃႈမီး၊ လွင်ႈယိုဝ်းမၢၵ်ႇလူင်ၼႂ်ၼႆႉ ၵူၼ်းမိူင်းသႅၼ်ဝီလၢတ်ႈဝႃႈ ပဵၼ်သဵင်ယိုဝ်းၾၢႆႇလဵဝ် ဢမ်ႇမီးလွင်ႈတုမ်ႉတွပ်ႇ။

ၸၢႆးဢူးၶမ်း သိုပ်ႇလၢတ်ႈဝႃႈ “ တေႃႈလဵဝ် ငဝ်းလၢႆးတႄႉ လႆႈထၢမ်တူၺ်း တၢင်းၼွၵ်ႈဝဵင်းတႄႉ သိုၵ်းဢမ်ႇမီးယဝ်ႉ တၢင်း ၼႂ်းဝဵင်းတႄႉ သိုၵ်းမၢၼ်ႈဢဝ်ႁူမ်ႇလူမ်ႈဝႆႉယူႇ၊ မိူဝ်ႈၵႆႈၼႂ်းၵၢတ်ႇၵေႃႈ တိုၼ်ႇသၢၼ်ႈၵၼ်မူတ်း” ဝႃႈၼႆ။

လုင်းသၢင်ႇၸၢႆး သႅၼ်ဝီ ဢႃယု မွၵ်ႈ 40 ပီ ၵူၼ်းၶၢႆၶူဝ်းၼႂ်းၵၢတ်ႇ သႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၵၢင်ၼႂ် 5 မူင်းပၢႆၼၼ်ႉ ႁဝ်းၶႃႈ ႁၢင်ႈႁႅၼ်းၶူဝ်း ၼႂ်းၵၢတ်ႇ တႃႇတေၶၢႆ လႆႈငိၼ်းသဵင်ၵွင်ႈတႅၵ်ႇ။ ဝၢႆးသဵင်ၵွင်ႈယဵၼ်ယဝ်ႉ ၶိုၼ်း မႃးပိုတ်ႇႁၢၼ်ႉၶၢႆ ၽႂ်မၼ်းၶိုၼ်း။ ယူႇၵမ်းၼိုင်ႈ ၵႃးသိုၵ်းမၢၼ်ႈ မႃးထႅင်ႈသေ ၵူၼ်းၸၢႆႇၵၢတ်ႇ ဢွၼ်တိုၼ်ႇသၢၼ်ႈၵၼ် ထႅင်ႈၵမ်းၼိုင်ႈ။ ၵူၺ်းၵႃႈ ထႅင်ႈ 1-2 ဝၼ်းၼႆႉ သမ်ႉတေဢွၵ်ႇဝႃႇယဝ်ႉလႄႈ ၵူၼ်းမိူင်း ဢၼ် လူဝ်ႇသိုဝ်ႉ လူဝ်ႇၸႂ်ႉၵေႃႈမီး လႄႈ ၵူဝ်ၵေႃႈ ၵႃႈလႆႈသိုဝ်ႉၶၢႆၵၼ်ယူႇ ႁဵတ်းၼႆၶႃႈယဝ်ႉ” ဝႃႈၼႆ။

ပၢင်တိုၵ်းၼႂ်းၸႄႈဝဵင်းသႅၼ်ဝီၼႆႉ မိူဝ်ႈဝၼ်းတီႈ 9/10/2019 ၵူၼ်းမိူင်းလႆႈတိူဝ်ႉမၢတ်ႇၸဵပ်းၸွမ်း 7 ၵေႃႉ၊ မိူဝ်ႈၼႆႉ ဝၼ်းတီႈ 11/10/2019 ၵူၼ်းမိူင်းလႆႈၺႃးၸၢၵ်ႇမၢၵ်ႇထႅင်ႈ 2 ၵေႃႉ ႁူမ်ႈၵၼ်တင်းမူတ်း ပဵၼ် 9 ၵေႃႉ။ ၼႂ်း 9 ၵေႃႉၼႆႉ ဢၼ်လႆႈသူင်ႇ ယူတ်းယႃတူဝ် တီႈႁူင်းယႃလႃႈသဵဝ်ႈ မီး 4 ၵေႃႉ ဝႃႈၼႆ။