ဝၼ်းတီႈ 9/10/2019 လုမ်းတြႃးလူင်ပွင်ၸိုင်ႈမၢၼ်ႈ ၸေႈဝဵင်းသႃးလိၼ်းၵျီး တိူင်းၸေႈၵႅင်း မိူင်းမၢၼ်ႈပွတ်းၵၢင် ပၼ်တူတ်ႈတၢမ်ႇ ၵူၼ်းဝၢၼ်ႈၵူၼ်းမိူင်းပိုၼ်ႉတီႉ 7 ၵေႃႉ လူၺ်ႈတၢင်းၽိတ်း လမ်းတီႉၵူၼ်းႁေႃႈ ရူတ်ႉၵႃး ၶွမ်ႊပၼီႊၶႄႇ ဝမ်ႊပဝ်ႊ ဢၼ်ႁေႃႈၵႃးၽႃႇၵူၼ်းသေ ပၢႆႈ။
ရူတ်ႉၵႃး ၶွမ်ႊပၼီႊၶႄႇ ဝမ်ႊပဝ်ႊ ဢၼ်မႃးၶုတ်းတွင်းလႅင် တီႈလွႆ လႅတ်ႉပတွင်း ၼႆႉ ပူၼ်ႉမႃး မိူဝ်ႈပီ 2016 ႁေႃႈရူတ်ႉၵႃး ၽႃႇၺႃးၵူၼ်းဝၢၼ်ႈ ဝႅတ်ႉမေး ၸိုဝ်ႈ မတွႆႉတွႆႉဝိၼ်း။ ၵူၼ်းႁေႃႈၵႃးဢမ်ႇလူင်းတူၺ်း ၵူၼ်းၸဵပ်းသေဢမ်ႇၵႃး ႁေႃႈရူတ်ႉၵႃးပၢႆႈလႄႈၵူၼ်းပိုၼ်ႉတီႈ 6 ၵေႃႉလိုပ်ႈလမ်းၸွမ်းရူတ်ႉသေ တိၺွပ်းၵူၼ်းႁေႃႈရူတ်ႉၶႄႇ မႃးမွပ်ႈပၼ်ပလိၵ်ႈမၢၼ်ႈ။
ဝၢႆးၼၼ်ႉ ၵူၼ်းႁေႃႈရူတ်ႉၵႃး ၼႄးဝႃႈ ၵူၼ်းဝၢၼ်ႈပေႃႉထုပ်ႉမၼ်းၼႆသေ ၶိုၼ်းဢဝ်လိူင်ႈ လူၺ်ႈ မၢႆမီႈ မတ်ႉတႃ 323၊ 447၊ 427 (တင်ႈၸႂ်ပေႃႉထုပ်ႉႁႂ်ႈၸဵပ်းသႅပ်ႇ ) ၶိုၼ်ႈလုမ်းတြႃး ပဵၼ်လိူင်ႈ ပဵၼ်လၢဝ်းမႃးၶၢဝ်းတၢင်းႁိမ်း 4 ပီ။
ထိုင်ဝၼ်းတီႈ 9/10/2019 မႃးလုမ်းတြႃးပၼ်တူတ်ႈတၢမ်ႇၵူၼ်းဝၢၼ်ႈ 7 ၵေႃႉ (ပႃးတင်းၵေႃႉၺႃးရူတ်ႉၵႃးၽႃႇၺႃး) ၼၼ်ႉ တူတ်ႈတၢမ်ႇ 1 ၵေႃႉ 2 လိူင်ႈ ၊ 1 လိူင်ႈ တူတ်ႈတၢမ်ႇငိုၼ်း 3 မိုၼ်ႇပျႃး ဢမ်ႇၼၼ် တူတ်ႈၶွၵ်ႈ 15 ဝၼ်း။ 1 ၵေႃႉၺႃးတူတ်ႈတၢမ်ႇငိုၼ်း 6 မိုၼ်ႇပျႃး။
ၵူၼ်းမိူင်းဝၢၼ်ႈဝႅတ်ႉမေးလၢတ်ႈဝႃႈ – “ၶဝ် မႃးၶုတ်းတွင်းလႅင်ၼႂ်းမိူင်းႁဝ်း။ သမ်ႉမႃးပဵၼ်လိူင်ႈ ပဵၼ်လၢဝ်းၵၼ်သေ မႃးပေႉၵိၼ်ႁဝ်းထႅင်ႈ။ ၶဝ်ၽိတ်းယူႇယႃႇယႃႇ သမ်ႉၶိုၼ်းဝၢႆႇမႃး ဢဝ်လိူင်ႈ ၸွႆးတြႃးႁဝ်းၼႆႉလီၸဵပ်းၸႂ်ၼႃႇ”- ဝႃႈၼႆ။
မတွႆႉတွႆႉဝိၼ်း ၵေႃႉၺႃးရူတ်ႉၵႃးၽႃႇၼၼ်ႉၶိုၼ်းဢဝ်လိူင်ႈၸွႆးတြႃးၵူၼ်းႁေႃႈၵႃး ဝႃႈ ႁေႃႈရူတ်ႉ ဢမ်ႇၾၢင်ႉသတိ ၼႆသေ လုမ်းတြႃးပၼ်တူတ်ႈတၢမ်ႇၸဝ်ႈရူတ်ႉၶိုၼ်း ငိုၼ်း 1 သႅၼ်ပျႃး လႆႈႁူႉၼင်ႇၼႆ။
တွၼ်ႈတႃႇပိုၼ်ႉတီႈၶုတ်းတွင်းလႅင်ၼႂ်းၸေႈဝဵင်းသႃးလိၼ်းၵျီးၼႆသေ ၶွမ်ႊပၼီႊပၢႆးမၢၵ်ႈမီးဢူးပႅင်ႇ ၶွင်သိုၵ်းမၢၼ်ႈ ဢၼ်တေႁူမ်ႈၵၼ်တင်းၶွမ်ႊပၼီႊ ဝမ်ႊပဝ်ႊ ၶႄႇၼၼ်ႉ ယိုတ်းလိၼ်ၵူၼ်းမိူင်း တႃႇ 7000 ဢေႊၶိူဝ်ႊ ၸဵမ်မိူဝ်ႈပီ 2011။ တႄႇၶုတ်းတွင်းလႅင်တီႈလွႆလႅတ်ႉပတွင်း ၼႂ်းၸေႈဝဵင်း သႃးလိၼ်းၵျီး ၸႄႈတွၼ်ႈ ယိၼ်းမႃႇပိၼ်ႇ တိူင်းၸေႈၵႅင်း ၸဵမ်မိူဝ်ႈပီ 2013 ။ ယွၼ်ႉမီးလွင်ႈ တုမ်ႉတိူဝ်ႉ သိင်ႇ ဝႅတ်ႉလွမ်ႉ၊ တုမ်ႉတိူဝ်ႉတီႈယူႇတီႈၵိၼ်ၵူၼ်းမိူင်းပိုၼ်ႉတီႉလႄႈ ၵူၼ်းမိူင်းဢမ်ႇၽွမ်ႉ ၊ သၢၼ် ၶတ်း မႃးတႃႇသေႇ။ ၵူၺ်းၵႃႈ ၶွမ်ႊပၼီႊ ဢမ်ႇထွမ်ႇသဵင်ၵူၼ်းမိူင်းသေ သိုပ်ႇၶုတ်း ယူႇတေႃႇထိုင်ယၢမ်းလဵဝ်။ တပ်ႉသိုၵ်းလႄႈလူင်ပွင်ၸိုင်ႈၵေႃႈ ဢမ်ႇယူႇၾၢႆႇၵူၼ်းမိူင်းထိုင်တီႈလႆႈပဵၼ်ပၼ်ႁႃၵၼ်ယူႇတႃႇသေႇ။
ဢၢင်ႈဢိင်- ၶၢဝ်ႇပိုၼ်ႉတီႈ လႅတ်ႉပတွင်း