ၸုမ်းၵူၼ်းၼုမ်ႇတႆး TYO ၸတ်းႁဵတ်းပၢင်ယုၵ်ႉမုၼ်းၼမ်ႉၵတ်ႉ ၵူၼ်းၼုမ်ႇတႆး ၼေႃႇတႅၼ်းၶိူဝ်း ၵဵဝ်ႇၵပ်းပၢႆးဢွၼ်ႁူဝ် လႄႈ ပိူင်ၾႅတ်ႊၻရႄႊ တႃႇၶၢဝ်းတၢင်း 4 ဝၼ်း။

ဝၼ်းတီႈ 6-9/10/2019 ယၢမ်းၵၢင်ၼႂ် 9 မူင်း ထိုင် 4 မူင်း ဝၢႆးဝၼ်း ၸုမ်းၵူၼ်းၼုမ်ႇတႆး TYO ၼမ်ႉၶမ်းလႄႈ တင်းထုင်ႉလွႆ ႁူဝ်သိူဝ် ႁူမ်ႈၵၼ်သေ ၸတ်းႁဵတ်း ပၢင်ယုၵ်ႉမုၼ်းၼမ်ႉၵတ်ႉ ၵူၼ်းၼုမ်ႇတႆး တီႈၵေႃလိၵ်ႈလၢႆးလႄႈ ၾိင်ႈငႄႈတႆး ၼႂ်း ဝၢၼ်ႈၼမ်ႉႁီး ဢိူင်ႇထုင်ႉလွႆႁူဝ်သိူဝ် ၸႄႈဝဵင်းမၢၼ်ႈၸေႊ ၸႄႈတွၼ်ႈမၢၼ်ႈမေႃႇ ၸႄႈမိူင်းၶၢင် ဝႃႈၼႆ။

ၸၢႆးၶျိတ်ႉၽွႆႇ ႁူဝ်ပဝ်ႈၸုမ်းၵူၼ်းၼုမ်ႇတႆး TYO လၢတ်ႈဝႃႈ “ ယိူင်းဢၢၼ်း ဢၼ်ၸုမ်းၵူၼ်းၼုမ်ႇ TYO ႁဝ်းၶႃႈ ၸတ်း ႁဵတ်းပၢင်သွၼ်ၼႆႉ ၼင်ႇႁိုဝ် ၵူၼ်းၼုမ်ႇႁဝ်းၶႃႈ ပေႃးတေပဵၼ်ၽူႈဢွၼ်ႁူဝ်လီ၊ ႁူႉလၢႆးၸတ်းပွင်၊ ပိူင်ၾႅတ်ႊၻရႄႊလႄႈ ပေႃးတေၸၢင်ႈၵိူတ်ႇဢွၵ်ႇမႃးလႆႈၼေႃႇတႅၼ်းၶိူဝ်းၼမ်ၼမ်”ဝႃႈၼႆ။

ၸၢႆးဢွၼ်ပိုၼ်းတႆး ၽူႈၶဝ်ႈၸုမ်းပွင်ၵၢၼ်ၵူၼ်းၼုမ်ႇတႆး TYO လၢတ်ႈဝႃႈ “ ပၢင်သွၼ်ၼႆႉ လႆႈတႄႇၸတ်းႁဵတ်းမႃး ဝၼ်း တီႈ 6 ထိုင် 9 တႃႇၶၢဝ်းတၢင်း 4 ဝၼ်း။ ၵူၼ်းၼုမ်ႇၼႂ်းထုင်ႉလွႆႁူဝ်သိူဝ် ၶိုၼ်ႈႁွတ်ႈ 100 ပၢႆ” ဝႃႈၼႆ။

ပၢင်ၽိုၵ်းၽွၼ်ႉၼႆႉ ၽူႈမႃးပူင်သွၼ်ပၼ်သမ်ႉ ပဵၼ်ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈ တင်ႈ မၢႆ 3 ၸႄႈတွၼ်ႈလႃႈသဵဝ်ႈ၊ ၸုမ်း FTT/ EBO သြႃႇၶႅင်ႇၵျေႃႇမူဝ်း၊ သြႃႇၸၢႆးမွၼ်း၊ သြႃႇၸၢႆးပီး ၸိူဝ်းၼႆႉ။

မိူဝ်ႈပူၼ်ႉမႃး ဝၼ်းတီႈ 17/01/2018 ၸုမ်းၵူၼ်းၼုမ်ႇတႆး TYO ၸႄႈဝဵင်းၼမ်ႉၶမ်းတင်းထုင်ႉလွႆႁူဝ်သိူဝ်၊ ၸုမ်းၽွင်ႊၻေႊ သျိၼ်ႊ ၸၢဝ်းၶိူဝ်းၼႂ်းပိုၼ်ႉတီႈ လႄႈ မေႃယႃ Dr. ၸၢႆးၼေႃႇမိူင်း ႁူမ်ႈၵၼ် လူင်းပိုၼ်ႉတီႈ ပၼ်တၢင်းႁူႉၵူၼ်းမိူင်း လွင်ႈ တၢင်းပဵၼ်ၸိူဝ်ႉ မႅင်း C လႄႈ B တႃႇၵူၼ်း 100 ပၢႆ။ ၸတ်းႁဵတ်းတီႈ မၢၼ်ႈၵုင်းၶမ်း၊ ပၢင်ႇၶမ်း ၊ ဝၢၼ်ႈၵူတ်ႉလူင် ဢိူင်ႇထုင်ႉ လွႆ ႁူဝ်သိူဝ် ၸႄႈဝဵင်း မၢၼ်ႈၸေႊ။