ပလိၵ်ႈထႆး ၶဝ်ႈၵူတ်ႇထတ်းတီႉလႆႈ ယႃႈမႃႉ 1 လၢၼ်ႉ 2 သႅၼ်မဵတ်ႉ တီႈၼႂ်းၵႃး ၵူၼ်းသိုၵ်းၵဝ်ႇလူင်ပွင်ၸိုင်ႈထႆး ၼႂ်းၸႄႈဝဵင်းမႄႈၸၼ်း ၸိုင်ႈထႆး။
ဝၼ်းတီႈ 10/10/2019 ယၢမ်းၵၢင်ၼႂ် 9 မူင်းၼၼ်ႉ ပလိၵ်ႈထႆး လၢႆၾၢႆႇႁူမ်ႈၵၼ် ၶဝ်ႈၵူတ်ႇထတ်း ၼႂ်းၵႃး ၸၢႆးဢႃႊတီႊ သၵ်ႊ (Mr. Adisak) ဢႃယု 43 ပီ တင်း ၼၢင်းၽတ်းထိယႃး (Ms. Phattiya) ဢႃယု 22 ပီ တီႈတႃႈရူတ်ႉၵႃး တၢင်းၶိုၼ်ႈလွႆ တုင်း ႁိမ်း Bua Ban Resort ၸႄႈဝဵင်းမႄႈၸၼ်း ၸႄႈတွၼ်ႈၵဵင်းႁၢႆး ၸိုင်ႈထႆး လႅၼ်လိၼ် တႆး – ထႆး။
Mr.Adisak ၼၼ်ႉ မိူဝ်ႈၵူႈပွၵ်ႈ မၼ်းၸၢႆး ယၢမ်ႈပဵၼ်သိုၵ်းထႆး ႁပ်ႉပုၼ်ႈၽွၼ်း ၼႂ်းၸႄႈတွၼ်ႈၵဵင်းႁၢႆး သိုဝ်ႇၶၢဝ်ႇ Chiang Rai Report ဢွၵ်ႇဝႆႉၼင်ႇၼႆ။
ယႃႈမႃႉဢၼ်တီႉလႆႈ 1 လၢၼ်ႉ 2 သႅၼ်မဵတ်ႉၼႆႉ သႂ်ႇၼႂ်းထူင်ၶူဝ်း 4 ထူင်။ သႂ်ႇၼႂ်းထူင်ႁိဝ်ႈ ဢၼ်ၼၢင်း ယိင်းပႃးၼၼ်ႉ 2 ထူင်။ ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈထႆး လႆႈႁူႉၶၢဝ်ႇသေ လႆႈၶဝ်ႈၵူတ်ႇထတ်းၵုမ်းၶင်တူဝ်လႆႈ ဝႃႈၼႆ။
တေႃႈလဵဝ် ၵူၼ်းသိုၵ်းၵဝ်ႇလႄႈ ၽူႈယိင်းၼၼ်ႉ ပလိၵ်ႈထႆး လႆႈပိုတ်ႇလိူင်ႈၸွႆးတြႃး တီႈႁူင်းပလိၵ်ႈၸႄႈဝဵင်းမႄႈၸၼ်း ဝႆႉယဝ်ႉ။ လိူဝ် ၼၼ်ႉ ယူႇတီႈၽူႈမီးပုၼ်ႈၽွၼ်းၶဝ် တိုၵ်ႉၸွမ်းၶႆႈငိူၼ်ႈ ၵူၼ်းၵဵဝ်ႇၶွင်ႈၸွမ်းယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ