မိူဝ်ႈၼႆႉ ဝၼ်းတီႈ 11/10/2019 ယၢမ်းၵၢင်ၼႂ် 5 မူင်းၶိုင်ႈ မၢၵ်ႇလူင်တူၵ်းသႂ်ႇ ႁိူၼ်းၵူၼ်းဝၢၼ်ႈ တီႈပွၵ်ႉၵွင်းသၵ်ႉၵျႃႇ ၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ တိူဝ်ႉၺႃးၵူၼ်းဝၢၼ်ႈ မၢတ်ႇၸဵပ်း 2 ၵေႃႉ။ ပႃးမႄႈပုမ်ယႂ်ႇ 1 ၵေႃႉ။
ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵၢင်ၼႂ် မၢၵ်ႇတႅၵ်ႇထႅင်ႈၶႃႈ။ တိူဝ်ႉၺႃးၵူၼ်းဝၢၼ်ႈ 2 ၵေႃႉ။ တေႃႈလဵဝ်ၼႆႉ လႆႈသူင်ႇယူတ်းယႃတူဝ်ဝႆႉတီႈႁူင်းယႃ သႅၼ်ဝီယဝ်ႉ။ ၼႂ်း 2 ၵေႃႉၼၼ်ႉ ပႃး မႄႈပုမ်ယႂ်ႇ(ၼၢင်းယိင်းပႃးတွင်ႉ) 1 ၵေႃႉ။ လွင်ႈမၢတ်ႇၸဵပ်းၼၼ်ႉ တိူဝ်ႉၺႃးတီႈလႂ်လၢႆလၢႆၼႆႉ ၶႃႈပႆႇႁူႉ တိုၵ်ႉတေၵႂႃႇတူၺ်း တီႈႁူင်းယႃၵူၺ်းၶႃႈ” ဝႃႈၼႆ။
မၢၵ်ႇၼၼ်ႉ ၵူၼ်းမိူင်းသႅၼ်ဝီတႄႉဝႃႈ ပဵၼ်မၢၵ်ႇသိုၵ်းလူင်ပွင်ၸိုင်ႈမၢၼ်ႈ ဝႃႈၼႆ။
ၸၢႆးဢူးၶမ်း လၢတ်ႈဝႃႈ “လႆႈငိၼ်းသဵင်ၵွင်ႈတႅၵ်ႇ မၢၵ်ႇလူင်တႅၵ်ႇ ၸဵမ်ၸဝ်ႉၶႃႈ။ ၵူၼ်းဝၢၼ်ႈတႄႉဝႃႈ ပဵၼ်မၢၵ်ႇသိုၵ်းမၢၼ်ႈ ၼႆဝႃႇ လွင်ႈၼႆႉတႄႉ ႁဝ်းၶႃႈ ၵေႃႈပႆႇႁူႉ ပဵၼ်မၢၵ်ႇၾၢႆႇလႂ် ပႆႇယိုၼ်ယၼ်လႆႈ” ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 9/10/2019 ၼၼ်ႉ သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း TNLA ယိုဝ်းၵၼ် တီႈၵၢင်ဝဵင်း သႅၼ်ဝီသေ တုမ်ႉတိူဝ်ႉၵူၼ်းမိူင်း လႆႈမၢတ်ႇၸဵပ်းၸွမ်း 7 ၵေႃႉ။ ၼႂ်း 7 ၵေႃႉၼၼ်ႉ လႆႈသူင်ႇႁူင်းယႃ သႅၼ်ဝီ 5 ၵေႃႉ၊ တႃႇ 2 ၵေႃႉသမ်ႉ လႆႈသူင်ႇယူတ်းယႃတီႈလႃႈသဵဝ်ႈ။ လိူဝ်ၼၼ်ႉ ၵူၼ်းသိုၵ်းလူင်ပွင်ၸိုင်ႈမၢၼ်ႈ လႆႈလူႉတၢႆ 3 ၵေႃႉ မၢတ်ႇၸဵပ်း ႁိမ်း 10 ၵေႃႉ ဝႃႈၼႆ။
ဢိင်ၼိူဝ်ပဵၼ်ပၢင်တိုၵ်းၼႆႉသေ ၶူဝ်းၶွင်ၵူၼ်းဝၢၼ်ႈ လႆႈလူႉသုမ်း/ လူႉၵွႆယွၼ်ႉ တင်းမူတ်း 18 ၵေႃႉ။ မိူၼ်ၼင်ႇ ႁိူၼ်းယေး လူႉၵွႆ၊ ၶဝ်ႈၼႂ်းၼႃးလူႉ၊ ရူတ်ႉၵႃး လူႉၵွႆ ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ