ၽွင်းပၢင်တိုၵ်း ၵၢင်ဝဵင်းသႅၼ်ဝီၼၼ်ႉ မီးၵူၼ်းယႃႉႁၢၼ်ႉၶၢႆၶူဝ်း၊ ၶဝ်ႈလၵ်ႉၶူဝ်းၶွင် ၼႂ်းၵၢတ်ႇ ဝဵင်းသႅၼ်ဝီ။
မိူဝ်ႈဝႃး ဝၼ်းတီႈ 9/10/2019 ယၢမ်းၵၢင်ၼႂ် 6 မူင်းၶိုင်ႈၼၼ်ႉ သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း TNLA ယိုဝ်း ၵၼ် ၼႂ်းၵၢင်ဝဵင်းသႅၼ်ဝီ ၸိုင်ႈတႆးပွတ်းႁွင်ႇ။ ၽွင်းသုၵ်ႉယုင်ႈယူႇၼၼ်ႉ မီးၵူၼ်း/ ၸုမ်းၶဝ်ႈ လၵ်ႉ ဢဝ်ၶူဝ်းၶွင်ၸွမ်း ၼႂ်း ၵၢတ်ႇ၊ ၸွမ်းႁၢၼ်ႉၶၢႆၶူဝ်း ၸွမ်းႁိမ်းၵၢတ်ႇၵမ်ႈၽွင်ႈ ဝႃႈၼႆ။
ပႃႈၼၢင်း ၵူၼ်းၶၢႆၶူဝ်းၼႂ်းၵၢတ်ႇသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၽွင်းသုၵ်ႉသၵ်ႉၼၼ်ႉ ႁဝ်းၶႃႈ ဢွၼ်ၵၼ်ပၢႆႈ၊ ဝၢႆးယဵၼ်ၵႂႃႇယဝ်ႉၼၼ်ႉ ဢွၼ်ၵၼ်မႃးၸူးတီႈႁၢၼ်ႉၶၢႆၶူဝ်း၊ လႆႈႁၼ်သိုၵ်းမၢၼ်ႈၶဝ် မႃးသွၵ်ႈတဝ်ဢဝ်ၶူဝ်းၼႂ်းႁၢၼ်ႉ ၼႂ်း ၵၢတ်ႇ။ ၼိူဝ်ႉၵႆႇႁၢႆ 4 တူဝ်၊ ပႃၵေႃႈႁၢႆ၊ ထူဝ်ႇလိၼ်ထူင်ၼိုင်ႈ သႂ်ႇဝႆႉ 15 ပေႇၼၼ်ႉႁၢႆ၊ ၶႄးၶဝ်ႈသွႆးၼိူဝ်ႉၵႆႇႁၢႆ၊ ၼမ်ႉဝၢၼ်၊ ၼမ်ႉသူမ်ႈ ၼႂ်းႁၢၼ်ႉၶၢႆၶဝ်ႈသွႆး တီႈၸဵင်ႇၵၢတ်ႇၼၼ်ႉၵေႃႈႁၢႆ။ လိူဝ်ၼၼ်ႉ ဢၼ်ႁဝ်းၶႃႈ ဢမ်ႇႁူႉၸွမ်း တေမီးထႅင်ႈတင်း ၼမ်”ဝႃႈၼႆ။
ၼွၵ်ႈလိူဝ်ၼၼ်ႉ ႁၢၼ်ႉၶၢႆၶူဝ်း တီႈႁိမ်းၵၢတ်ႇသႅၼ်ဝီၼၼ်ႉ ႁၢၼ်ႉၼိုင်ႈ ၺႃးလၵ်ႉဢဝ်ၵႂႃႇ ၼမ်ႉမၼ်း 6 ပုင်း ဝႃႈၼႆ။
ၸၢႆးဢူးၶမ်း ၽူႈတႅၼ်းသၽႃးၵူၼ်းမိူင်း ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈၼႆႉ ၶႃႈၵေႃႈ ပႆႇလႆႈငိၼ်း ၶၢဝ်ႇ မၼ်း။ ပဵၼ်ၽႂ်ဢဝ် ၸုမ်းလႂ်ဢဝ်ဢၼ်ဝႃႈၼၼ်ႉ။ ၵူၺ်းၵႃႈ ယူႇတီႈၶႃႈထၢင်ႇတႄႉ တီႈသႅၼ်ဝီႁဝ်းၶႃႈၼႆႉ ၵူၼ်းၶီႈယႃႈ၊ ၶီႈ ၾိၼ်ႇ ၵေႃႈမီးၼမ် လႅပ်ႈတေပဵၼ်ၵူၼ်းၸိူဝ်းၼၼ်ႉၵေႃႈ ပဵၼ်လႆႈ မိူဝ်ႈၽွင်းသုၵ်ႉသၵ်ႉ ပဵၼ်ပၢင်တိုၵ်းၵၼ်ယူႇၼၼ်ႉ ၶဝ် ၶဝ်ႈလၵ်ႉၵေႃႈပဵၼ်လႆႈ ၵူၺ်းၵႃႈလွင်ႈၼႆႉ ၶႃႈၵေႃႈ ပႆႇၸၢင်ႈယိုၼ်ယၼ်လႆႈ ဝႃႈပဵၼ်ၽႂ်” ဝႃႈၼႆ။
ၵူၼ်းမိူင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ မိူဝ်ႈ 9/10/2019 မိူဝ်ႈဝႃးၼႆႉဝႃႈ “ ယင်းၸုမ်းမီးယိပ်းၵွင်ႈၵၢင်ႇၸုမ်းၼိုင်ႈ ယႃႉယေးငိုၼ်း CB Bank ဢၢၼ်းၸူၼ်ဢဝ်ငိုၼ်းၵႂႃႇ” ဝႃႈၼႆ။
ၵဵဝ်ႇၵပ်းလွင်ႈၼႆႉတႄႉ လႆႈငိုၼ်းၵႂႃႇယူႇႁိုဝ် ဢမ်ႇလႆႈႁိုဝ် ၽူႈတွႆႇႁွၵ်ႈဢမ်ႇလႆႈၶေႃႈယိုၼ်ယၼ်။ ၾၢႆႇယေးငိုၼ်းၵေႃႈ ဢမ်ႇပိုၼ်ၽၢဝ်ႇပဵၼ်တၢင်းၵၢၼ်။
ဢိင်ၼိူဝ်လွင်ႈပဵၼ်ပၢင်တိုၵ်းၵၼ် ၼႂ်းၵၢင်ဝဵင်းသႅၼ်ဝီၼၼ်ႉသေ ၵူၼ်းမိူင်းလႆႈတိူဝ်ႉၺႃးၸၢၵ်ႇမၢၵ်ႇၸွမ်း တင်းမူတ်း 7 ၵေႃႉ။ ၼႂ်း 7 ၼၼ်ႉ တႃႇ 2 ၵေႃႉ လႆႈသူင်ႇယူတ်းယႃတူဝ်တီႈႁူင်းယႃ လႃႈသဵဝ်ႈဝႆႉ။ လိူဝ်ၼၼ်ႉ ၶူဝ်းၶွင်ၵူၼ်းမိူင်းဢၼ်လႆႈ လူႉၵွႆ ၸွမ်းၼႂ်းပၢင်တိုၵ်းၼၼ်ႉ တင်းမူတ်းမီး 18 ၵေႃႉ ဝႃႈၼႆ။
ၸၢႆးဢူးၶမ်း လၢတ်ႈၼႄဝႃႈ “ ၸွမ်းၼင်ႇ သဵၼ်ႈမၢႆ ႁဝ်းၶႃႈ ၵဵပ်းဝႆႉတႄႉ ၶူဝ်းၶွင်ၵူၼ်းမိူင်း ဢၼ်လႆႈၺႃးၸၢၵ်ႇမၢၵ်ႇၸွမ်း ၼႂ်းပၢင်တိုၵ်းၼၼ်ႉ ၼႃးၵူၼ်းမိူင်း 2 ၵေႃႉ မၢၵ်ႇတူၵ်းသႂ်ႇသေ ၶဝ်ႈလူႉၵွႆၵမ်ႈၽွင်ႈ၊ မၢၵ်ႇၵွင်ႈ၊ မၢၵ်ႇလူင်တိူဝ်ႉၸွမ်းႁိူၼ်း ယေး၊ ၵႃး၊ ရူတ်ႉၶိူင်ႈ ၸဵမ်ၸိူဝ်းၼႆႉ လူႉၵွႆ။ ယဝ်ႉၵေႃႈ မၢၵ်ႇဢၼ် တူၵ်းသေ ဢမ်ႇတႅၵ်ႇ မီး 4 လုၵ်ႈၼၼ်ႉတႄႉ ၸဝ်ႈၼႃႈ တီႈ မႃးၽဵဝ်ႈၵႂႃႇယဝ်ႉ။ ထိုင်ယၢမ်းလဵဝ် သိုၵ်းမၢၼ်ႈ ဝၢင်းလွင်ႈႁူမ်ႇလူမ်ႈ ၼႂ်းဝဵင်းဝႆႉ 3 တီႈ” ဝႃႈၼႆ။
မၢၵ်ႇ 4 လုၵ်ႈ ဢၼ်တူၵ်းသေ ပႆႇတႅၵ်ႇၼၼ်ႉ ပဵၼ်တီႈႁိမ်းၵၢတ်ႇ 2 လုၵ်ႈ၊ ၼႂ်းႁိူၼ်းၵူၼ်းဝၢၼ်ႈ ပွၵ်ႉ 1 ၸၢႆးသႃႇဢေး 1 လုၵ်ႈလႄႈ တီႈၼႂ်းၵျွင်းသႅင် 1 လုၵ်ႈ။
တေႃႈလဵဝ် ၼႂ်းၸႄႈဝဵင်းသႅၼ်ဝီၼႆႉ ၵူၼ်းမိူင်းၵႂႃႇမႃးၶိုၼ်းမိူၼ်ၵဝ်ႇ။ ႁၢၼ်ႉၶၢႆၶူဝ်း၊ ၵၢတ်ႇ ၸဵမ်ၸိူဝ်းၼႆႉ ပိုတ်ႇၶိုၼ်းမိူၼ် ၵဝ်ႇယဝ်ႉ ဝႃႈၼႆ။
