မိူင်းတႆး လႄႈမိူင်းၶႄႇ ႁူမ်ႈၵၼ်ၸတ်းႁဵတ်းပၢင်ၶႅင်ႇရူတ်ႉထိပ်ႇ တႃႇလွင်ႈမိုတ်ႈၵိုဝ်းၸမ်ၸႂ် (ဆွေမျိုးပေါက်ဖော်) ႁႂ်ႈပဵၼ် တီႈမၢႆတွင်း ဝၼ်းၵေႃႇတင်ႈပႃႇတီႇၶွမ်ႊမိဝ်ႊၼိတ်ႉၶႄႇ 70 ပီတဵမ်။
ပၢင်ၶႅင်ႇရူတ်ႉထိပ်ႇၼႆႉ ၸတ်းႁဵတ်းမိူဝ်ႈဝၼ်းတီႈ 2/10/2019 ယၢမ်းၵၢင်ၼႂ် 7 မူင်းၶိုင်ႈ လုၵ်ႉတီႈ ၼႂ်းဝဵင်းႁူၺ်ႈလီ ၾင်ႇ မိူင်းၶႄႇသေ ၶဝ်ႈတီႈၽၵ်းတူႁေႃၶမ်း (နန်းတော်ပေါက်) ပၼ်ႇမႃးၼႂ်းဝဵင်းမူႇၸေႊ။ ပၼ်ႇလူတ်ႉထိပ်ႇလဵပ်ႈဝဵင်းသိုပ်ႇၵႂႃႇ တီႈလွႆတိုင်ၶမ်း။ ဝၢႆးၼၼ်ႉ ပၼ်ၵႂႃႇၾၢႆႇ (မင်္ဂလာမူစယ်) သေ လုၵ်ႉတီႈၽၵ်းတူၸၢင်ႉၽိူၵ်ႇ (ဆင်ဖြူပေါက်) ၶဝ်ႈၶိုၼ်း မိူင်းၶႄႇ။
တီႈပၢင်ၶႅင်ႇလူတ်ႉထိပ်ႇၼႆႉ ၵူၼ်းမိူင်းၶႄႇ 260 ၵေႃႉ၊ ၵူၼ်းမိူင်းမူႇၸေႊ 25 ၵေႃႉ၊ ၵူၼ်းမိူင်းၼမ်ႉၶမ်း 35 ၵေႃႉလႄႈ ၵူၼ်း ထုင်ႉပဵင်း မိူင်းမၢၼ်ႈ 20 ၵေႃႉၶဝ်ႈႁူမ်ႈၶႅင်ႇ။
ၵူၼ်းပၼ်ႇရူတ်ႉထိပ်ႇၶဝ်လၢတ်ႈဝႃႈ “တႃႇတေၶဝ်ႈဢွၵ်ႇမိူင်းၶႄႇ လႆႈတွၵ်ႇၸုမ်ႈတီႈၽၵ်းတူ ၾၢင်ႇၶႄႇလႄႈ လႆႈၶဝ်ႈထႅဝ်ၵိုတ်းပႂ်ႉ။ ၵူၼ်းမိူင်းၶႄႇတႄႉ ဢမ်ႇလူဝ်ႇၶဝ်ႈထႅဝ်သေ ၶဝ်တွၵ်ႇပၼ်။ မိူဝ်ႈပီၵႆတႄႉ ဢမ်ႇလႆႈတွၵ်ႇ။ ယွၼ်ႉၼၼ် ဢမ်ႇၶိုတ်းလႆႈ ၵူၼ်းမိူင်းၶႄႇ။ ၵူၼ်းမိူင်းၶႄႇၵူၺ်း ပေႉၵႂႃႇတင်းမူတ်း။ ပၢင်ၶႅင်ႇပွၵ်ႈၼႆႉ ဢမ်ႇမီးလွင်ႈၽဵင်ႇပဵင်း” ဝႃႈၼႆ။
တီႈပၢင်ၶႅင်ႇလူတ်ႉထိပ်ႇၼၼ်ႉ ၵူၼ်းၸၢႆး သႅၼ်းဢႃယု 18 ထိုင် 39 ပီ သူးရၢင်းသမ်ႉ ထီႉၼိုင်ႈလႆႈ 8,000 ယႂၼ် ၊ ထီႉသွင် 4,000 ယႂၼ် ၊ ထီႉသၢမ် 2,000 ယႂၼ်။ ၵူၼ်းၸၢႆး ဢႃယု 40 ထိုင် 60 ထီႉၼိုင်ႈလႆႈ 4,000 ယႂၼ် ၊ ထီႉသွင် 2,000 ယႂၼ် ၊ ထီႉသၢမ် 1,000 ယႂၼ်။ ၼၢင်းယိင်း ဢႃယု 18 ထိုင် 60 ထီႉၼိုင်ႈလႆႈ 4,000 ယႂၼ် ၊ ထီႉသွင် 2,000 ယႂၼ် ၊ ထီႉသၢမ် 1,000 ယႂၼ်။
ဝၼ်းတီႈ 3 လိူၼ်ဢွၵ်ႊထူဝ်ႊပိူဝ်ႊသမ်ႉ ၾၢႆႇဢုပ်ႉပိူင်ႇ၊ ၵေႃလိၵ်ႈလၢႆးလႄႈၾိင်ႈငႄႈၸၢဝ်းၶိူဝ်း မိူၼ်ၼင်ႇ တႆး၊ ၶၢင်၊ တ ဢၢင်း၊ ယၢင်း၊ ရၶႅင်ႇလႄႈမၢၼ်ႈ ၸိူဝ်းၼႆႉ ၵႂႃႇၶဝ်ႈႁူမ်ႈပၢင်ပွႆးဝၼ်းၵေႃႇတင်ႈပႃႊတီႊၶွမ်ႊမိဝ်ႊၼိဝ်ႊၶႄႇ 70 ပီတဵမ်။
ပၢင်ၶႅင်ႇလူတ်ႉထိပ်ႇတႃႇလွင်ႈမိုတ်ႈၵိုဝ်းသွင်ၸိုင်ႈမိူင်းၼႆႉ ၸတ်းႁဵတ်းမႃးၸဵမ်မိူဝ်ႈပီ 2000 တဵမ်။ မိူဝ်ႈၵွၼ်ႇတႄႉ ၶႅင်ႇ လႅၼ်ႈ (မာရ သွန်) ။ ပၢင်ၶႅင်ႇလူတ်ႉထိပ်ႇၼႆႉ တိုၵ်ႉတႄႇမႃးမိူဝ်ႈပီၵႆ 2018 ။ မိူဝ်ႈၵွၼ်ႇတႄႉ ၸတ်းႁဵတ်းၵွၼ်ႇၼႃႈပွႆး သွၼ်းၼမ်ႉ။ ပူၼ်ႉမႃးမွၵ်ႈ 6 ပီၼၼ်ႉ ၶၢႆႉမႃးႁဵတ်းၼႂ်းလိူၼ်ဢွၵ်ႊထူဝ်ႊပိူဝ်ႊ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ