ၼႂ်းဝူင်ႈဝၢင်ႈၼႆႉ ၵူၼ်းမိူင်းၶႄႇမိူင်းထႆး လၵ်ႉလွမ်ယူႇသဝ်းၼႂ်းဝဵင်းတႃႈၶီႈလဵၵ်းၼမ်/ ပလိၵ်ႈမၢၼ်ႈတႃႈၶီႈလဵၵ်းတီႉၺွပ်း ၵူၼ်းမိူင်းၶႄႇၵေႃႉၼိုင်ႈ လၵ်ႉယူႇသဝ်းၼႂ်းဝဵင်းတႃႈၶီႈလဵၵ်း ဢမ်ႇပဵၼ်တၢင်းၵၢၼ်။
ဝၼ်းတီႈ 5/10/2019 ၼၼ်ႉ ပလိၵ်ႈတႃႈၶီႈလဵၵ်း လႆႈၶဝ်ႈၵူတ်ႇထတ်းတီႉလႆႈ ၵူၼ်းမိူင်းၶႄႇ ၵေႃႉၼိုင်ႈ တီႈဝၢၼ်ႈႁူဝ်ၼႃး ပွၵ်ႉပႃႇသၵ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။
ၵူၼ်းမိူင်းၶႄႇ ဢၼ်ၶဝ်ႈမႃးယူႇ ၼႂ်းဝဵင်းတႃႈၶီႈလဵၵ်းၼႆႉ ပဵၼ်ၽူႈၸၢႆး ၸိုဝ်ႈႁွင်ႉ Mr. Zhan Zhengcheng ပဵၼ်ၵူၼ်းၸႃတိ ဝဵင်းသၢၼ်မိင်သီး ၸႄႈမိူင်းၽူႉၵျၢၼ်ႇ ၸိုင်ႈမိူင်းၶႄႇ။
ၸဝ်ႈၼႃႈတီႈ ပလိၵ်ႈၸႄႈဝဵင်းတႃႈၶီႈလဵၵ်း လၢတ်ႈဝႃႈ “ ပူၼ်ႉမႃး မွၵ်ႈလိူၼ် ၵူၼ်းမိူင်းၶႄႇ လၵ်ႉၶဝ်ႈမႃး ယိပ်းဝႆႉပၢတ်ႉသ ပွတ်ႊ ဢမ်ႇမီးဝီႊသႃႊ။ လၵ်ႉၶဝ်ႈမႃး တၢင်းလႅၼ်လိၼ် တႆး – လၢဝ်း ၶၢမ်ႈၼမ်ႉၶွင်မႃး တၢင်းဝၢၼ်ႈပူင်ႇသေ ၶဝ်ႈမႃးတၢင်း တႃႈၶီႈလဵၵ်း” ဝႃႈၼႆ။
ၵဵဝ်ႇၵပ်းလွင်ႈၼႆႉ တေႃႈလဵဝ် ယူႇတီႈၸဝ်ႈၼႃႈတီႈပလိၵ်ႈ လႆႈပိုတ်ႇလိူင်ႈၸွႆးတြႃး ၵူၼ်းမိူင်းၶႄႇ လူၺ်ႈမတ်ႉတႃ 13 (ခ) တီႈႁူင်းပလိၵ်ႈၸႄႈဝဵင်းတႃႈၶီႈလဵၵ်းဝႆႉယဝ်ႉ။
ပူၼ်ႉမႃး မိူဝ်ႈလိူၼ်ၵျူႊလၢႆႊ ဝၼ်းတီႈ 2 ၼၼ်ႉၵေႃႈ ၸဝ်ႈၼႃႈတီႈပလိၵ်ႈ တႃႈၶီႈလဵၵ်း တီႉလႆႈၵူၼ်းမိူင်းထႆး 6 ၵေႃႉ ပႃး တင်း ၶိူင်ႈၵွင်ႈၵၢင်ႇ၊ တီႈဝၢၼ်ႈပႃႇလႅင် ဢိူင်ႇမိူင်းၽူင်း(ၶ) ၸႄႈဝဵင်းတႃႈၶီႈလဵၵ်း။
ပီ 2019 ၼႆႉ ၼႂ်းၸႄႈဝဵင်းတႃႈၶီႈလဵၵ်းၼႆႉ ၵႆႉတီႉၺွပ်းလႆႈ ၵူၼ်းမိူင်းထႆးတင်း မိူင်းၶႄႇ လၵ်ႉၶဝ်ႈမိူင်း ဢမ်ႇၸွမ်းပၵ်းပိူင် မၢႆမီႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ