ၼႂ်းတိုဝ်ႉတၢင်းဝၼ်းၵိူတ်ႇၸဝ်ႈၶူးဝႃး ၸၼ်ထရင်းသီ ၸဝ်ႈၵွၼ်းဝတ်ႉၵူႇတဝ်ႈ ဢႃယုၸဝ်ႈ ၶွပ်ႈတဵမ် 71 ပီ (ဝႃႇသႃ 51 ဝႃႇ)၊ တႆးႁွတ်ႈၵဵင်းမႆႇလႄႈ ပီႈၼွင်ႉထႆး ႁူမ်ႈၵၼ်ၸႃႇၵလဵင်ႉလူ တၵ်ႉၵႃႇသတ်ႉထႃးမႃးၶဝ်ႈႁူမ်ႈလူႇတၢၼ်း တင်းၼမ်။
ဝၼ်းတီႈ 5-6/10/2019 ၼႆႉ တႆးႁွတ်ႈၵဵင်းမႆႇ/ ႁႅင်းၵၢၼ်ယၢၼ်မိူင်း ႁူမ်ႈၵၼ်မႃးလူႇတၢၼ်း လဵင်ႉလူ ၼႂ်းဝၼ်းၵိူတ်ႇ ၸဝ်ႈၶူး ဝႃးပၽတ်းထမ်းမရင်းသီ(ၸဝ်ႈၶူးဝႃးၸၼ်ထရင်းသီ) တီႈဝတ်ႉၵူႇတဝ်ႈ ဢိူင်ႇသီၽုမ်း ၸႄႈဝဵင်းၵဵင်းမႆႇ ၸိုင်းထႆး။
ၼၢင်းၶမ်းၸိင်ႇ ၽူႈၶဝ်ႈႁူမ်ႈလူႇတၢၼ်း လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ မႃးၸႃႇၵႃႉလဵင်ႉလူ ပဵၼ်ၶဝ်ႈသဵၼ်ႈ ၵူဝ်ႈၶႃႈ။ ႁဝ်းၶႃႈ မႃးႁူမ်ႈၵၼ်လဵင်ႉလူၶဝ်ႈသဵၼ်ႈမူတ်းၵႂႃႇ မွၵ်ႈ 30 ၵီးလူဝ်းပၢႆ။ ႁူမ်ႈၵၼ်ၶႃႈဢေႃႈ။ မိူဝ်ႈပီပူၼ်ႉႁဝ်းၶႃႈလဵင်ႉၼဵင်ႈ ၵူဝ်ႈၶႃႈ။ မႃးၸႃႇၵၵူႈပီၶႃႈယဝ်ႉ” ဝႃႈၼႆ။
ပၢင်ပွႆးဝၼ်းၵိူတ်ႇၸဝ်ႈၶူးဝႃး ၸၼ်ထရင်းသီၼႆႉ ၸတ်းႁဵတ်းမႃးၵူႈပီ ပေႃးထိုင်မႃးၼႂ်းလိူၼ်ဢွၵ်ႊထူဝ်ႊပိူဝ်ႊၸိုင် မီးတၵ်ႉ ၵႃႇသတ်ႉထႃး ပီႈၼွင်ႉၵူၼ်းထႆးလႄႈ ပီႈၼွင်ႉတႆး၊ ႁႅင်းၵၢၼ်တႆး ႁူမ်ႈၵၼ် ၶဝ်ႈလူႇတၢၼ်း/လဵင်ႉလူ။
“ ပီႈၼွင်ႉတႆးႁဝ်း ဢွၼ်ၵၼ်မႃးၸႃႇၵလူႇတၢၼ်းၼမ်ၵူႈပီၶႃႈယဝ်ႉ။ ၸဵမ်ၵူၼ်းမိူင်း/ ထႆးၵေႃႈ ဢွၼ် ၵၼ်မႃးၸႃႇၵ လဵင်ႉလူဢေႃႈ။ တင်းမူတ်း သုမ်ႉတၢင်းၵိၼ်ဢၼ်ၸႅၵ်ႇၸႃႇၵၼႆႉ မီးဢမ်ႇယွမ်း မွၵ်ႈ 100 ၼႆႉၶႃႈ” ၽူႈ တူင်ႉၼိုင် ၼႂ်း တူင်ႇဝူင်းတႆးၵဵင်းမႆႇ ၵေႃႉၼိုင်ႈလၢတ်ႈ။
ပၢင်သိုပ်ႇၸႆးတႃ/ ၸႃတႃလူင် ဝၼ်းၵိူတ်ႇၸဝ်ႈၶူးဝႃးၸၼ်တရင်းသီ ၸဝ်ႈၵွၼ်းဝတ်ႉၵူႇတဝ်ႈ ဝဵင်းၵဵင်းမႆႇ ၸိုင်ႈထႆး ၸတ်း ႁဵတ်းတႃႇၶၢဝ်းတၢင်း 2 ဝၼ်း။ မီးၵၢၼ်သိုပ်ႇၸႆးတႃလူင်လႄႈ လူႇတၢၼ်းပၼ်ပေႃႈမႄႈ ပူႇမွၼ်ႇၼၢႆးယႃႈ၊ ႁူမ်ႈလူႇတၢၼ်း ႁူင်းၸႃႇၵၶဝ်ႈၼမ်ႉတၢင်းၵိၼ်(ရူင်းထၢၼ်း)၊ ပၢင်လူႇတၢၼ်းတုင်းငိုၼ်း/ တုင်းၶမ်း၊ ၵၢၼ်ၼႄၸၢတ်ႈၸိူင်း၊ ႁႆႇတိုင်ႈႁွင်ႉ ၽဵင်းၵႂၢမ်းပၢင်ၵျေႃႇမူၼ်ႈ၊ ၵၢၼ်ၼႄတၢင်းၵႃႈ ၾၢင်ႁၢင်ႈၾိင်ႈငႄႈႁိတ်ႈႁွႆးတႆး ၸဵမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ