မိူဝ်ႈၼႆႉ ဝၼ်းတီႈ 8/10/2019 ယၢမ်းဝၢႆးဝၼ်း 2 မူင်းပၢႆၼႆႉ မီးၵူၼ်းၸၢႆး 2 ၵေႃႉ ၶီႉရူတ်ႉၶိူင်ႈမႃးသေ ၶဝ်ႈၸူၼ်ႁၢၼ်ႉ ၶၢႆၶမ်း (ထားထားလွင်) တီႈႁိမ်းၾႆးလႅင် ၵၢတ်ႇဢႃးၶႃႇ တၢင်းၼႃႈဝတ်ႉဝဵင်းၵႅဝ်ႈ ၼႂ်းဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။ တၼ်းၸူၼ် ဢဝ်ၵႂႃႇလႆႈသၢႆၶေႃးၶမ်း 2 ဝၢတ်ႇ။
ဢူးသျၢၼ်းမိၼ်ႉၸေႃး ၽူႈၵွၼ်းၸႄႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ။ မီးၽူႈၸၢႆး 2 ၵေႃႉ ၶီႇ ရူတ်ႉၶိူင်ႈမႃးသေ ၶဝ်ႈမႃး ၸူၼ် ၼႂ်းႁၢၼ်ႉၶၢႆၶမ်းၼၼ်ႉၵမ်းလဵဝ်။ ဢဝ်မိတ်ႈငႃသေၸူၼ်ဢဝ်ၵႂႃႇ တၼ်းလႆႈသၢႆၶေႃးၶမ်း ၵႂႃႇ 2 ဝၢတ်ႇ။ တေႃႈလဵဝ် ၵူၼ်းႁၢႆႉ 2 ၵေႃႉၼၼ်ႉ ပၢႆႈလွတ်ႈ ဝႆႉ။ လွင်ႈမၢတ်ႇၸဵပ်းလူႉတၢႆတႄႉ ဢမ်ႇမီး” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸဝ်ႈၶွင်ႁၢၼ်ႉၶၢႆၶမ်း (ထားထားလွင်) ၼၼ်ႉ လႆႈၸႅင်ႈၵႂၢမ်းဝႆႉတီႈႁူင်းပလိၵ်ႈၸႄႈဝဵင်းတႃႈၶီႈ လဵၵ်းဝႆႉယဝ်ႉ ဝႃႈၼႆ။
တေႃႈလဵဝ်ၼႆႉ ၼႂ်းဝဵင်းတႃႈၶီႈလဵၵ်းၼႆႉ တင်ႈလၢၼ်ႇသေ တိုၵ်ႉၵူတ်ႇထတ်းၵူၼ်းၵႂႃႇမႃးယူႇ ၸွမ်းသဵၼ်ႈတၢင်း ဝႃႈ ၼႆ။
မိူဝ်ႈဝၼ်းတီႈ 8/7/2019 ယၢမ်းၵၢင်ၼႂ်မွၵ်ႈ 8 မူင်းၼၼ်ႉ ၽူႈၸၢႆး 2 ၵေႃႉ ဢမ်ႇႁူႉၸၵ်းၸိုဝ်ႈ ပႃးၵွင်ႈပွတ်းလဝ်းၼိုင်ႈသေ ၶဝ်ႈၸူၼ်ႁၢၼ်ႉၶၢႆၶမ်း သျိၼ်ႊတႃႊ တီႈပွၵ်ႉဝၢၼ်ႈၵွင်း ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း လႆႈၵႂႃႇသၢႆၶေႃးၶမ်း 2 သဵၼ်ႈ ဝႃႈၼႆ။
မိူဝ်ႈဝၼ်းတီႈ 03/06/2019 ယၢမ်းဝၢႆးဝၼ်း 2:45 မူင်းၼၼ်ႉၵေႃႈ ႁၢၼ်ႉၶၢႆၶမ်း “ၼၢင်းၼၢင်းဝုၼ်းၵႅဝ်ႈ” ၶွင်ၸၢႆးဢၢႆႈဝုၼ်း လႄႈ ၼၢင်းမူဝ်း ဢၼ်ပိုတ်ႇဝႆႉတီႈၼိူဝ်သဵၼ်ႈတၢင်း မိူင်းႁူမ်ႈတုမ် တီႈပွၵ်ႉမႄႈၶၢဝ် ဝဵင်းတႃႈၶီႈလဵၵ်း ၸိုင်ႈတႆး ပွတ်းဢွၵ်ႇ ၶူင်းၼၼ်ႉ မီးၽူႈၸၢႆး 2 ၵေႃႉ ပူၵ်ႉၼႃႈပူၵ်ႉတႃသေ ဢဝ်ၵွင်ႈၸမ်ႈငႃလွၵ်ႇငိုတ်ႈ ၸူၼ်ဢဝ်ၶမ်းၵႂႃႇတင်းၼမ်လၢႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ