TYN ထုင်ႉႁူဝ်ၵဵဝ် တေလူင်းႁူပ်ႉထူပ်းၵူၼ်းၼုမ်ႇ လၢႆၸႄႈဝဵင်း တွၼ်ႈတႃႇၵွင်ႉသၢၼ် ႁူမ်ႈၵၼ်ႁဵတ်းသၢင်ႈၵၢၼ်ငၢၼ်း ၸွမ်းၵၼ်ၵႂႃႇ။
ပေႃးထိုင်မႃး ဝၼ်းတီႈ 25 – 27/10/2019 ယူႇတီႈ ၵေႃႁူမ်ႈသၢင်ႈၵူၼ်းၼုမ်ႇတႆး TYN ထုင်ႉႁူဝ်ၵဵဝ် တေလူင်းပိုၼ်ႉတီႈ ႁူပ်ႉထူပ်းၵူၼ်းၼုမ်ႇ လၢႆၸႄႈဝဵင်း ၼႂ်းထုင်ႉႁူဝ်ၵဵဝ် မိူၼ်ၼင်ႇ ဝဵင်းၸေႈၼႃး ႁွင်ႉ မိတ်ႉၵျီးၼႃး၊ ပူႇတႃႇဢူဝ်ႇ ႁွင်ႉ လွႆ ပူႇတႂ်ႈ ၸဵမ်ၸိူဝ်းၼႆႉ။ ပိူင်လူင်မၼ်း ၼင်ႇႁိုဝ်ၵူၼ်းၼုမ်ႇ တေမေႃ ၶဝ်ႈ ဢွၵ်ႇၵၼ် မေႃၵပ်းသိုပ်ႇၵွင်ႉသၢၼ် ႁူမ်ႈၵၼ် ႁဵတ်းၵၢၼ်၊ ယုၵ်ႉမုၼ်းၵူၼ်းၼုမ်ႇ ႁႂ်ႈမီးၼမ်ႉၵတ်ႉၼမ်မႃးထႅင်ႈ ၸဵမ်ၸိူဝ်းၼႆႉ။
ၼၢင်းဢေးမူၺ် ၽူႈဢွၼ်ႁူဝ် ၵေႃပွင်ၵၢၼ် CEC ထုင်ႉႁူဝ်ၵဵဝ် လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ႁူပ်ႉထူပ်းၼႆႉ ၼင်ႇႁိုဝ် ၵူၼ်းၼုမ်ႇထုင်ႉႁူဝ်ၵဵဝ် တေတိူဝ်းၸမ်ၸႂ်ၵၼ်မႃး၊ မၢႆထိုင်ဝႃႈ ၵူၼ်းၼုမ်ႇတၢင်းထုင်ႉႁူဝ်ၵဵဝ်ၼႆႉ ၽၢတ်ႇၽႄၵၼ်ဝႆႉ ၵူႈဢိူင်ႇ၊ ၵူႈတီႈ မၼ်းဢမ်ႇပေႃးၽွမ်ႉႁူမ်ႈၵၼ်။ ယဝ်ႉၵေႃႈ ပၼ်ႁႃၵူၼ်းၼုမ်ႇႁဝ်း ဢၼ်မီးဝႆႉၸိူဝ်းၼႆႉ ထုၵ်ႇလီၵႄႈ လိတ်ႈၸိူင်ႉႁိုဝ် ၸဵမ်ၸိူဝ်းၼႆႉ။ ထႅင်ႈလွင်ႈၼိုင်ႈသမ်ႉ ၼင်ႁိုဝ် ၽူႈတၢင်တူဝ်ပိုၼ်ႉတီႈ ပေႃးတေပဵၼ်ၽူႈဢွၼ်ႁူဝ်လီ ၵႂႃႇထႅင်ႈ ၸဵမ်ၸိူဝ်းၼႆႉ” ဝႃႈၼႆ။
ပၢင်ႁူပ်ႉထူပ်းဢုပ်ႇဢူဝ်းၵၼ်ၼႆႉ ၵဵဝ်ႇၵပ်းလွင်ႈပၼ်ႁႃၵူၼ်းၼုမ်ႇ၊ ယဝ်ႉၵေႃႈ ပၼ်ႁႃၵူၼ်းၼုမ်ႇလႄႈ ၵူၼ်းလူင် ဢမ်ႇ ပွင်ႇၸႂ်ၵၼ်။ ၼွၵ်ႈလိူဝ်ၼၼ်ႉ လွင်ႈတႃႇၸတ်းႁဵတ်းပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းၼုမ်ႇ ၸဵမ်ၸိူဝ်းၼႆႉ။
ၼၢင်းဢေးမူၺ် သိုပ်ႇလၢတ်ႈဝႃႈ “ ဢၼ်ၼႆႉတႄႉ ပေႃးၵဵဝ်ႇလူၺ်ႈလွင်ႈယႃႈမဝ်းၵမ်ႁိုဝ်၊ လွင်ႈငမ်းယဵၼ်ႁိုဝ် တေၵွင်ႉ ၵၢႆႇၵၼ်တင်း ၵူၼ်းၼုမ်ႇၵူႈၸၢဝ်းၶိူဝ်း ဢၼ်မီးဝႆႉၼႂ်းပိုၼ်ႉတီႈ ၽႂ်မၼ်းသေ တေႁဵတ်းသၢင်ႈၵႂႃႇ။ လုၵ်ႉတီႈၵူၼ်းၼုမ်ႇ ပိုၼ်ႉတီႈသေ ႁဝ်းတေႁူမ်ႈၵၼ် တင်းၵူၼ်းၼုမ်ႇၵူႈတီႈတီႈသေတေႁဵတ်းသၢင်ႈၵႂႃႇ။ ယဝ်ႉၵေႃႈ ပေႃးပဵၼ်ၵၢၼ်လီတႃႇ ၸိူဝ်ႉၶိူဝ်းလႄႈ ၵူၼ်းၼုမ်ႇၼႆႉ လူဝ်ႇႁူမ်ႈၵၼ်ႁဵတ်းသၢင်ႈၵႂႃႇ လွင်ႈၼႆႉၵေႃႈ ႁဝ်းၶႃႈလႆႈဢုပ်ႇဢူဝ်း ၵၼ်ပႃး။ လိူဝ်ၼၼ်ႉ လွင်ႈၵၢၼ်ငၢၼ်းႁဝ်းမိူဝ်းၼႃႈသမ်ႉ မီးဝႆႉၸိူင်ႉႁိုဝ် ၸဵမ်ၸိူဝ်းၼႆႉ” ဝႃႈၼႆ။
“ ႁဝ်းၶႃႈတႄႉ တေဢမ်ႇမီးလွင်ႈၸႅၵ်ႇၽႄ ၼႂ်းၸၢဝ်းၶိူဝ်း မိူၼ်ၸိူင်ႉၼင်ႇ တႆးလႅင်း၊ တႆးတႂ်ႈ ၸဵမ်ၸိူဝ်းၼႆႉ ပေႃးပဵၼ် တႆးၵေႃႈပေႃးယဝ်ႉ။ တေဢမ်ႇၸႅၵ်ႇလွင်ႈၵိူဝ်းယမ်ၽႃသႃသင် ပေႃးၵဵဝ်ႇၵပ်းလူၺ်ႈလွင်ႈၵူၼ်းၼုမ်ႇမႃး ႁဝ်းၶႃႈ တေ ႁူမ်ႈၵၼ် ႁဵတ်းသၢင်ႈၵႂႃႇ” ၼၢင်းဢေးမူၺ် သပ်းလႅင်းလၢတ်ႈၼႄၼင်ႇၼႆ။
ၵဵဝ်ႇလူၺ်ႈလွင်ႈ ပၢင်ႁူပ်ႉထူပ်းၵူၼ်းၼုမ်ႇထုင်ႉႁူဝ်ၵဵဝ် ပွၵ်ႈၼႆႉ ပိူင်လူင်မၼ်း ၼင်ႇႁိုဝ် ၵူၼ်းၼုမ်ႇတေမေႃ ၶဝ်ႈဢွၵ်ႇ ၵၼ်၊ မေႃၵပ်းသိုပ်ႇၵွင်ႉသၢၼ်ၵၼ်လႄႈ မေႃႁူမ်ႈၵၼ်ႁဵတ်းၵၢၼ်ၸွမ်းၵၼ်။ ယဝ်ႉၵေႃႈ ယုၵ်ႉမုၼ်းၵူၼ်းၼုမ်ႇ ႁႂ်ႈပေႃး မီးၼမ်ႉၵတ်ႉၼမ်မႃးထႅင်ႈလိူဝ်ၵဝ်ႇ ၸဵမ်ၸိူဝ်းၼႆႉ။
ပူၼ်ႉမႃး မိူဝ်ႈဝၼ်းတီႈ 25-27/08/2019 ၼၼ်ႉၵေႃႈ ယူႇတီႈၵေႃႁူမ်ႈသၢင်ႈၵူၼ်းၼုမ်ႇတႆး TYN လူင်းပိုၼ်ႉတီႈ ႁူပ်ႉ ထူပ်း ၵူၼ်းၼုမ်ႇ တၢင်းၸႄႈတွၼ်ႈမိူင်းယၢင်း။ မိူဝ်ႈဝၼ်းတီႈ 25-28/9/2019 ၼၼ်ႉသမ်ႉ လူင်းႁူပ်ႉထူပ်းတၢင်းၸႄႈ တွၼ်ႈ မၢၼ်ႈမေႃႇ ၸဵမ်ၸိူဝ်းၼႆႉ။