ၸုမ်းလူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA 10 ၸုမ်း တေႁူပ်ႉဢုပ်ႇၵၼ်တီႈၵဵင်းမႆႇ ၼႂ်းဝူင်ႈတီႈသွင် လိူၼ် ဢွၵ်ႊထူဝ်ႊပိူဝ်ႊၼႆႉ။

ပေႃးထိုင်မႃး ဝၼ်းတီႈ 10-12/10/2019 ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ဢၼ်လူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈမိူင်း NCA 10 ၸုမ်း တေႁူပ်ႉဢုပ်ႇၵၼ်တီႈၵဵင်းမႆႇ ၸိုင်ႈထႆး ဝႃႈၼႆ။

ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်းမၢႆ 2 / ၽူႈၶၢၼ်ပၢၵ်ႇ RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ၵုမ်ၼႆႉ တေ ၸတ်းႁဵတ်းတႃႇၶၢဝ်းတၢင်း 3 ဝၼ်း။ လမ်ႇလွင်ႈမၼ်း ဢၼ်တေဢုပ်ႇၵၼ်ၼႆႉတႄႉ ၵဵဝ်ႇၵပ်းလူၺ်ႈၶၵ်ႉၵၢၼ်လွင်ႈငမ်း ယဵၼ် တေႁဵတ်းႁိုဝ်သိုပ်ႇၵႂႃႇတၢင်ႈၼႃႈ ၸဵမ်ၸိူဝ်းၼႆႉ။ တၢင်းၾၢႆႇလူင်ပွင်ၸိုင်ႈ ဢၼ်လႆႈမၵ်းမၼ်ႈဝႆႉ ၶေႃႈတႅပ်းတတ်း ၼႂ်းၶၵ်ႉၵၢၼ်လွင်ႈငမ်း ယဵၼ် 4 ၶေႃႈလႄႈ တၢင်းၾၢႆႇၸုမ်းၸၢဝ်းၶိူဝ်းႁဝ်းၶႃႈသေ ပၢင်ၵုမ်ၵမ်းၼႆႉ တေဢဝ်မႃးဢုပ်ႇဢူဝ်း ငူပ်ႉငီႉၵၼ်” ဝႃႈၼႆ။

ၸုမ်း PPST ၼႆႉ ယူႇတီႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉတူဝ်ႈမိူင်း NCA 8 ၸုမ်းသေ ၶွတ်ႇၽွတ်ႈ ၶိုၼ်ႈမႃး ၸုမ်းဢွၼ်ႁူဝ်ဢုပ်ႇဢူဝ်းၶၵ်ႉၵၢၼ်လွင်ႈငမ်းယဵၼ် PPST ။ ဝၢႆးမႃး ၽိူမ်ႉၶဝ်ႈမႃး လုၵ်ႈၸုမ်း ထႅင်ႈ 2 ၸုမ်း တင်းမူတ်းလုၵ်ႈၸုမ်းမီးယူႇ 10 ၸုမ်း။

မိူၼ်ၼင်ႇ ၶွင်ႇသီႇဢဝ် ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)၊ ၸုမ်း ပူတ်း ပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်း ႁူမ်ႈၸိူဝ်ႉၸၢတ်ႈ ၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်း မိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈ တုမ်ၸိူဝ်ႉၸၢတ်ႈယၢင်းၽိူၵ်ႇ (KNU)၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA)၊ တပ်ႉသိုၵ်းပူတ်းပွႆႇၸိူဝ်ႉ ၸၢတ်ႈယၢင်း-ၶွင်ႇသီႇငမ်းယဵၼ် (KNLA-PC) လႄႈ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ (ALP)၊ ၸုမ်းလႃးႁူႇတီႇမူဝ်ႊၶရႅတ်ႉ တိၵ်ႉ LDU လႄႈ ၸုမ်းပႃႇတီႇမိူင်းမွၼ်းမႂ်ႇ NMSP ၸဵမ်ၸိူဝ်းၼႆႉ။