ဝတ်ႉဝိႁၢရ်လူင် မိူင်းလင်း သီႇပေႃႉဢၼ်ၾႆးမႆႈၵႂႃႇၼၼ်ႉ ၸဝ်ႈသြႃႇလႄႈ တၵ်ႉၵႃႇထုင်ႉမိူင်းလင်း တေၶိုၼ်းမႄးၵေႃႇ သၢင်ႈ ၵူၺ်းၵႃႈ ယၢပ်ႇၽိုတ်ႇငိုၼ်းတွင်းဝႆႉလႄႈ ႁပ်ႉတုင်းတၢင်းလူႇတီႈတၵ်ႉၵႃႇတီႈၸမ်ၵႆယူႇ ဝႃႈၼႆ။
ဢိင်ၼိူဝ်ၾႆးမႆႈတီႈဝတ်ႉဝိႁၢရ်မိူင်းလင်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ မိူဝ်ႈဝၼ်းတီႈ 2/10/2019 ယၢမ်းၵၢင်ၶမ်ႈ 9:45 မူင်းၼၼ်ႉသေ တႃႇတေမီးဝတ်ႉၵျွင်းလင်မႂ်ႇၼၼ်ႉ ပီႈၼွင်ႉၵူၼ်းဝၢၼ်ႈတိုၵ်ႉၶိုင်သၢင်ႈၶတ်းၸႂ်ယူႇ။
ၸဝ်ႈၶူး ပၺ်ၺႃၸေႃးတ ၽူႈၵွၼ်းဝတ်ႉမိူင်းလင်း လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် တေၵေႃႇသၢင်ႈၶိုၼ်းဝတ်ႉတႄႉ ႁူပ်ႉလွင်ႈယၢပ်ႇၽိုတ်ႇတႄႉတႄႉယဝ်ႉတၵ်ႉၵႃႇ။ ဢၼ်လမ်ႇလွင်ႈတီႈသုတ်းတႄႉ ငိုၼ်းတွင်းၼၼ်ႉယဝ်ႉ။ ယွၼ်ႉၼၼ် ယူႇတီႈႁဝ်းၸဝ်ႈသေ ၶႂ်ႈယွၼ်းလူႇၶၢမ်ႇထိုင် တၵ်ႉၵႃႇသတ်ႉထႃး တီႈၸမ်တီႈၵႆ ၼႂ်းမိူင်း/ ၼွၵ်ႈမိူင်း ၵူႈတီႈ။ ယူႇတီႈၵၢင်ၸႂ် ႁဝ်းၸဝ်ႈၶဝ်တႄႉ ၶႂ်ႈသၢင်ႈၶိုၼ်းဝတ်ႉပၢၼ်မႂ်ႇဢဝ်” ဝႃႈၼႆ။
မိူဝ်ႈၽွင်းၾႆးမႆႈဝတ်ႉမိူင်းလင်းၼၼ်ႉ မႆႈပႃးၸဝ်ႈသၢင်ႇဢွၼ်ႇ တူၼ်ၼိုင်ႈ ၸိုဝ်ႈၸဝ်ႈၵုသလ (ၸၢႆးဢွမ်သႅင်ႁၵ်ႉ) ဢႃယု 9 ၶူပ်ႇ လူႉလွၼ်ႇၸွမ်းၾႆး။ လိူဝ်ၼၼ်ႉ ၶူဝ်းၶွင်ၼႂ်းဝတ်ႉ ဢမ်ႇတၼ်းလႆႈသင် မႆႈပႃးၵႂႃႇမူတ်း ဝႃႈၼႆ။
ၸဝ်ႈၶူး ပၺ်ၺႃၸေႃးတ သိုပ်ႇလၢတ်ႈဝႃႈ“ ၾႆးမႆႈမူတ်း ဢမ်ႇတၼ်းလႆႈၶူဝ်းၶွင်သင်။ မီးၽြႃးသူႇၼိုင်ႈ ၵူၺ်းဢၼ်ဢမ်ႇ မႆႈၼၼ်ႉ။ ပေႃးၼပ်ႉသွၼ်ႇတူၺ်းတင်းမူတ်း ဢၼ်လႆႈမႆႈၵႂႃႇၸွမ်းၼႂ်းၾႆးၼၼ်ႉ တေတူၵ်းမႅၼ်ႈငိုၼ်း ယူႇမွၵ်ႈ 600 သႅၼ် ပျႃးပၢႆၵႃႈၼႆႉ”ဝႃႈၼႆ။
တေႃႈလဵဝ် သင်ၶၸဝ်ႈ ဢၼ်ယူႇသဝ်းဝႆႉတီႈဝတ်ႉမိူင်းလင်းၼႆႉ ၸဵမ်မုၼ်ၸၢင်းလႄႈ ၸဝ်ႈသၢင်ႇ တင်းမူတ်းမီး 14 တူၼ်။ ပေႃးပႃးၸဝ်ႈသၢင်ႇၵုသလ ဢႃယု 9 ၶူပ်ႇၼၼ်ႉသမ်ႉ မီး 15 တူၼ်။
တၵ်ႉၵႃႇသတ်ႉထႃး ဢၼ်မႃးၶိုၼ်ႈၵျွင်း/ဝတ်ႉမိူင်းလင်းၼႆႉ တင်းမူတ်းမီးယူႇ 5 ဝၢၼ်ႈ။ မိူၼ်ၼင်ႇ ဝၢၼ်ႈ ၵၢတ်ႇ၊ ဝၢၼ်ႈႁွင်ႇ၊ ဝၢၼ်ႈၶူၵ်ႉၼမ်ႉ၊ ဝၢၼ်ႈၸၢင်ႉႁၼ်လႄႈ ဝၢၼ်ႈၼႃးပွင်း ၸဵမ်ၸိူဝ်းၼႆႉ။
“သင်ဝႃႈ ၽူႈမီးၼမ်ႉၸႂ်ၸေႇတၼႃႇ ႁဝ်းၶဝ် ၵူႈၵေႃႉၵူႈၵူၼ်းၸွႆႈၵမ်ႉထႅမ်မႃးၼႆၸိုင် ၶႅၼ်းတေႃႈၵပ်းသိုပ်ႇမႃးလႆႈတီႈ မၢႆ ၾူၼ်း ႁဝ်းၸဝ်ႈ 096-75758588 (မိူင်ႈမၢၼ်ႈ)၊ ဢမ်ႇၼၼ် ဢူၼ်းငိုၼ်းသူင်ႇလႆႈတၢင်းမၢႆယေးငိုၼ်း KBZ BANK ၸိုဝ်ႈ ASHIN PYIN NYAR ZAWL TA 15830199962739701။ မၢႆၾၢင် NCR No. 13/THAPANA (T) 0006007 လႆႈယူႇၶႃႈ” ၸဝ်ႈၶူးပၺ်ၺႃၸေႃးတလၢတ်ႈ။
