ၵူၼ်းၶၢႆၽၵ်း ၽူႈၸၢႆး ဢႃယု 30 ပၢႆ ၺႃးၵူၼ်းဢမ်ႇႁူႉၾၢႆႇ ယိုဝ်းတၢႆထင်တီႈ ၼႂ်းဝဵင်းမိူင်းငေႃႉ ၸႄႈဝဵင်းၵျွၵ်ႉမႄး။

ဝၼ်းတီႈ 2/10/2019 ယၢမ်းၵၢင်ၼႂ် မွၵ်ႈ 10 မူင်းၶိုင်ႈၼၼ်ႉ ၸၢႆးၶမ်း ဢႃယု 32 ပီ ၺႃးၸုမ်းဢမ်ႇႁူႉၾၢႆႇ ယိုဝ်းတၢႆ ၼႂ်းၵႄႈ ဝၢၼ်ႈႁၢႆးၶမ်း တင်း ဝၢၼ်ႈၼႃးယႃႉ ၵိင်ႇၸႄႈဝဵင်းမိူင်းငေႃႉ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။

ၵူၼ်းမိူင်းငေႃႉ ဢႃယု မွၵ်ႈ 60 ပၢႆ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ။ ၵူၼ်းၶၢႆၽၵ်း ဢၼ်သႂ်ႇရူတ်ႉၶိူင်ႈ သေ ဢႅဝ်ႇၶၢႆၸွမ်းဝၢၼ်ႈၼၼ်ႉ ၺႃးယိုဝ်းတၢႆထင်တီႈၵေႃႉၼိုင်ႈ။ ၵူၺ်းၵႃႈ ၸုမ်းဢၼ်ယိုဝ်းၼၼ်ႉ ပဵၼ်ၼမ်ႉမိုဝ်းၽႂ်၊ ပဵၼ်ၸုမ်းလႂ် ယိုဝ်းဢၼ်ဝႃႈၼၼ်ႉ ဢမ်ႇလႆႈႁူႉ” ဝႃႈၼႆ။

ၼႂ်းထုင်ႉၼႆႉ မီးပေႃႈၵႃႉမႄႈၵႃႉ ဢဝ်ၽၵ်းသႂ်ႇရူတ်ႉၶိူင်ႈသေ ၶဝ်ႈဝၢၼ်ႈဢွၵ်ႇဝၢၼ်ႈဢႅဝ်ႇၶၢႆၽၵ်း။

ၵူၼ်းၶၢႆၽၵ်း ဢႃယု ႁိမ်း 40 ပီ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၵူၼ်းၶၢႆၽၵ်းၺႃးယိုဝ်းတၢႆ ၵေႃႉၼိုင်ႈ။ ၺႃး ယိုဝ်းၵွၵ်း ႁူဝ် ၺႃးယိုဝ်းလၢႆၵမ်းတႄႉဢမ်ႇလႆႈႁူႉၶႃႈ။ တေႃႈလဵဝ် ပီႈၼွင်ႉမၼ်းၸၢႆး လႆႈဢဝ်ၶၢပ်ႈတူဝ်မိူဝ်းလုမ်းလႃး တီႈဝၢၼ်ႈၶဝ် 57 လၵ်း တၢင်းၼမ်ႉသၼ်ႇပုၼ်ႉၶႃႈ၊ မႆႈၸႂ်လွင်ႈႁူမ်ႇလူမ်ႈတႄႉတႄႉ၊ မိူဝ်ႈလႂ်ၵူၼ်းမိူင်းတေလႆႈႁႃၵိၼ်လဵင်ႉ တွင်ႉငၢႆႈလူမ်ဢမ်ႇႁူႉယဝ်ႉ” ဝႃႈၼႆ။

ၵူၼ်းၶၢႆၽၵ်းၸိူဝ်းၼႆႉ ယၢမ်းၵၢင်ၼႂ်ၸဝ်ႉ 2-3 မူင်း ဢွၼ်ၵၼ်ၵႂႃႇသိုပ်ႇဢဝ်ၽၵ်း ၸွမ်းၵၢတ်ႇဝဵင်းၵျွၵ်ႉမႄးသေ ၵႂႃႇၶၢႆ ၸွမ်းဝၢၼ်ႈ ဝႃႈၼႆ။

“မိူင်းပႆႇလႅင်းလီ ၵူၼ်းၶၢႆၽၵ်းၸိူဝ်းၼႆႉပေႃးႁွတ်ႈၽႅဝ် မႃးၶၢႆတၢင်းမိူင်းငေႃႉယဝ်ႉ။ ဢမ်ႇဝႃႈ ၼၢင်းယိင်း၊ ၽူႈၸၢႆး ဢွၼ် ၵၼ်မႃး၊ ၸၢဝ်းၶိူဝ်းၵေႃႈၼမ် ဢၼ်မႃးၶၢႆၽၵ်းၸိူဝ်းၼႆႉ။ ၼွၵ်ႈလိူဝ်ၼၼ်ႉ ၵူၼ်းၶၢႆၽၵ်း သႂ်ႇရူတ်ႉၶိူင်ႈသေ ဢႅဝ်ႇလႄႇၶၢႆ ၸွမ်းၼႂ်းမူႇဝၢၼ်ႈ တီႈၼိုင်ႈယဝ်ႉတီႈၼိုင်ႈၼၼ်ႉ ဢၼ်ၺႃးၸုမ်းဢမ်ႇႁူႉၾၢႆႇ ယိုဝ်းတၢႆၵေႃႈ မီးဢမ်ႇယွမ်း 10 ၵေႃႉ လွင်ႈ ၼႆႉ ဢမ်ႇမီးၽႂ်ႁတ်းဢွၵ်ႇၶၢဝ်ႇသင်ဢမ်ႇမီးၽႂ်ႁပ်ႉပုၼ်ႈၽွၼ်းသင် တၢႆလွၵ်ႇတၢႆလၢႆလွၼ်ႉလွၼ်ႉ” ၵူၼ်းပိုၼ်ႉတီႈမိူင်း ငေႃႉလၢတ်ႈ။

ၵူၼ်းၶၢႆၽၵ်း ဢၼ်သႂ်ႇရူတ်ႉၶိူင်ႈသေ ဢႅဝ်ႇၶၢႆၸွမ်းဝၢၼ်ႈ ၼႂ်းၸႄႈဝဵင်းၵျွၵ်ႉမႄးၼႆႉ ၵမ်ႈၼမ် ပဵၼ်ၵူၼ်းပၢႆႈၽေးသိုၵ်း ၸိူဝ်းၶၢႆႉမႃးယူႇၼႂ်းဝဵင်းၵျွၵ်ႉမႄးႁႃငိုၼ်းလဵင်ႉၼႃႈႁိူၼ်း။

ၼႂ်းၵိင်ႇၸႄႈဝဵင်းမိူင်းငေႃႉၼႆႉ မီးၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃး မိူၼ်ၼင်ႇ တပ်ႉသိုၵ်းလူင်ပွင်ၸိုင်ႈမၢၼ်ႈလႄႈ တပ်ႉသိုၵ်းတဢၢင်း ၸဵမ်ၸိူဝ်းၼႆႉ။