ၽူႈၵိူဝ်းၵုမ်ၸိုင်ႈမိူင်း မိူင်းႁူမ်ႈတုမ် တေႃႇဢွင်ႇသၢၼ်းၸူႉၵျီႇ မႃးဝႆႈၽြႃးၸၢမ်ၵဝ်ႈတွၼ်ႈ ၼွင်ႁၢႆးယႃႈ တႃႇၶၢဝ်းတၢင်း 2 ဝၼ်း ၽွင်းပဵၼ်ပွႆးၽြႃး ၸၢမ်ၵဝ်ႈတွၼ်ႈ လူင်းမိူင်း။
မိူဝ်ႈၼႆႉ 4/10/2019 တေႃႇဢွင်ႇသၢၼ်းၸူႉၵျီႇၼႆႉ တေလုၵ်ႉတီႈၼေႇပျီႇတေႃႇသေ မႃးလူင်းႁၢႆးဝူဝ်း တေႃႈလဵဝ် ႁွတ်ႈ ၽႅဝ်ဝႆႉ တီႈၸႄႈဝဵင်း ယွင်ႁူၺ်ႈ။ တေယင်ႉလိုဝ်ႈတီႈႁူင်းႁႅမ်း Inle Princess Resort ၶိုၼ်းၼိုင်ႈ။
ႁူင်းႁႅမ်း Inle Princess Resort ၼႆႉ လႆႈႁူႉဝႃႈ ပဵၼ်ၶွင်ဢူးဢူင်းမွင်ႇ ၽွင်းလူင်ၾၢႆႇ ႁူင်းႁႅမ်းလႄႈ ၵၢၼ်တွင်ႈတဵဝ်းဢႅဝ်ႇ ယဵမ်ႈ လူင်ပွင်ၸိုင်ႈမိူင်းႁူမ်ႈတုမ် ဝႃႈၼႆ။
ပေႃးထိုင်မႃး ဝၼ်းတီႈ 5/10/2019 မိူဝ်ႈၽုၵ်ႈသမ်ႉ တေၶဝ်ႈၵႂႃႇဝႆႈၽြႃးၸၢမ်ၵဝ်ႈတွၼ်ႈ (ၽွင်ႇတေႃႇဢူး)။ ယဝ်ႉၵေႃႈ ဢႅဝ်ႇလဵပ်ႈၼႂ်းၼွင်၊ ဝၢႆးသေၼၼ်ႉၸင်ႇပွၵ်ႈၶိုၼ်း ဝႃႈၼႆ။
ၵူၼ်းမိူင်း ၵမ်ႈၽွင်ႈထတ်းသၢင်ဝႃႈ “ ၶၢဝ်းတၢင်းဢွင်ႇသၢၼ်းၸူႉၵျီႇ ပွၵ်ႈၼႆႉ ပဵၼ်ၶၢဝ်းတၢင်းလူင်ႈၼႃႈ တႃႇပၢင်လိူၵ်ႈတင်ႈ 2020 တေထိုင်မႃးၼႆၵေႃႈၸၢင်ႈဝႃႈလႆႈ”ဝႃႈၼႆ။
ၵၢၼ်ဢွၵ်ႇၶၢဝ်းတၢင်း မႃးဢႅဝ်ႇယဵမ်ႈဝႆႈၽြႃးတီႈၼွင်ႁၢႆးယႃႈ ပွၵ်ႈၼႆႉ ယူႇတီႈၸွမ်ၽွင်းလူင်ၸႄႈမိူင်းတႆး Dr. လိၼ်းထုတ်ႉ ၵေႃႈၸွမ်းႁပ်ႉသူင်ႇ ဝႃႈၼႆ။
ပၢင်ပွႆးၽြႃးၸၢမ်ၵဝ်ႈတွၼ်ႈ ပီၼႆႉ တႄႇလူင်းဝတ်ႉ/ ၵျွင်း ဝၼ်းတီႈ 29/9/2019 တေဢႅဝ်ႇလဵပ်ႈ ပၼ်ၵူၼ်းမိူင်းဝႆႈသႃတေႃႇထိုင်ဝၼ်းတီႈ 16/10/2019 တႃႇ ၶၢဝ်းတၢင်း 18 ဝၼ်း ဝႃႈၼႆ။
