ၸုမ်းတေႃႉသူင်ႇယႃႈမႃႉ တင်း သိုၵ်းဝႃႉ 171 ပဵၼ်ပၢင်တိုၵ်းၵၼ် တီႈလႅၼ်လိၼ်တႆး – ထႆးထႅင်ႈသေ သိုၵ်းဝႃႉ တီႉလႆႈထႅင်ႈ ယႃႈမႃႉ 30 သႅၼ်မဵတ်ႉ( 3 လၢၼ်ႉမဵတ်ႉ) လႄႈ ၵူၼ်းတေႃႉသူင်ႇၼိုင်ႈၵေႃႉ၊ တူဝ်တၢႆထႅင်ႈ 6 ၵေႃႉ။
ဝၼ်းတီႈ 2/10/2019 ယၢမ်းဝၢႆးဝၼ်း တပ်ႉသိုၵ်းဝႃႉ ပွတ်းၸၢၼ်း 171 ႁူပ်ႉၺႃး ၸုမ်းၵႃႉယႃႈ(ၵူၼ်းတေႃႉသူင်ႇယႃႈမႃႉ) ၼႂ်း ထိူၼ်ႇ၊ ၽွင်းသိုၵ်းဝႃႉၸႂ်ႉၶဝ် ဝၢင်းၶိူင်ႈၵွင်ႈၵၢင်ႇၼၼ်ႉ ၶဝ်ယိုဝ်းမႃးလႄႈ သွင်ၾၢႆႇလႆႈပိုတ်းယိုဝ်းၵၼ်။ ဝၢႆးၼၼ်ႉ ယူႇတီႈ တပ်ႉသိုၵ်း ဝႃႉ လႆႈၶဝ်ႈၵူတ်ႇထတ်း ထူပ်းႁၼ်ထႅင်ႈယႃႈမႃႉ 30 သႅၼ်မဵတ်ႉ၊ ၵူၼ်းထႅင်ႈၼိုင်ႈၵေႃႉလႄႈ တူဝ်တၢႆထႅင်ႈ 6 ၵေႃႉ။
ဢူးၺီႇလၢၼ်း ၽူႈၼင်ႈလုမ်းၵပ်းသၢၼ်သိုၵ်းဝႃႉ တီႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈပဵၼ်ပၢင်တိုၵ်းၵၼ် တင်း ၵူၼ်းတေႃႉသူင်ႇယႃႈ မိူဝ်ႈဝၼ်းတီႈ 1 ၼၼ်ႉၵမ်ႈၽွင်ႈ ပၢႆႈလွတ်ႈဝႆႉၼႆလႄႈ ယူႇတီႈသိုၵ်းဝႃႉႁဝ်း လႆႈသွၵ်ႈတဝ်ထိူၼ်ႇႁႃ ၶဝ်။ ထိုင်မႃးဝၼ်းတီႈ 2 ယၢမ်းၵၢင်ၶမ်ႈ မွၵ်ႈ 5 မူင်းၼၼ်ႉ လႆႈသွၵ်ႈႁႃႁၼ်သေ ပိုတ်းယိုဝ်းၵၼ်ထႅင်ႈ” ဝႃႈၼႆ။
ဝၢႆးလင်ပၢင်တိုၵ်း ထူပ်းႁၼ်တူဝ်တၢႆထႅင်ႈ 6 ၵေႃႉ။ တူဝ်လိပ်း 1 ၵေႃႉ။ ဝၢႆးလင်ၼၼ်ႉတႄႉ ပႆႇလႆႈငိၼ်းၶၢဝ်ႇၼႂ်းပိုၼ်ႉတီႈ ပွင်ႇလၢတ်ႈသင်မႃးထႅင်ႈ ဝႃႈၼႆ။
ၵဵဝ်ႇလူၺ်ႈလွင်ႈယႃႈမဝ်းၵမ် တေဢဝ်ၶၢမ်ႈလႅၼ်လိၼ်တႆး – ထႆးၼႆႉ ပဵၼ်ၶွင်ၸုမ်းလႂ်၊ ၽႂ်ပဵၼ်ၸဝ်ႈၶွင် ဢၼ်ဝႃႈၼၼ်ႉ တိုၵ်ႉၵူတ်ႇထတ်းဝႆႉယူႇ ဝႃႈၼႆ။
ဢူးၺီႇလၢၼ်း လၢတ်ႈဝႃႈ “ တေႃႈလဵဝ် ၼႂ်းၼႃႈတီႈတပ်ႉသိုၵ်းဝႃႉ 171 ႁဝ်းဢၼ်တူင်ႉၼိုင်ဝႆႉ တၢင်းၸိုင်ႈတႆးပွတ်းဢွၵ်ႇ ၼႆႉ ၵႆႉတီႉလႆႈယႃႈမဝ်းၵမ်လႄႈ ၵူၼ်းလၵ်ႉတေႃႇသူင်ႇယႃႈမဝ်းၵမ်။ တေႃႉသူင်ႇယႃႈ ၸွမ်းသဵၼ်ႈတၢင်းမိုတ်ႉ(မွင်ႇၶူဝ်ႇ) ဢၼ် ဝႃႈၼႆႉတႄႉ မၼ်းဢမ်ႇမီးပိူင်တၢႆ။ တပ်ႉသိုၵ်းဝႃႉႁဝ်း တၢင်းပွတ်းၸၢၼ်းလႄႈ လႅၼ်လိၼ်ထႆးၼႆႉ ယၢၼ်ၵႆၵၼ် မွၵ်ႈ 400 ၵီႇလူဝ်ႇမီႇတႃႇၵူၺ်း” ဝႃႈၼႆ။
မၼ်းၸၢႆးဝႃႈ ယႃႈမဝ်းၵမ် ဢၼ်ၽႅဝ်ၵႂႃႇတၢင်းမိူင်းထႆးၼၼ်ႉ ၵမ်ႈၼမ်မၢပ်ႇၼႄးပဵၼ်ၶွင်တပ်ႉသိုၵ်းဝႃႉ မႃးတႃႇသေႇ။ ၶၢဝ်ႇၼႂ်းမိူင်း၊ ၼွၵ်ႈမိူင်း ၵေႃႈတႅမ်ႈတုမ်ႉတိူဝ်ႉၸိုဝ်ႈသဵင်တပ်ႉသိုၵ်းဝႃႉမႃးတႃႇသေႇ။ ၵွပ်ႈၼႆသိုၵ်းဝႃႉလႆႈၽိူမ်ႉႁႅင်းသိုၵ်း တူင်ႉၼိုင်တီႉၺွပ်းၵႂၢတ်ႇလၢင်ႉၵူၼ်းၵႃႉယႃႈ။ ဢွင်ႈတီႈဢၼ်တပ်ႉသိုၵ်းဝႃႉ တူင်ႉၼိုင်ၼၼ်ႉ တိုၼ်းတေဢမ်ႇပၼ်ယႃႈ မဝ်းၵမ်လတ်းၽၢၼ်ႇ ဝႃႈၼႆ။
မိူဝ်ႈဝၼ်းတီႈ 1/10/2019 ၼၼ်ႉၵေႃႈ သိုၵ်းဝႃႉ ပွတ်းၸၢၼ်း 171 ဢၼ်ပၵ်းတပ်းဝႆႉတီႈႁူၺ်ႈဢေႃႈ ႁိမ်းဝၢၼ်ႈၼမ်ႉယုမ်း ၵိင်ႇၸႄႈဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇၼၼ်ႉ လႆႈပဵၼ်ပၢင်တိုၵ်းၵၼ်ၸွမ်းၸုမ်းၵႃႉယႃႈ/ ၵူၼ်း တေႃႉသူင်ႇယႃႈသေ တီႉလႆႈ ယႃႈမႃႉ 18 သႅၼ်မဵတ်ႉ။ တီႉလႆႈတူဝ်ၵူၼ်းလိပ်း 8 ၵေႃႉ လႄႈ တူဝ်တၢႆ 2 ၵေႃႉ ဝႃႈၼႆ။
