တပ်ႉသိုၵ်းဝႃႉ ပိုၼ်ၽၢဝ်ႇဝႃႈ တီႉလႆႈယႃႈမႃႉ ယႃႈမဝ်းၵမ် လၢၼ်ႉမဵတ်ႉပၢႆ တီႈၼႃႈလိၼ်သိုၵ်း 171 ႁိမ်းဝၢၼ်ႈၼမ်ႉယုမ်း ႁူၺ်ႈဢေႃႈ ၵိင်ႇၸႄႈဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇၶူင်း။
မိူဝ်ႈဝၼ်းတီႈ 1/10/2019 ၼၼ်ႉ တပ်ႉသိုၵ်းဝႃႉ ၼႃႈလိၼ်သိုၵ်း 171 ဢၼ်ပၵ်းဝၢၼ်ႈႁူၺ်ႈဢေႃႈ ၵိင်ႇၸႄႈဝဵင်းပုင်ႇပႃႇၶႅမ် ၸႄႈ ဝဵင်းမိူင်းတူၼ် လႆႈပိုတ်းယိုဝ်းၵၼ်တင်း ၸုမ်းလၵ်ႉတေႃႉသူင်ႇယႃႈမႃႉ တေဢၢၼ်းဢဝ်ၶၢမ်ႈလႅၼ်လိၼ်ၶဝ်ႈၵႂႃႇ တၢင်း မိူင်းထႆး။ ၾၢႆႇဝႃႉပိုၼ်ၽၢဝ်ႇဝႃႈဝၢႆးလင်ပၢင်တိုၵ်း တီႉလႆႈယႃႈမႃႉ တင်းၼမ် 18 သႅၼ်မဵတ်ႉလႄႈ ၵူၼ်းတေႃႉ 8 ၵေႃႉ။ တူဝ်တၢႆၵူၼ်းတေႃႉသူင်ႇထႅင်ႈ 2 ၵေႃႉ။
ဢူးၺီႇလၢၼ်း ၽူႈၼင်ႈလုမ်းၵပ်းသၢၼ်ဝႃႉ တီႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈတပ်ႉသိုၵ်းဝႃႉ လႆႈႁူႉၶၢဝ်ႇ တေမီးၸုမ်းၵႃႉယႃႈ လၵ်ႉၶၢမ်ႈတၢင်းၼႂ်းၼႃႈလိၼ်ႁဝ်း 171 တူင်ႉၼိုင်ဝႆႉသေ တေဢၢၼ်းတေႃႉသူင်ႇ ၶဝ်ႈတၢင်းမိူင်းထႆး။ မိူဝ်ႈဝၼ်းတီႈ 1 ယၢမ်းၵၢင်ၼႂ်ၼၼ်ႉ လႆႈပိုတ်းယိုဝ်းၵၼ်ၵမ်းၼိုင်ႈသေ တီႉလႆႈ ယႃႈမႃႉ 18 သႅၼ်မဵတ်ႉ၊ ၵူၼ်းတေႃႉသူင်ႇ 8 ၵေႃႉလႄႈ တူဝ်တၢႆထႅင်ႈ 2 ၵေႃႉ။ တေႃႈလဵဝ် ႁဝ်းၶႃႈ တိုၵ်ႉၵူတ်ႇထတ်းထဵတ်ႈထၢမ်ဝႆႉယူႇ” ဝႃႈၼႆ။
ယႃႈမႃႉဢၼ်တီႉလႆႈၼၼ်ႉ သႂ်ႇၼႂ်းထူင်ပိူဝ်ႉသီၶဵဝ်၊ ၵူၼ်းတေႃႉယႃႈ ပဵၼ်ၸၢဝ်းၶိူဝ်းၼႂ်းမိူင်းတႆး၊ ၵဵဝ်ႇၵပ်းလွင်ႈယႃႈၸိူဝ်း ၼႆႉ မၼ်းၵဵဝ်ႇၵပ်းၸုမ်းလႂ် ပဵၼ်ၶွင်ၽႂ် ယူႇတီႈၽူႈမီးပုၼ်ႈၽွၼ်း တပ်ႉသိုၵ်းဝႃႉ တိုၵ်ႉၵူတ်ႇထတ်း ဝႆႉယူႇ ဝႃႈၼႆ။
ဢူးၺီႇလၢၼ်း လၢတ်ႈဝႃႈ “ ၸွမ်းၼင်ႇဢၼ်ၶႃႈႁဝ်းလႆႈႁူႉတႄႉ မၢင်ၵေႃႉတၼ်းပၢႆႈလွတ်ႈသေ ႁွတ်ႈၽႅဝ်ၵႂႃႇတၢင်းၾင်ႇ ထႆးယဝ်ႉၼႆၵေႃႈမီး။ တၢင်းတပ်ႉသိုၵ်းဝႃႉ ႁဝ်းၶႃႈ တၢင်းပွတ်းၸၢၼ်းၼႆႉ ၵႆႉတီႉလႆႈ ယႃႈမဝ်းၵမ် ၼမ်မႃးၵူႈပီလႄႈ ယွၼ်ႉ ၼၼ် ႁဝ်းၶႃႈ တမ်းဝႆႉပိူင်မူႇဝႃႇတ ၵႅတ်ႇၶႄႁႄႉၵင်ႈယႃႈမဝ်းၵမ်” ဝႃႈၼႆ။
မိူဝ်ႈဝၼ်းတီႈ 26/9/2019 ပူၼ်ႉမႃးၼၼ်ႉ ယူႇတီႈတပ်ႉသိုၵ်းဝႃႉ 171 ပွတ်းၸၢၼ်းၼႆႉ တီႉလႆႈယႃႈမဝ်းၵမ်လႄႈ ၶိူင်ႈၵွင်ႈ ၵၢင်ႇသေ လႆႈမွပ်ႈဢၢပ်ႈပၼ် ၼႂ်းမိုဝ်းၸဝ်ႈၼႃႈတီႈၾၢႆႇၵဵဝ်ႇၶွင်ႈလူင်ပွင်ၸိုင်ႈမၢၼ်ႈယဝ်ႉ ဝႃႈၼႆ။
