ပၢႆႉၶဝ်ႈဢွၵ်ႇဝဵင်းမိူင်းၵိုင် ဢၼ်တႅမ်ႈဝႆႉလိၵ်ႈ 3 ၽႃသႃ ပႃးလိၵ်ႈတႆးၼၼ်ႉ တေႃႈလဵဝ် ၵေႃႇသၢင်ႈ ယဝ်ႉတူဝ်ႈလီငၢမ်း တင်းမူတ်းလႆႈၸႂ်ႉငိုၼ်း ဢမ်ႇယွမ်း 120 သႅၼ်ပျႃး။

ယူႇတီႈၽူႈတႅၼ်း၊ ၽူႈမီးပုၼ်ႈၽွၼ်း/ ၽူႈယႂ်ႇၵူၼ်းလူင်လႄႈ ၵူၼ်းမိူင်း ႁူမ်ႈၵၼ်သႂ်ႇႁႅင်း ၵေႃႇသၢင်ႈ ပၢႆႉၶဝ်ႈဢွၵ်ႇဝဵင်း မိူင်းၵိုင် တၢင်းဢွၵ်ႇၵႂႃႇဝဵင်းသီႇပေႃႉ ၼႂ်းၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ တေႃႈလဵဝ် လႆႈၵေႃႇ သၢင်ႈႁဵတ်းယဝ်ႉတူဝ်ႈလီငၢမ်း။

လုင်းၸၢႆးလူင် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ “ ႁဵတ်းယဝ်ႉ တူဝ်ႈလီငၢမ်းယဝ်ႉၶႃႈ ႁဵတ်းဝႆႉတၢင်းၶဝ်ႈဢွၵ်ႇမိူင်းၵိုင် ၼိူဝ်သဵၼ်ႈတၢင်းလူင် မိူင်းၵိုင် – သီႇပေႃႉ။ တင်းမူတ်း တေသဵင်ႈ ငိုၼ်းယူႇ မွၵ်ႈ 120 သႅၼ်။ ၼႂ်းၼၼ်ႉ ငိုၼ်းသၽႃးၵမ်ႉၸွႆႈ 50 သႅၼ်ပျႃး။ လိူဝ်ၼၼ်ႉ လႆႈလူႇၶၢမ်ႇ တီႈ ၸဝ်ႈႁူင်းၵၢၼ်ၶဝ်သေ ယဝ်ႉၵေႃႈ ၵူၼ်းမိူင်းထႅင်ႈဢိတ်းဢွတ်း တေႃႈလဵဝ် ႁဵတ်းယဝ်ႉတူဝ်ႈလီငၢမ်းယဝ်ႉၶႃႈ” ဝႃႈၼႆ။

သိုပ်ႇလၢတ်ႈဝႃႈ “ လႆႈၸႂ်ႉၶၢဝ်းယၢမ်းၵေႃႇသၢင်ႈ မွၵ်ႈ 1 လိူၼ်၊ ႁဵတ်းၼႂ်းလိူၼ်သႅပ်ႊထႅမ်ႊပိူဝ်ႊ။ ႁဵတ်းဝႆႉတူဝ်လိၵ်ႈ 3 ၽႃသႃ၊ လိၵ်ႈတႆး၊ လိၵ်ႈဢင်းၵိတ်း လႄႈ လိၵ်ႈမၢၼ်ႈ” ဝႃႈၼႆ။

“ပီႈၼွင်ႉၵူၼ်းမိူင်းၵိုင်ႁဝ်းၶႃႈတႄႉ ယိူင်းဢၢၼ်းဝႃႈ ပေႃးမီးငိုၼ်းၵွင်ၵၢင်ထႅင်ႈ တေၶႂ်ႈႁဵတ်းပၢႆႉၶဝ်ႈဝဵင်းၸိူင်ႉၼႆ ထႅင်ႈ လၢႆလၢႆၾၢႆႇယူႇ” ၵူၼ်းမိူင်းၵိုင်လၢတ်ႈၼႄၼင်ႇၼႆ။

ၽူႈဢွၵ်ႇဝႅပ်ႊ(ၻီႊသၢႆႊ) တူဝ်လိၵ်ႈပၢႆႉၶဝ်ႈဢွၵ်ႇဝဵင်းမိူင်းၵိုင်ၼႆႉ ပဵၼ်ၸၢႆးသၢႆလႅင်းမိူင်း၊ ၽူႈၵေႃႇသၢင်ႈ ပဵၼ်ၸၢႆးၼေႃႇ လိုၼ်း ဝႃႈၼႆ။

ပၢႆႉၼႆႉပူၵ်းဝႆႉ ႁိမ်းဝၢၼ်ႈဝဵင်းငိုၼ်း ၸႄႈဝဵင်းမိူင်းၵိုင် ၼိူဝ်သဵၼ်ႈတၢင်းလူင် မိူင်းၵိုင် – သီႇပေႃႉ။ တႅမ်ႈဝႆႉ 3 ၽႃသႃ လိၵ်ႈ ဢင်းၵိတ်းတႅမ်ႈဝႆႉ “MONE KUNG”၊ လိၵ်ႈတႆးသမ်ႉ တႅမ်ႈဝႆႉ “မိူင်းၵိုင်”၊ လိၵ်ႈမၢၼ်ႈသမ်ႉ တႅမ်ႈဝႆႉ “မိုင်းကိုင်”။